ⅭⅩⅧ
Ogoaka ng’a mbuya mono ase engencho y’obobui
Ⅰ Moakere Omonene ng’a mbuya mono,
ekiagera ere nomuya;
obwanchani bwaye nigo bogendererete goika kare na kare.
Ⅱ Tiga Abaisraeli bateebe,
“Obwanchani bwaye nigo bogendererete goika kare na kare.”
Ⅲ Tiga abanto b’enyomba ya Aroni bateebe,
“Obwanchani bwaye nigo bogendererete goika kare na kare.”
Ⅳ Tiga abanto abwo bairogete Omonene bateebe,
“Obwanchani bwaye nigo bogendererete goika kare na kare.”
Ⅴ Ekero nareenge n’emechando nkamorangeri’Omonene;
nere akang’iraneria, akambeeka aase aagare.
Ⅵ Omonene kare ase ensemo yane, tinkonyaara kwoboa.
Mwanyabaanto onde bwensi ninki aranyare gonkorera?
Ⅶ Omonene nigo are ase ensemo y’abarwanereri baane;
ningoke ase engencho yokobugwa kw’abwo bangeechete.
Ⅷ Nigo ere buya komotamera Omonene,
kobua gosemeria Mwanyabaanto.
Ⅸ Nigo ere buya komotamera Omonene
kobua gosemeria omonyamwando bw’obogaambi.
Ⅹ Abanto b’ebisaku bionsi nigo bang’etananete kondwania,
korende ase erieta ri’Omonene ’nkabasiria.
Ⅺ Nigo bamboerete korwa chinsinyo chionsi,
korende ase erieta ri’Omonene nkabasiria.
Ⅻ Nigo bang’umokerete buna chinchoke,
korende bakarima buna omorero bw’amagwa;
ase erieta ri’Omonene ’nkabasiria.
ⅩⅢ Nigo natwometwe bokong’u ng’a ingwe,
korende Omonene agankonya.
ⅩⅣ Omonene nere chinguru na omoegereri one,
ere obeire ogotooreka kwane.
ⅩⅤ Tegerera moigwe amateera y’omogooko igoro y’ogotoreka,
ayio akorwa ase chiema ase abanyene oboronge bamenyete, agoteeba,
“Okoboko gw’okorio kw’Omonene nigo kogokora amang’ana y’ogokumia.
ⅩⅥ Okoboko gw’okorio kw’Omonene nigo koimokererete igoro,
ee, okoboko gw’okorio kw’Omonene nigo kogokora amang’ana y’ogokumia.”
ⅩⅦ Inche tingokwa, korende nimbe moyo,
erio ning’iranerere amakumia a Omonene.
ⅩⅧ Omonene obeire okong’a egesusuro ekenene gi’okondongeyia,
korende tang’ereretie gochia ase amakweri.
ⅩⅨ Inyigorere ebiita bi’oboronge,
erio insoe aroro ase okoiraneria ng’a mbuya mono ase Omonene.
ⅩⅩ Eke nakio egeita kia Omonene,
agwo nao abanyene oboronge barasoere.
ⅩⅪ Nagoakeire ng’a mbuya mono, ekiagera kwanyiguure,
naende kwabeire ogotooreka kwane.
ⅩⅫ Rigena riria abaagachi bangete
riabeire rigena rinene ri’ekoona.
ⅩⅩⅢ Ring’ana eri nigo riarure ase Omonene,
eri neriogokumia ase amaiso aito.
ⅩⅩⅣ Rituko eri nario Omonene akorire,
tiga tobe n’omogooko, tochenge ase rirorio.
ⅩⅩⅤ Aye Omonene, twagosoroire ototoorie!
Omonene, twakogarameire, toe obobui!
ⅩⅩⅥ Nasesenirie oyio ogoocha ase erieta ri’Omonene!
Intwe nigo tokobasesenia korwa ase enyomba ya Nyasae.
ⅩⅩⅦ Omonene nere Nyasae, ere otorabeirie ensaakia.
Bogoria chinsagia chi’emete, mochaake rituko rinene,
moroobere gochia ase egesasiimero kere n’emegwekano ye ching’unchara!
ⅩⅩⅧ Aye naye Nyasae one, nimbe ’nkogoakera ng’a mbuya mono;
Nyasae one, nimbe nkona‐gokobaka.
ⅩⅩⅨ Moakere Omonene ng’a mbuya mono, ekiagera ere nomuya,
na obwanchani bwaye nigo bogendererete goika kare na kare.