ⅭⅩⅩⅩⅨ
Nyasae nigo amanyete onsi na nigo are aande onsi
(Ogoteera gwa Daudi)
Ⅰ Aye Omonene kwariga‐rigirie ime yane, kwamanyire inche.
Ⅱ Aye nigo omanyete ekero ing’ikaransete, na ekero ’nkoimoka.
Nigo omanyete ebirengererio biane bionsi kore aare.
Ⅲ Ekero ’ngotaara gose kondaire nigo omanyete;
aye nigo omanyete chinchera chiane chionsi.
Ⅳ Nonya nekero ’ntarakwana ring’ana rinde rionsi,
Naama, aye Omonene nigo orimanyete kegima.
Ⅴ Aye nigo ong’etanaine ase chinsemo chionsi,
na nigo obegete okoboko kwao igoro yane ondendete.
Ⅵ Okomanya okwo nigo kore okw’ogokumia ase ’nde;
nigo kore okonene mono, tinkonyaara gokomanya.
Ⅶ Ng’ai ’ndagende, erinde ntigane n’Omoika oo?
Gose ng’ai ’ndatame gochia, ’ndue ase obosio bwao?
Ⅷ Ninsa koriina gochia igoro, aye nao ore;
ninsa kwara ekerarero kiane agwo aase abakuure, aye nao ore.
Ⅸ Ninsa koirurukigwa namasase a mambia,
ingende komenya ase chinsinyo chi’enyancha,
Ⅹ nonya naroro okoboko kwao ’nkondaae,
ee, okoboko kwao gw’okorio ’nkombwate.
Ⅺ Ninsa goteeba, “Tiga omosunte ontube kegima,
na oborabu bong’etanaine boonchoke bobe omosunte”,
Ⅻ nonya nomosunte tori omosunte asore,
obotuko nigo bokoraba se, bwaba buna omobaso, asore omusunte na oborabu nigo bigwekaine.
ⅩⅢ Naye gwatongete ebire ase enda yane ime,
nigo kwambwatanetie amo ase enda ya baba.
ⅩⅣ Nigo ’nkogotogia, ekiagera natongetwe ase enchera y’ogokumia,
na ey’ogoichania.
Ogokora kwao nigo kore okuya kw’ogokumia!
Igo nimanyete amang’ana ayio buya ase omoyo one.
ⅩⅤ Amauga y’omobere one tabisekanete asore,
ekero natongetwe bobisi,
ekero nabombetwe ase ense ime.
ⅩⅥ Amaiso ao nigo andoche ekero nareenge inche ase enda ya baba ime,
amatuko aane onsi nigo arigetwe ase egetabu yao,
na akaroberigwa ritang’ani rituko rinde ritaraika.
ⅩⅦ Aye Nyasae, ebirengererio biao nigo bire ebikong’u ase ’nde kobimanya,
naende nebinge mono bitanyaare kobareka.
ⅩⅧ Inse kobibara, nigo bire ebinge goetania omokenye.
Ekero ’nkobooka, nigo ’ngendererete kobeera amo naye.
ⅩⅨ Aye Nyasae, naki yare goocha koba buya
onye ’ngwaita abakori amabe,
onye abagoitera amanyinga ’mbarua ase ’nde.
ⅩⅩ Abwo nigo bagokwana bobe igoro yao;
nigo bare abaenenu bagokora ebibe asore.
ⅩⅪ Omonene, Inee, tingeecheti abwo bakogeechete?
Tinkonyinyera abwo bagosaria asore?
ⅩⅫ Abwo nigo ’mbageechete mono,
nigo ’mbaabarete ng’a nababisa baane.
ⅩⅩⅢ Aye Nyasae, ndiga‐rigie omanye enkoro yane.
Nteeme omanye ebirengererio biane.
ⅩⅩⅣ Origererie timbwatia enchera y’obosiru,
na ondaae ase enchera ya kare na kare.