ⅩⅢ
Chirooti Chi’abaanto Ikomi Na Babere
(Okoir 1:19-33)
Ⅰ Omonene agakwana na Musa, akamoteebia,
Ⅱ “Chora omotang’ani oyomo korwa ase kera egesaku ase ebisaku bionsi ikomi na bibere bi’Abaisraeli, erio obatome bagende koroota ense ya Kaanani, ense eria ’ngochia koa Abaisraeli.”
Ⅲ Musa agatoma abanto korwa ase erooro ya Parani, buna Omonene amochiigete. Abanto abwo bonsi nigo barenge abatang’ani ase Abaisraeli.
Ⅳ Aya naro amarieta abo:
Korwa ase egesaku kia Rubeni, Samua, mosinto o Sakuri;
Ⅴ korwa ase egesaku gia Simioni, Safati, mosinto o Hora;
Ⅵ korwa ase egesaku kia Yuda, Kalebu, mosinto o Yefune;
Ⅶ korwa ase egesaku gia Isakaru, Igali, mosinto o Yusufu;
Ⅷ korwa ase egesaku kia Efraimu, Hosea, mosinto o Nuni;
Ⅸ korwa ase egesaku gia Benjamini, Paliti, mosinto o Rafu;
Ⅹ korwa ase egesaku gia Sabuloni, Gadieli, mosinto o Sodi;
Ⅺ korwa ase egesaku kia Yusufu (nakio ekia Manase), Gadi, mosinto o Susi;
Ⅻ korwa ase egesaku gia Dani, Amieli, mosinto o Gemali;
ⅩⅢ korwa ase egesaku gi’Aseri, Seturi, mosinto o Mikaeli;
ⅩⅣ korwa ase egesaku kia Nafutali, Nabi, mosinto o Bofasi;
ⅩⅤ korwa ase egesaku kia Gadi, Geueli, mosinto o Maki.
ⅩⅥ Aya naro amarieta y’ abanto baria Musa atomete gochia koroota ense eria. Musa akaroka Hosea, mosinto o Nuni, Yoshua.
ⅩⅦ Ekero Musa are kobatoma gochia koroota ense ya Kaanani, akabateebia, “Genda motiire gochia Negebu, ensemo ya Irianyi y’ense eria, naende motiire gochia igoro ase ense y’ebitunwa.
ⅩⅧ Morigererie buna ense eria ere, naende morore gose abanto bareo ’mbare ne chinguru, gose naboro bare, gose nabake, gose nabange.
ⅩⅨ Naende morore gose ense eria abanto bamenyete nengiya gose nembe, naende morore emechie yabo ase bamenyete, onye nigo ere ebitwori gose nigo egiteire chindwaki.
ⅩⅩ Morigererie gose riroba ndire nobotobu gose neritaka, naende gose emete nereo, gose teiyo. Mobe abaremu, morentane okwama kw’amatunda gw’ense eria.” (Engaki eria nigo yarenge ekero emesabibu konya yamire ase ogotongorwa.)
ⅩⅪ Ase ayio bakageenda bakaroota ense eria, bagachaakera korwa ase erooro ya Sini bagaika Rehobu ase enchera ekogeenda Hamati.
ⅩⅫ Bagatiira, bakageenda ritang’ani ase ensemo ya Irianyi y’ense eria, na bagaika Heburoni, agwo ase Ahimani, na Sesai, na Talimai, abanto b’ororeria rw’Anaki, bamenyete. (Heburoni konya oagachirwe emiaka etan’ebere ritang’ani omochie o Soani o Misiri otaraagachwa.)
ⅩⅩⅢ Bagaika ase rikura ri’Esikoli, na aroro bakabutora orosagia rw’emesabibu rwabwate egesago ekenene mono, bagasomeka omwaro ase orosagia roria, na abanto babere bakarwambana. Naende bagatwa amakomomanga na amako.
ⅩⅩⅣ Aase aria akarokwa Rikura ri’Esikoli ase engencho y’orosagia roria Abaisraeli babutorete korwa aroro.
ⅩⅩⅤ Ekero amatuko emerongo ene aerire, abanto baria chirooti bakairana korwa ase okoroota ense eria.
ⅩⅩⅥ Bakairana gochia ase Musa na Aroni, na ase omoganda bwonsi bw’Abaisraeli agwo Kadeshi ase erooro ya Parani, bakabateebia amang’ana onsi, na bakaborokia okwama gw’ense eria.
ⅩⅩⅦ Barabwo bagateebia Musa, “Ntwageenda ase ense eria gwatotomete, ’ntwayenyora ng’a nentenenku ere n’amabeere na amooke, rora okwama gw’ense eria.
ⅩⅩⅧ Korende nonya naboigo, abanto bamenyeteo nigo bare ne chinguru, na emechie yabo nemenene mono, naende egiteire bokong’u ne chindwaki. Tari ayio oka, korende boigo ’ntwarora abanto b’ororeria rw’Anaki bare aroro.
ⅩⅩⅨ Abaameleki nigo bamenyete ase ense ya Negebu, ensemo ya Irianyi y’ense eria; Abahiti, na Abayebusi, na Abaamori, nigo bamenyete ase ense y’ebitunwa. Abakaanani barabwo nigo bamenyete ase enyancha enene mbarabare, ang’e norooche rwa Yorodani.”
ⅩⅩⅩ Korende Kalebu agakiria abanto tibaabaisa koamereria Musa, agateeba, “Tiga togende bwango, erinde toire ense eria, ekiagera intwe ’ntonyare kobua ense eria.”
ⅩⅩⅪ Abanto baria bagendete amo nere bagateeba, “Intwe titokonyara korwania abanto baria tobabue; nigo bare ne chinguru gotobua.”
ⅩⅩⅫ Ase ayio bakarentera Abaisraeli amang’ana amabe igoro y’ense eria bagendete koroota, bagateeba, “Ense eria twataara ime yaye koyeroota, nigo ere ense egoita abanto bamenyeteo. Abanto bonsi twarora nabatambe mono.
ⅩⅩⅩⅢ Ee, ’ntwarora amamonto, abanto b’ororeria rw’Anaki. Intwe nigo twerora ng’a n’ebimonto ebisinini mono, tore omogwekano bw’ebisase. Naboigo twarorekana ase bare.”