RIRUUBE RIA KABERE RIA
PETERO
Ogochaakera
Riruube riakabere ria Petero nigo riarikeire ekeombe ekenene kia’baKristo b’ekanisa yeritang’ani. Ekerenga ekenene nogotanga okogenderera kwa’morokererio yoborimo ayio are kwegerigwa n’abanto b’ebisaku abwo konya babeire abakristo korende konya bataratiga chingencho chiabo chi’ebibe (2:20-21). Omoriki nigo agotogonyera ebibe buna obotomani obwo bwagendererete gokoreka ase abakristo.
Omoriki nigo agotebia abasomi baye buna eriogo rioka riomochando obo nokobwata chisemi chi’ekeene kia Nyasae na Kristo, chisemi echio chiaretetwe nabwo barenge na Yeso ekero arenge ase ense, abwo bamoigwete gakoegeria, boigo bagataara nere na komenya nere. Boigo omoriki nigo agokwanera amang’ana igoro yokoirana eriakabere kwa Yeso. Abanto mbare bare kwegeria buna Kristo tari koirana boigo na kogambigwa tikori gocha kobao. Nigo akobamanyia buna ogoteebana gwokoirana gwa Kristo nase engencho Nyasae are omonge bw’amabera atarigeti monto onde bwensi asire korende bonsi baikere ogotoreka gwa kare na kare (3:9).
Okobagwa kw’egetabu eke
Ogochaakera 1:1-2
Okorangerigwa kw’Omokristo 1:3-21
Aborokia b’oborimo 2:1-22
Ogocha gwa Kristo kw’omoerio 3:1-18
Ⅰ
Ⅰ Korwa ase Simioni Petero, omosomba na omotomwa o Yeso Kristo, gocha ase baria abamwanyorire okwegena okomo naintwe, okore kwe rigori rinene, goetera ase oboronge bwa Nyasae na Omotooria oito Yeso Kristo.
Ⅱ Obuya na omorembe bimenteke ase more ase okomomanya Nyasae na Yeso, Omonene oito.
Okorangeria na ogochora kwa Nyasae
Ⅲ Okobua kw’obonyasae bwaye gwatoeire ebinto bionsi ebire nobogima na ebie chingencho chi’obonyasae ase okomomanya ere oyotorangeretie ase obonene bwaye obonyene, na okobua kwaye.
Ⅳ Ase ebinto ebio otoeire chiira chinene mono, echie rigori rinene, erinde ase echio monyare koba ababwatani be chingencho chia Nyasae, na gotama ogosaria gw’okogania okobe kore ase ense eye.
Ⅴ Naki ase engencho eyio eyio kora omokia mono, erinde ase okwegena kwaino momente obuya, na ase obuya chisemi,
Ⅵ na ase chisemi obweriti, na ase obweriti oboremereria, na ase oboremereria chingencho chi’obonyasae,
Ⅶ na ase chingencho chi’obonyasae obwanchani bw’obomino, na ase obwanchani bw’obomino mwanche bonsi.
Ⅷ Naki amang’ana aya karabe ime yaino na komenteka, nabakore timoba aboro gose abanto motari nokwama, ase okomomanya Omonene oito Yeso Kristo.
Ⅸ Naki ere oyotari namang’ana ayio nomouko, takonyara korora amang’ana are bosio, na bwebire ogosibigwa kw’ebibe biaye bia kare.
Ⅹ Ase ayio, abaminto, kora omokia kobua gokora okorangerigwa kwaino na ogochorwa kwaino kobe goteneine bokong’u, naki komorakore ayio, timokogwa nonya ng’ake.
Ⅺ Naki nigo moraegwe ribaga rinene mono ri’ogosoa ase oborwoti bwa kare na kare Omonene na Omotooria oito Yeso Kristo.
Ⅻ Ase ayio, tinkomocha kobainyoria amang’ana ayio botambe, nonya moyamanyete na mwabekirwe chinguru ase ekeene ekio mwanyorire.
ⅩⅢ Inche narorire ng’a mboronge kobatura ase okobainyoria ayio ekero imenyete ase obomenyo obo bw’omobere.
ⅩⅣ Nimanyete ng’a amatuko ng’ang’e are ndarue ase obomenyo obo. Aya naro Omonene oito Yeso Kristo anyorogetie.
ⅩⅤ Na inche ninkore omokia ng’a botambe magega y’ogokwa kwane monyare koinyora amang’ana aya.
Kirori ba maiso barore ase obonene bwa Kristo
ⅩⅥ Naki titokobwatia emegano yarengereretigwe ne chisemi chi’obong’ainereria, ekero twabamanyetie okobua kw’Omonene oito Yeso Kristo na ogocha kwaye, korende intwe abanyene nigo twarenge abarori b’obonene bwaye.
ⅩⅦ Naki ere nigo anyorete ogosikwa na obonene korwa ase Nyasae Tata, na eriogi riachete asare korwa ase obonene bw’Obonene, rigoteeba, “Oyo nere Omwana one omwanchwa, ngokirie nere.”
ⅩⅧ Na eriogi eri nario twaigwete rikorwa igoro, ekero twarenge amo nere ase egetunwa egechenu.
ⅩⅨ Intwe ntore ne ring’ana riria ri’obobani riteneine bokong’u kobua, na inwe inamokore buya komorategerere na koribwata buna etaya ekomoreka aase omosunte ore, goika ekero bogokia, na eng’enang’eni ya mambia eoroke ase chinkoro chiaino ime.
ⅩⅩ Ritang’ani momanye ring’ana eri, ng’a obobani bonde tibori ime ase amariiko bwaorogetigwe koreng’ana buna omonto anchete omonyene,
ⅩⅪ ekiagera obobani tibwarentetwe engaki ende yonsi ase ogwancha kwa Mwanyabaanto, korende abanto abachenu ba Nyasae nigo baare gokwana batang’anire n’Omoika Omochenu.