ⅩⅪ
Abakaanani bakobugwa
Ⅰ Ekero omorwoti oyomo Omokaanani, oyorenge kogaamba agwo Aradi, ensemo ya Irianyi ase ense ya Kaanani, aigwete ng’a Abaisraeli nigo bare ase enchera ekogeenda Atarimu, akabaumokera, akabarwania, na agoosa abande babo.
Ⅱ Erio Abaisraeli bakariera Omonene eira, bakaboora, “Aye koraabeeke abanto aba ase amaboko aito, intwe natosirie emechie yabo kegima.”
Ⅲ Omonene akaigwa ogosaba kw’Abaisraeli, akabaa obobui igoro y’Abakaanani. Abaisraeli bakabasiria kegima, bagasaria emechie yabo. Ase ogokora oko, aase aria akarokwa Horima.
Eng’iti y’etai
Ⅳ Abaisraeli bakarua ase egetunwa keria kia Hori, bakageenda orogeendo rwabo, bagaetera enchera ekogeenda gochia omosomo bw’Enyancha Embariri, erio bachie goetanana ense ya Edomu. Abanto tibaaba abaremereria ase ogoeta enchera eria.
Ⅴ Bakemurunganeria Nyasae na Musa, bakaboora, “Ninki mwatwegegeretie korwa ase ense ya Misiri mogatorenta toche gokwera aiga aase erooro? Aiga endagera na amaache tibiiyo, intwe twagechiigwe nendagera eye embe.”
Ⅵ Eri’Omonene agatoma ching’iti chingeenda inse chire nobosongo chigaacha ase egati y’Abaisraeli, chikabaroma, na abanto abange bagakwa.
Ⅶ Abanto bakageenda ase Musa, bakamoteebia, “Twakorire ebibe, ekiagera twakwanire mamincha y’Omonene na ase ore. Koranche osabe Omonene arusie ching’iti echi ase tore.” Ase ayio Musa akabasabera.
Ⅷ Eri’Omonene agateebia Musa, “Roisia omogwekano bw’eng’iti korwa ase etai, erio oyebeke igoro ase omote, erinde kera omonto oromirwe neng’iti kararigererie eng’iti eria nabe moyo.”
Ⅸ Musa akaroisia eng’iti y’etai, akayebeka igoro ase omote, na monto onde bwensi konya oromirwe neng’iti, onye orenge koyerigereria eng’iti eria, nigo arenge koba moyo.
Ebitwori Gochakera Egetunwa kia Hori Goikeera Enyancha Enyomo Ya Moabu
Ⅹ Abaisraeli bakaimoka kogeenda orogeendo rwabo, bagaika Oboti, bagatoora aroro.
Ⅺ Naende bakarua agwo Oboti, bakageenda bagaika Iye‐Abarimu, agwo ase erooro ere moocha ya Moabu, bagatoora aroro.
Ⅻ Na korwa aroro bakageenda bagaika ase Rikura ria Seredi, bagatoora aroro.
ⅩⅢ Magega y’ayio bakaimoka korwa Seredi, bakageenda bagatoora sugusu y’orooche rw’Arinoni, ase erooro eria eigete orobebe rw’Abaamori. Arinoni nigo rware orobebe gati y’Abamoabu na Abaamori.
ⅩⅣ Aya naro akogera “Egetabu gi’echisegi chi’Omonene” yakwana igoro ya “Omochie bw’Abahebu ase orogongo rwa Sufa, na amakura ase orooche rw’Arinoni rogoeta,
ⅩⅤ na egetirimboko ki’amakura, aase omochie bw’Ari ore, na gochia orobebe rwa Moabu.”
ⅩⅥ Na korwa ase Arinoni bakagenderera n’orogeendo rwabo, bagaika Beeri. Eyio nensoko eria aase Omonene atebeetie Musa, “Sangereria abanto, na inche nimbae amaache banywe.”
ⅩⅦ Erio Abaisraeli bagatera ogoteera oko:
“Chinsoko, sokia amaache acharaare gocha,
naintwe togoke na goteera ase amaache ayio.
ⅩⅧ Chinsoko abanene baremete,
echio chiaremetwe nenyimbo y’omogaambi,
ne chinyimbo chiabo chi’ogotaarera.”
