ⅬⅩⅩⅣ
Ogosaba kw’ogotoorigwa kw’egesaku
(Ototera gw’Asafu)
Ⅰ Aye Nyasae, nase ki gwatotigire kegima?
Ninki gekogera endamwamu yao yokire igoro ye ching’ondi chi’oborisia bwao?
Ⅱ Inyora omoganda bw’abaanto bao, abwo kwenyorerete ase chingaki chia kare.
Aye nigo kwababooretie babe egesaku kere omwando oo.
Inyora egetunwa gia Sayoni, agwo ase kwabeire komenyete.
Ⅲ Inchuo otaare aase agwo agendererete gosareka;
ababisa nigo basaretie bionsi ebiarenge ime ase obomenyo boria obochenu.
Ⅳ Ababisa bao nigo bakwoga aase abanto bao basangererekanete,
barabwo batenenirie chibendera chiabo koba ebimanyererio biabo.
Ⅴ Nigo yarorekanete buna nabaanto bakogecha emete,
bakaimokia ebisire kogecha rinani rinoru.
Ⅵ Nigo baimogetie chinyundo na ebisire,
bakabuna ebinto bionsi bie Hekalu biabachetwe korwa ase emete.
Ⅶ Nigo basambete nomorero Obomenyo bwao Obochenu,
bakaiyeria inse Obomenyo Obochenu bw’erieta riao,
na bakabokora bokaba obotachenegeti.
Ⅷ Abanto abwo bagateeba ase emioyo yabo, “Goika tobasirie kegima.”
Nigo basambete aase onsi abanto ba Nyasae bagosangererekana.
Ⅸ Titorochi ebimanyererio biaito, na ababani tibaiyo,
na onde tari ase egati yaito omanyete ngoika ririri aya arabe.
Ⅹ Aye Nyasae, ngoika ririri ababisa barabe bakona‐gochecheria?
Inee! Ababisa aba nigo bagochia kona‐korama erieta riao kogenderera botambe?
Ⅺ Nase ki aye kwaringire okoboko kwao gw’okorio?
Korambore korwa ase egekuba kiao, obasirie kegima.
Ⅻ Nyasae, aye nigo ore omorwoti one, kwarengeo korwa kare,
naye kwabeire kogokora emeremo y’ogotooria ense engima.
ⅩⅢ Aye nigo gwatananete enyancha ase okobua kwao,
ogasenyenta emetwe ye chinchoka chi’enyancha.
ⅩⅣ Aye nigo gwasenyentete emetwe ya Leviatani, eng’iti eria enene y’okwoboyia,
erio omobere oye okayoa ching’iti chi’erooro chikayoria.
ⅩⅤ Aye nigo gwatubogetie chinsoko ne chindooche;
boigo ogasiria amaache ye chindooche chinene, chigakamoka.
ⅩⅥ Omobaso noyoo, na obotuko nobwao,
naye gwatongete omotienyi na erioba.
ⅩⅦ Naye gwachiigete aase chimbebe chionsi chi’ense chikobeera,
naende ogakora chingaki chi’egura gura n’etoigo.
ⅩⅧ Aye Omonene, inyora buna ababisa bagendererete kogochecheria,
na abatakoirogeti nigo bagendererete korama erieta riao.
ⅩⅨ Tobaisa korua omoyo one, inche riruma riao, ase omoganda oria omobe;
tibweba nonya ng’ake abanto bao abwo baregire.
ⅩⅩ Oinyore okobwatana kwao kw’ogotianania gwakorete naintwe;
ense nigo eichire nobobe ase kera ensemo y’omosunte.
ⅩⅪ Tobaisa gotiga abanto abwo bagokorerwa bobe basookigwe;
tiga abanto abataka na abwo baremeire batogie erieta riao.
ⅩⅫ Nyasae, imoka bwerwanerere aye omonyene;
inyora buna abatakoirogeti bakogokorera echeche kera rituko.
ⅩⅩⅢ Tobaisa kweba okwoga kw’ababisa bao,
ne rirorooche ri’abakogochecheria rigotiira botambe.