ⅭⅩⅩⅫ
Ogotogia Obomenyo Omonene
Ⅰ Aye Omonene, oinyore Daudi, ase engencho y’obokong’u bwonsi bwamonyoorete.
Ⅱ Oinyore buna ariete eira na gotiana
asore aye Omonene ore Chinguru chia Yakobo, agateeba,
Ⅲ “Tingosoa nyomba mwane,
gose tinkoriina borere korara;
Ⅳ tingwancha korara chitoro, gose gosundoka,
Ⅴ goika inyore aase,
agwo arabe obomenyo bw’Oyore Chinguru chia Yakobo.”
Ⅵ Ama! Agwo Efarata tokaigwa amang’ana igoro y’Esanduki y’Okobwatana,
tokayenyora aaria ase orosana rwa Yearimu.
Ⅶ “Inchuo togende ase obomenyo bw’Omonene,
tosasiime agwo ase egeteni kiaye kia amagoro!”
Ⅷ Aye Omonene, imoka ochiche aase ao ogotimokera,
aye amo n’Esanduki eria ekworokia okobua kwao.
Ⅸ Tiga abakuani bao beboyie oboronge,
na abanto bao abachenu babe bagoaka amariogi y’omogooko.
Ⅹ Ase engencho ya Daudi, omosomba oo,
tobaisa kwanga korigereria omoakwa amaguta oo.
Ⅺ Aye Omonene, tokonyaara gotiga eira eyio
kwarierete Daudi ase ogotiana, ogateeba:
“Oyomo bw’oroiboro rwao
nimobeeke aikaranse ase ekerogo kiao ki’obogaambi.
Ⅻ Abana bao kobarabwate okobwatana kwane kw’ogotianania,
na oborori bwane ’ndaborokererie,
rirorio abana baabo boigo ’mbabe bagoikaransa ase ekerogo kiao ki’obogaambi
kogenderera botambe.”
ⅩⅢ Omonene ochorire Sayoni;
nigo aganetie obe obomenyo bwaye, oteebire,
ⅩⅣ “Aase aa nao obotimokero bwane bwa botambe,
aa nao ’ndabe ’nkomenya, ekiagera naanchire.
ⅩⅤ Ninsesenie omochie oyo obe n’ebinto bionsi biganeirie,
abaremeire endagera nimbaigotie.
ⅩⅥ Nimboyie abakuani b’omochie oyo nogotooreka,
na abachenu baye ’mbabe bagoaka amariogi y’omogooko.
ⅩⅦ Aroro agwo nimererie Daudi orogunchara,
ekiagera nimwokerie omoakwa amaguta one etaya.
ⅩⅧ Ninsookie ababisa baye kegima,
korende egutwa y’omotwe oye omonyene negenderere komekameka.”