ⅬⅩⅨ
Omonyene oboronge okorera anyore ogotooreka
(Ogoteera gwa Daudi)
Ⅰ Nyasae, intoorie,
ekiagera amaache aichoire, aikire ase omoyo one.
Ⅱ Nigo ngendererete korimera endiba y’etintira ime,
aase tari ase ngotacha n’amagoro.
Narimeire ase amaache ase endiba entambe,
na emerindo yantubire.
Ⅲ Narosire ekiagera nkona-korera,
omoyo one bwomire kegima.
Amaiso aane abeire orotutu,
nganyete Nyasae one.
Ⅳ Abanto nigo bangechete bosa ’ngencho ende etaiyo;
nigo bare abange kobua etukia ere ase omotwe one.
Ababisa baane nigo bagokwana oborimo igoro yane,
baganetie gosiria obogima bwane,
nigo bare ne chinguru chinyinge.
Nigo n’akanete ebi ntaibete.
Ⅴ Aye Nyasae, nomanyete oboriri bwane,
naki amamocho aane tabisekaneti korwa asore.
Ⅵ Aye Omonene bw’Emeganda,
totiga abanto abwo bagosemeretie, bare ime yane, barore obosooku.
Aye Nyasae bw’Abaisraeli,
totiga abanto abwo bagokorigia, bare ime yane, bachaywe.
Ⅶ Inche nigo nachayirwe ase engencho yao,
obosooku bwatubire obosio bwane.
Ⅷ Inche nabeire omogeni ase abanto baminto,
na omoeti ase abaminto twaiboretwe korwa ase enda eyemo.
Ⅸ Risemi ri’enyomba yao riandire,
emerumi y’abwo bakoramete nigo yangwerete.
Ⅹ Ekero nabete nkorera ase omoyo one na kweng’ata,
ngachaywa na gokwanwa bobe.
Ⅺ Ekero neboyetie chigunia ase okweumia
bakaba bakondabaara.
Ⅻ Inche ’ngokwanwa bobe nabwo bagoikaransa ang’e negeita kogamba,
abakonywa na gotinda bakoroisia amatera ay’ogonchecheria.
ⅩⅢ Aye Omonene, naye ngosaba ase engaki yancheire.
Aye Nyasae, inyigwere,
ekiagera nigo ore nobwanchani botari koera,
naende nigo ore omwegenwa ase ogotooria.
ⅩⅣ Ntoorie, tindimera ase etintira ime!
Ntoorie korwa ase ababisa baane,
na korwa ase amaache ’endiba entambe.
ⅩⅤ Gaki totiga emerindo entube,
gose chindiba chimere,
gose engoro emumekerie.
ⅩⅥ Omonene, ing’iranerie,
ekiagera obwanchani bwao bogendererete botambe nigo bore obuya,
ing’iranere, ekiagera amaabera ao namange mono.
ⅩⅦ Tobisa obosio bwao korwa asende inche omosomba oo;
inyigwe bwango, ekiagera inche nigo inde ase emechando emenene.
ⅩⅧ Inchuo ang’e asende, omboorie,
onsibore korwa ase ababisa baane!
ⅩⅨ Aye nomanyete amabe nakoreirwe,
na buna nasookigwe na gochaywa;
nigo omanyete ababisa baane bonsi.
ⅩⅩ Amabe ayio nakoreirwe asionoire enkoro yane,
bono nerusirie moyo.
Nigo nasemeretie ng’a ndorerwe amabeebe, korende tinayaroreretwe;
nigo nasemeretie inyore abaremia, korende tinabanyora.
ⅩⅪ Ekero narenge nenchara, abanto bakang’a amaache endorwe ribaga ri’endagera,
na ekero narenge nerang’o, bakang’a chinkama nkanywa.
ⅩⅫ Tiga endagera ere ase amasio abo, ebe egesugunia ase bare,
na oboreba ase abwo bekagete ng’a mbuya bare.
ⅩⅩⅢ Oukorie amaiso abo:
otengechie chibachwa chiabo kogenderera.
ⅩⅩⅣ Obaumorere ekeririanda kiao,
na endamwamu yao yoke igoro yabo.
ⅩⅩⅤ Tiga omochie obo otigare bosa,
monto onde tamenya ase chiema chiabo.
ⅩⅩⅥ Abanto abwo nigo bachandete omonto oria kwaagete,
na bagokwana igoro y’obororo bw’oyio kwabetete.
ⅩⅩⅦ Menta obobe igoro ase obobe bwabo;
tobatiga basoe ase oboronge bwao.
ⅩⅩⅧ Tiga amarieta abo atinyigwe korwa ase egetabu y’abare moyo,
tarikwa amo nay’abanyene oboronge.
ⅩⅩⅨ Inche nigo inde ase emechando n’obororo;
aye Nyasae, ogotooreka kwao konyimokererie igoro.
ⅩⅩⅩ Nintogie erieta ria Nyasae ase okomoterera;
nindarie obonene bwaye ase okoiraneria ng’a mbuya mono.
ⅩⅩⅪ Ayio naro aragokie Omonene kobua komoruera eng’ombe koba ekeng’wanso,
gose komoruera eeri ere ne ching’unchara na ebitaago.
ⅩⅩⅫ Abwo bakoreire bobe mbarore ayio, bagoke;
inwe aba mokorigia Nyasae, tiga chinkoro chiaino chikorwe chinyia.
ⅩⅩⅩⅢ Omonene nigo akoigwa abanto baria baremeire;
ere tari gochaaya abanto baye abwo bare ase obosibwa.
ⅩⅩⅩⅣ Tiga igoro na ense chitogie Omonene,
naboigo na enyancha, na ebitongwa bionsi bire imeo.
ⅩⅩⅩⅤ Nyasae natoorie Sayoni na aagache emechie y’Abayuda naende,
abasomba baye mbayeire ebe eyabo na komenya aroro.
ⅩⅩⅩⅥ Abanto b’ororeria rw’abasomba b’Omonene mbayeire ebe eyabo,
boigo nabaanto baria banchete erieta ri’Omonene mbamenye aroro.