Korwa agwo ase erooro bakageenda bagaika Matana,
ⅩⅨ na korwa Matana bakageenda bagaika Nahalieli, na korwa agwo bakageenda bagaika Bamoti.
ⅩⅩ Bakarua Bamoti, bakageenda gochia ase rikura riarenge ase ense y’Abaamori, ase egetirimboko ki’egetunwa gia Pisiga, ekio kerochie maate ase erooro.
Okobugwa Kw’abarwoti Sihoni na Ogi
(Okoir 2:26; 3:11)
ⅩⅪ Korwa aroro agwo Abasiraeli bagatoma abanto ase Sihoni, omorwoti bw’Abaamori bakwane nere, bamoborie,
ⅩⅫ “Koranche, otoe ribaga toete ase egati y’ense yao. Titogotiga enchera na kogobera gochia ase emegondo y’endagera, gose ey’emesabibu, gose titokonywa amaache korwa ase chinsoko chiaino, korende nigo toraete ase enchera enene goika tobe twaetanirie ense yaino.”
ⅩⅩⅢ Korende Sihoni akaanga koa Abaisraeli ribaga baete ase ense yaye. Agasangereria abarwani baye b’esegi, akageenda agaika Yahasi ase erooro, na agwo akarwania Abaisraeli.
ⅩⅩⅣ Korende Abaisraeli bagakenya abanto abange, bakaira ense ya Sihoni, korwa orooche rw’Arinoni goika orooche rwa Yaboki ase ense y’Abaamoni. Ribebe ri’Abaamoni nigo riarendire ne chinguru.
ⅩⅩⅤ Abaisraeli bakaira emechie yonsi y’Abaamori, bakaira na Hesiboni, erio bakamenya ase emechie amo nebichie bi’emechie eyio.
ⅩⅩⅥ Hesiboni n’oro orenge omochie omonene o Sihoni, omorwoti bw’Abaamori, oria konya orwanirie omorwoti orenge kogambera Abaamori agwo ritang’ani. Sihoni konya oirire ense yonsi y’omorwoti oyio goikera Arinoni.
ⅩⅩⅦ Ayio naro akogera abateri be chingero bakobora:
“Inchuo ase Hesiboni, tiga omochie oyo oagachwe,
tiga omochie o Sihoni oagachwe na kogitwa.
ⅩⅩⅧ Omorero okarua ase Hesiboni,
chimeme chi’omorero korwa omochie o Sihoni,
ogasaria Ari, omochie o Moabu,
ogasamba abanene b’ebigoro bi’Arinoni.
ⅩⅩⅨ Obobe nobwaino, inwe Abamoabu!
Mwasirigwe, inwe abamogosasiima Kemosi!
Nere otigire abana baino abamura bagotama,
bakorigia aase bakwebisa,
na abana baino abaiseke boosirwe,
barabwo bairirwe ase Sihoni, omorwoti bw’Abaamori.
ⅩⅩⅩ Intwe twabarasire chinsara;
Abahesiboni basiriigwe, twabaitire goika Diboni.
Tokabasiria goika Nofa
na korwa Nofa goika Medeba.”
ⅩⅩⅪ Ase igo Abaisraeli bakamenya ase ense y’Abaamori.
ⅩⅩⅫ Musa agatoma chirooti gochia koroota omochie o Yaeseri. Abaisraeli bakayorwania, bakayoira amo nebichie biaye, bakabang’anyia Abaamori bamenyeteo.
ⅩⅩⅩⅢ Abaisraeli bakairana, bagaetera ase enchera yarenge kogeenda Basani. Ogi, omorwoti o Basani, agacha amo nabarwani baye korwania Abaisraeli agwo Edirei.
ⅩⅩⅩⅣ Korende Omonene agateebia Musa, “Tobaisa komoiroka, ekiagera namobekire ase okoboko kwao, ere amo n’abanto baye bonsi, na ense yaye. Aye goika omokore buna gwakorete Sihoni, omorwoti bw’Abaamori, oria omenyete agwo Hesiboni.”
ⅩⅩⅩⅤ Abaisraeli bagaita Ogi, bagaita nabana baye abamura, na abanto baye, goika tibatigaria nonya nomonto oyomo ore moyo. Erio bakayeira ense yaye ekaba eyabo.