ⅩⅩⅩ
Amang’ana y’Aguri, mosinto o Yake o Masa
Ⅰ Aya naro amang’ana y’Aguri, mosinto o Yake o Masa.
Omonto oyio agateebia Itieli na Ukali:
Ⅱ Ekeene, inche nigo inde omoriri otagwenereti korokwa omonto,
gose timbwati obomanyi bwa Mwanyabaanto.
Ⅲ Inche tineorokereretie obong’aini,
erinde imomanye oyore Omochenu.
Ⅳ Ning’o oriinete gochia igoro na goika gocha aa inse?
Ning’o osangereirie omwaga ase enkundi yaye?
Ning’o obwatire amaache na koyaboa ase eanga yaye?
Ning’o okong’etie chinsinyo chionsi chi’ense?
Inaki oyio akorokwa, na omwana oye naki akorokwa?
Nteebia onye koyamanyete!
Ⅴ Kera ring’ana ria Nyasae nigo rienekirie ng’a neri’ekeene. Ere nenguba ase abwo bakomotamera, barendwe.
Ⅵ Tobaisa komenta kende ase amang’ana aye, nigo arabaise kogotogonyera, naye obe omonyaborimo.
Emebayeno ende
Ⅶ Amang’ana abere naro nagosabire, toyandina ntarakwa.
Ⅷ Orusie korwa ase ’nde ayare abosa na oborimo. Tobaisa kong’a obotaka gose obotenenku, korende ong’e endagera engwenerete.
Ⅸ Oise konyigotia mono, nigo ’ndakwange ’nteebe, “Omonene nere ng’o?” Gose inse koba omotaka nigo ’ndabaisa koiba na ’ndetere erieta ria Nyasae one obosooku.
Ⅹ Tobaisa kogenka omosomba ase omonene oye, nigo arakoragererie, erinde obe nokomocha.
Ⅺ Ekegori ’nkere gekoragereria abaise na tikeri gosesenia abaang’ina.
Ⅻ Abanto ’mbare bakwerora ng’a nabaikeranu bare, korende tibachenegeti korwa ase obobe bwabo.
ⅩⅢ Abanto ’mbare bagwekaga ng’a nabaya bare na korigereria namaiso aichire nobomwenu.
ⅩⅣ Abanto ’mbare babwate amaino anga emioro, ne chintakunero chi’amaino abo nigo chinga emeyio; barabwo nigo bakoria na gosiria abataka bare ase ense; nigo bakoura abaremeire bare ase abanto.
ⅩⅤ Rikorominyo ’ndibwate abaiseke babere; barabwo nigo bakorangeria, “Toe, toe!”
Mbire ebinto bitato bitari goisaneka; ee, mbire bine bitari goteeba ng’a biaisanekire, nabio ebi;
ⅩⅥ aase abakuure, na enda engomba,
ne riroba rirang’ete amaache, na omorero.
Ebio tibiana goteeba, “Twaisanekire.”
ⅩⅦ Eriso ri’omonto ogochecheria ise na gochaaya ng’ina ndirusigwe nebigonkoru bie rigoko na ririegwe namage ye chinsoti.
ⅩⅧ Ebinto mbire bitato bire bi’ogokumia ase ’nde; ee, mbire bine ebio ’ntamanyeti, nabio ebi:
ⅩⅨ enchera y’ekeongo igoro,
na ey’eng’iti igoro ase egetare,
na ey’emeeri igoro ase amaache y’enyancha,
na enchera omosacha akobua omoiseke.
ⅩⅩ Eyio nenchera y’omokuungu omotomani: Nigo akoria na otinyia omonwa oye, erio oteeba, “Inche tindakora bonyaka bonde.”
ⅩⅪ Nare amang’ana atato akonyegeria ense, ee, nare ane etanyaare koyaremereria, naro aya:
ⅩⅫ Ekero omosomba akoba omorwoti,
na omonto omoriri akoigota endagera,
ⅩⅩⅢ na ekero omoiseke otanchiri akonyuomwa,
na omoiseke omosomba akoira ribaga ri’omokuungu oria agokorera emeremo.
ⅩⅩⅣ Mbire ebinto bine ebisinini mono ase ense, korende bire n’obong’aini obonge, nabio ebi:
ⅩⅩⅤ Amage nigo are ebitongwa bitari ne chinguru,
korende nigo akogaacha endagera yabo agocha koria engaki y’egurugura.
ⅩⅩⅥ Ebisengi tibibwati chinguru,
korende nigo bikoroisia ase bikomenya ase ebitare ime.
ⅩⅩⅦ Chingige tichibwati omorwoti,
korende nigo chikogeendera amo emegaanda ase emegaanda.
ⅩⅩⅧ Ensagara nabo erabogorigwe nokoboko kw’omonto,
korende nabo ekomenya ase chinyomba chi’abarwoti.
ⅩⅩⅨ Mbire ebinto bitato bikogokia ase ogotaara kwabo, ee, mbire bine bire nogotaara okuya, nabio ebi.
ⅩⅩⅩ Endo ere ne chinguru chinyinge kobua ching’iti chinde, na teri kwoboigwa na ng’iti ende,
ⅩⅩⅪ na etuoni egwesigoria, na egoree,
na omorwoti okoraa abarwani baye b’esegi.
ⅩⅩⅫ Onye kwabeire omoriri na kweimokereirie igoro, gose onye kwabeire gokorengereria amabe, beeka okoboko kwao ase omonwa oo, oyotube.
ⅩⅩⅩⅢ Amabeere agotundwa nigo akorua amaguta, na okomintontoria emioro, amanyinga nigo akoruerao. Naboigo ogoseegeta na koba nendamwamu, ayio nigo akorenta okorwana.