RIRUUBE RIA PAULO OMOTOMWA ASE
ABAFILIPI
Ogochaakera
Riruube ria Paulo ase Abafilipi nigo riarigetwe gochia ase Ekanisa entang’ani eyio Paulo achagete ase riroba ria Yuropa, ase orogongo rwa Rumi ya Makedonia. Riruube eri nigo riarigetwe ekero omotomwa arenge ase echera, na nigo yarenge engaki ekero omotomwa oyo abwate omochando igoro y’okong’usanana kwarenge gati yeye n’abakristo bande abwo barenge abakoreri b’enchiri, boigo nigo achandegete ase omoyo oye igoro y’amorokerio y’oborimo ase ekanisa ya Filipi. Nonya nabo riruube eri nigo riaretete omogoko nomoremu ebio biranyare gokwanerwa buya na Paulo oyio obwate okwegena kwabene ime ya Yeso Kristo.
Eganga enene yeriruube eri goakera abakristo ba Filipi ng’a mbuya mono ase engencho yekeegwa ekio bamotomerete kemokonye ase chingaki arenge nokogania. Nigo akoira ribaga eri kobaenekeria, erio batware oboremu nonya bonsi babwate emechando. Nigo akobasorora batware embwa ya Yeso, ribaga ri’okoragwa n’okogania okobe n’bwerori. Nigo akobainyoria buna obogima bwabo ime ya Yeso Kristo nigo bore ekeegwa ki’obuya bwa Nyasae ekio banyorire goetera ase enchera y’okwegena, korende tari goetera ase okoigwera emeyega y’amachiiko y’Abayahudi. Nigo akoriika igoro y’moogoko n’omorembe ebio Nyasae akorwa gochia ase baria bamenyete ime ya Kristo.
Riruube eri nigo rimanyekanete ase engencho rikobeka amang’ana akobwatia chinguru, omogoko, oboremu, obomo, n’oboremereria ase obogima n’obwegenwa bw’obokristo. Boigo nigo rigotworokia riyianda Paulo abwate ase ekanisa ya Filipi.
Okobagwa kw’egetabu eke
Ogochaakera 1:1-11
Okogania gwa Paulo bweka omonyene 1:12-26
Obogima bw’okoba ime ya Kristo 1:27—2:18
Emeroberio ase Timotheo na Epafrodito 2:19-30
Ogokuurerwa gw’okwerenda korwa ase ababisa na amabe 3:1—4:9
Paulo na ababisa baye b’Abafilipi 4:10-20
Ogokoorera 4:21-23
Ⅰ
Ⅰ Korwa ase inche Paulo na Timotheo, abasomba ba Kristo Yeso, gochia ase abanto bonsi ba Nyasae abamomenyete Filipi aba mwabwatanigwe na Kristo Yeso, amo nabatang’ani na abakoonyi ase ekanisa.
Ⅱ Obuya bobe ase more n’omorembe bikorwa ase Nyasae Tata oito, na ase Omonene Nyasae Yeso Kristo.
Paulo ogosabera Abafilipi
Ⅲ Igo nkomoakera Nyasae one ng’a mbuya mono chingaki chionsi nkobainyora,
Ⅳ ekiagera botambe ase ogosaba kwane nigo nkobasabera inwe mwensi nomogooko,
Ⅴ ase engencho y’okobwaterana kwaino ase enchiri korwa rituko rie ritang’ani goika reero iga.
Ⅵ Ninde nobomaene, ng’a Nyasae oyochagete emeremo emiya ase emioyo yaino ime nayeikeranie goika rituko riria ria Kristo Yeso.
Ⅶ Igo bore boronge ase ’nde korengereria aya igoro ase more mwensi, ekiagera nababogoirie inwe ase enkoro yane ime. Naki ase ogosibwa kwane na ase emeremo y’okorwanerera enchiri na koyeorokia ng’a ero nechinguru, na inwe mwensi mwabwatanire nainche ase obuya obo naeirwe.
Ⅷ Naki Nyasae nere kirori one, buna ’nde namaiga ase more mwensi nobwanchani bokorwa ase Kristo Yeso.
