ⅩⅩⅩⅣ
Chimbebe Chi’echingongo
Ⅰ Omonene agakwana na Musa, akamoteebia,
Ⅱ “Kwana n’Abaisraeli, obachiike: Ekero moraike ase ense ya Kaanani, eyio nero ense erabe omwando oino, chimbebe chiaye nigo chirabe iga:
Ⅲ Ensemo ya Irianyi, ense yaino eike ase erooro ya Sini, egenderere gochia ase orobebe rwa Edomu. Orobebe rwaino rwa Irianyi rochakere ensemo ya moocha ase ensinyo y’Enyancha y’omonyoo,
Ⅳ naende roonchoke gochia Irianyi y’egetunwa ki’Ebiuge roetere Sini, Irianyi ya Kadeshi‐Barinea. Korwa agwo rogenderere roike Hasari‐Adari, naende roete roike Asimoni,
Ⅴ na korwa agwo Asimoni rogenderere kobwatia orooche rw’orobebe rwa Misiri, roike Enyancha Enene.
Ⅵ “Enyancha Enene nero erabe orobebe rwaino rwa bosongo.
Ⅶ “Orobebe rwaino rwa sugusu ’ndochakere korwa ase Enyancha Enene, rogenderere gochia ase egetunwa kia Hori.
Ⅷ Korwa aroro rogenderere roike enchera ekogeenda Hamati, erio naende rogenderere goikera Sedadi,
Ⅸ naende rogenderere gochia Sifuroni, na korwa aroro roike Hasari‐Enani. Oro narwo orobebe rwaino rwa sugusu.
Ⅹ “Orobebe rwaino rwa moocha rochakere korwa Hasari‐Enani, roikere Sefamu,
Ⅺ naende rotirimboke gochia Ribula, moocha y’Aini, rotirimboke gochia moocha y’engegu y’enyancha ya Galili.
Ⅻ Erio rotirimboke robwatie orooche rwa Yorodani rotwomere Enyancha y’omonyoo. Eye nero erabe ense yaino, ne chimbebe chiaye chietanaineo.”
ⅩⅢ Musa agachiika Abaisraeli, akabateebia, “Eyio nero ense morarie ebe omwando oino ase ogoaka obomera, ense eri’Omonene achiikire ng’a n’ebe ey’ebisaku kianda na ekeng’ese.
ⅩⅣ Abanto b’egesaku kia Rubeni na ab’egesaku kia Gadi amo nekeng’ese ki’egesaku kia Manase, barabwo konya banyorire omwando obo.
ⅩⅤ Abanto b’ebisaku ebio bibere na ekeng’ese, barabwo konya banyorire omwando obo moocha ya Yorodani, kororia Yeriko.”
Abaraai Abagochia Gwatanana Ense
ⅩⅥ Omonene agakwana na Musa, akamoteebia,
ⅩⅦ “Abanto aba nabwo bagochia kogokonya gwatanana ense: Ritang’ani Eleazari Omokuani, na Yoshua, mosinto o Nuni.
ⅩⅧ Naende ochore omoraai oyomo korwa ase kera egesaku aoboseemia gwatanana ense eria.”
ⅩⅨ Aba nabwo abanto bachoretwe.
Korwa ase egesaku kia Yuda, Kalebu, mosinto o Yefune.
ⅩⅩ Korwa ase egesaku gia Simioni, Semueli, mosinto bw’Amihudi.
ⅩⅪ Korwa ase egesaku kia Benjamini, Elidadi, mosinto o Kisiloni.
ⅩⅫ Korwa ase egesaku gia Dani, Buki, mosinto o Yogili.
ⅩⅩⅢ Korwa ase basinto ba Yusufu; ase egesaku kia Manase, Hanieli, mosinto o Efodi.
ⅩⅩⅣ Korwa ase egesaku kia Efraimu, Kemueli, mosinto o Sifutani.
ⅩⅩⅤ Korwa ase egesaku gia Sabuloni, Elisafani, mosinto o Parinaki.
ⅩⅩⅥ Korwa ase egesaku gia Isakaru, Palitieli, mosinto bw’Asani.
ⅩⅩⅦ Korwa ase egesaku gi’Aseri, Ahihudi, mosinto o Selomi.
ⅩⅩⅧ Korwa ase egesaku kia Nafutali, Pedaheli, mosinto bw’Amihudi.
ⅩⅩⅨ Abanto aba nabw’Omone ne achiigete baatanane ense ya Kaanani ebe emiando y’Abaisraeli.