Ⅸ
Epasaka Ase Erooro
Ⅰ Ase omotienyi bw’eritang’ani, bw’omwaka o kabere, ekero Abaisraeli baruure ense ya Misiri, Omonene agakwana na Musa agwo ase erooro ya Sinai, akamoteebia,
Ⅱ “Abaisraeli goika barende rituko ri’Epasaka ase engaki echiikire.
Ⅲ Ase rituko ria ikomi na kane ri’omotienyi oyo, chinsa chia mogoroba, ’namorende rituko erio ase engaki echiikire koreng’ana n’emeroberio eria yachigetwe.”
Ⅳ Ase igo Musa agateebia Abaisraeli ng’a barende rituko rinene ri’Epasaka.
Ⅴ Na abanto bagakora bo, bakarenda rituko riria rinene ri’Epasaka agwo ase erooro ya Sinai, ase rituko ria ikomi na kane riomotienyi bw’eritang’ani, chinsa chia mogoroba. Abaisraeli bagakora amang’ana onsi buna Omonene achiigete Musa.
Ⅵ Korende ’mbarengeo abanto gete konya besoyirie ase ogotacheneka ase ogokuna egetondo. Barabwo tibanyarete korenda rituko ri’Epasaka ase rituko riria. Ase ayio bakageenda ase Musa na Aroni ase rituko riria,
Ⅶ bakabateebia, “Intwe nigo twabeire abatachenegeti ase ogokuna egetondo. Inee! Ninki kiagera twatangirwe titorua okoruegwa ase Omonene ase engaki Abaisraeli bachiikire komoruera okoruegwa kwabo?”
Ⅷ Musa akabateebia, “Ganya, inyigwe ay’Omonene arachiike igoro yaino.”
Ⅸ Omonene agateebia Musa,
Ⅹ “Kwana n’Abaisraeli obateebie: Onye omonto onde oino, gose oyo bw’ororeria rwaino, obeire oyotachenegeti ase ogokuna egetondo, gose nigo are aare ase orogeendo, na onye origetie korenda rituko ri’Epasaka y’Omonene,
Ⅺ nigo ararirende ase rituko ria ikomi na kane, chinsa chia mogoroba ase omotienyi o kabere. Narie emanwa y’eng’ondi y’Epasaka amo n’emagaati etabekiri ememera, ne chinyeni chindoro.
Ⅻ Tabaisa gotigaria nonya n’ensinini ye chinyama echio goika rituko ria kabere, gose tabuna riuga nonya nerimo ri’emanwa eria. Narende rituko riria rinene ri’Epasaka koreng’ana nemeroberio eria yachiigetwe.
ⅩⅢ Korende omonto ochenegete gose otakari aare ase orogeendo, oretange tarenda rituko ri’Epasaka, omonto oyio naatananwe korwa ase abanto baye, ekiagera ere tarenteti okoruegwa kwaye ase Omonene ase engaki eria echiikire. Okomocha kw’ebibe kw’omonto oria ’nkobe igoro yaye.
ⅩⅣ “Onye omomenyi omenyete ase egati yaino bwanchete koria Epasaka y’Omonene nigo arakore koreng’ana nemeroberio eria yachiigetwe. Mobe nogochika okomo ase omomenyi na ase omobiare.”
Riire Igoro y’Obomenyo Obochenu
(Okong’ 40:34-38)
ⅩⅤ Ase rituko erio Obomenyo boria Obochenu bwatenenetigwe, riire rigatuba Obomenyo obwo, engencho yaye Eema y’Oborori.
Na korwa mogoroba goika mambia riire riria rikarorekana rire buna omorero.
ⅩⅥ Naboigo riire riagendererete botambe gotuba Obomenyo boria Obochenu; ase obotuko rirorekana rire buna omorero.
ⅩⅦ Ekero kende gionsi riire riria riarenge koimokerera igoro korwa ase Eema eria, erio Abaisraeli nigo barenge komanora, bachaaka orogeendo rwabo. Na aase riire riria riarenge gotenena, aroro agwo nao Abaisraeli barenge gotoora.
ⅩⅧ Ase ogochika kw’Omonene nigo baare gochaaka orogeendo, na ase ogochika kwaye nigo baare gotoora. Engaki yonsi riire riria riagendererete kobeera igoro ase Obomenyo boria, abanto nigo baare kogenderera kobeera ase egetwori.
ⅩⅨ Onye riire riria riarenge kobeera igoro ase Obomenyo boria amatuko amaange, Abaisraeli nigo baigwerete Omonene, na barabwo tibarenge komanora kogeenda.
ⅩⅩ Ase chingaki chinde riire riria nigo riarenge kobeera igoro ase Obomenyo boria amatuko amake oka. Bun’Omonene achiigete, abanto nigo baare kobeera ase egetwori, naende ekero Omonene arenge kobachiika, bachaaka kogeenda ase orogeendo rwabo.
ⅩⅪ Chingaki chinde riire riria nigo riarenge kobeera igoro ase Obomenyo boria korwa mogoroba goika mambia rioka. Ekero kende gionsi riire riarenge koimokerera igoro, abanto nigo barenge gochaaka orogeendo rwabo. Onye riarenge kobeera agwo omobaso na obotuko goika ekero riarenge koimokerera igoro naende, abanto nigo barenge gochaaka orogeendo ekero ekio.
ⅩⅫ Onye riire riarenge kobeera igoro ase Obomenyo boria amatuko abere, gose omotienyi oyomo, gose engaki entambe, Abaisraeli nigo barenge kobeera ase egetwori, tibarenge komanora kogeenda, korende ekero riire riaimokereire igoro, barabwo nigo barenge gochaaka orogeendo.
ⅩⅩⅢ Bun’Omonene arenge gochiika nigo barenge gotoora, batiga orogeendo, gose baimoka bachaaka orogeendo. Bakaba bakoigwera Omonene buna achiigete goetera ase Musa.