Ⅸ Oko nakwo ogosaba kwane, ng’a obwanchani bwaino bomenteke, bobe obonge mono ase okomanya kw’ogwatanana gwonsi,
Ⅹ erinde monyare komanya ayare amaya, naende mobe n’chinkoro chindemu, motari na komocha ase rituko ria Kristo.
Ⅺ Mwaichoirwe n’okwama kw’oboronge ase enchera ya Yeso Kristo, ase obonene na ogotogigwa kwa Nyasae.
Okoba moyo n’Kristo
Ⅻ Korende baminto, nimbamanyie ng’a amang’ana aria onsi anyorete, abeire ase okogendereria gw’enchiri.
ⅩⅢ Ase igo amanyekanire ase abarendi bonsi b’omorwoti, na ase abande bonsi ng’a nasibirwe ase engencho ya Kristo.
ⅩⅣ Na abange ase abaminto abare ase Omonene Nyasae babeire n’okoremigwa ase engencho y’ogosibwa kwane, bamentekanire n’oboremu gokwana ring’ana ria Nyasae batari nobwoba.
ⅩⅤ Abande nigo bakorandia Kristo bare n’emoko n’eriomana, korende abande ase omoyo omuya,
ⅩⅥ abwo ase obwanchani, bamanyete ng’a nabekirwe ase okorwanerera enchiri.
ⅩⅦ Aba bakoraria Kristo ase esuugu gose tari ase omoyo omorabu, bakorengereria komenta obororo bwane ase ogosibwa kwane.
ⅩⅧ Inki rende? Nonya nabo, ase kera enchera Kristo nigo arararigwe, ase obong’ainereria gose ase ekeene, na ase ayio nagokire.
ⅩⅨ Ee, ningooke, ekiagera namanyire ng’a aya nang’onchokere koba ase ogotooreka kwane, goetera ase ogosaba kwaino na ase ogokonya kw’Omoika o Yeso Kristo.
ⅩⅩ Ninde nokoganyererera okonene n’ogosemeria ng’a tingosookigwa ase enchera ende yonsi, korende ase oboremu bwane bwonsi, bono buna botambe, Kristo naegwe ogosika ase omobere one, keraabe ase obogima gose ase ogokwa.
ⅩⅪ Naki ase ’nde inche, okoba moyo n’Kristo, na ogokwa nokonyora amange.
ⅩⅫ Korende onye nkoba moyo ase omobere, aya nigo akondetera okwama kw’emeremo yane; gaki eri ndigetie gochora, tindimanyeti.
ⅩⅩⅢ Nimigire mono ase egati y’amang’ana aya abere. Okogania kwane nigo kore ng’a ngende komenya amo na Kristo; ekiagera aya namaya kobua.
ⅩⅩⅣ Korende gotigara ase omobere nkogwenerete kobua ase engencho yaino.
ⅩⅩⅤ Ekiagera inde nobomaene ase aya, namanyire ng’a nintigare na kogenderera amo nainwe mwensi, na inwe momenteke na kogoka ase okwegena,
ⅩⅩⅥ erinde ogwetogia kwaino ase engencho yane konyare komenteka ase Kristo Yeso, ase engencho y’okoba kwane amo nainwe naende.
ⅩⅩⅦ Korende orogendo rwaino robe buna egwenerete enchiri ya Kristo, erinde onye ngocha kobarora inwe, gose tinkobao, nyigwe amang’ana aino ng’a moteneine bokong’u ase omoika oyomo, na ase omoyo oyomo mokorwanerera okwegena more nakwo ase enchiri amo.
ⅩⅩⅧ Timoiroka abwo bakobaengereria ase ing’ana rinde rionsi. Eke nekemanyererio ase ogosira kwabo, korende ase more inwe nekemanyererio ki’ogotooreka. Eke nigo gekorwa ase Nyasae.
ⅩⅩⅨ Ekiagera ase engencho ya Kristo mwaeirwe, tari okomwegena gwoka korende nogochandwa boigo ase engencho yaye.
ⅩⅩⅩ Na inwe nabo more nokorwanerera koria koria mwaroche ase ’nde, na koigwa ng’a ninde nakwo goika bono.