ⅩⅩⅨ
Eriogi ri’Omonene ase emerindo
(Ogoteera gwa Daudi)
Ⅰ Inwe abana ba Nyasae, motogie Omonene,
atora obonene bw’Omonene ne chinguru chiaye.
Ⅱ Togia erieta ri’Omonene rire nobonene obonge;
mosasime Omonene mweboetie obochenu.
Ⅲ Eriogi ri’Omonene nigo rikoigweka ase chinyancha igoro;
Nyasae bw’obonene nigo agoaka enkoba,
Omonene nigo akogukura igoro ye chinyancha chinyinge.
Ⅳ Eriogi ri’Omonene nigo rikoigweka rire nokobua;
eriogi ri’Omonene nigo riichire nobonene.
Ⅴ Eriogi ri’Omonene nigo rikobuna emete emecharake,
ee, nigo rikobuna emecharake ya Lebanoni.
Ⅵ Nigo agotira‐tiria emete eyio buna emori egotiria,
na ebitunwa bia Lebanoni na Sirioni buna eng’era ensae.
Ⅶ Eriogi ri’Omonene nigo rikomesia chinsase chi’omorero.
Ⅷ Eriogi ri’Omonene nigo rigotengechia erooro;
ee, nigo rigotengechia erooro ya Kadeshi.
Ⅸ Eriogi erio ri’Omonene nigo rikorekeria chingabi,
nigo rigosabora emete y’amanani yaba bosa.
Ase Hekalu yaye ebitongwa bionsi biatogia obonene bwaye.
Ⅹ Omonene nigo aikaransete ase ekerogo kiaye ki’obonene kogambera chioora;
Omonene nere omorwoti ase ekerogo kiaye kare na kare.
Ⅺ Omonene nae abanto baye chinguru, naende abasesenie ase okobaa omorembe.