ⅬⅩⅩⅦ
Okoremigwa ase chingaki chi’obokong’u
(Ogoteera gw’Asafu)
Ⅰ Nkorera nde ase Nyasae neriogi rinene,
nigo nkorera mono asare ng’a anyigwe.
Ⅱ Ase chingaki chi’emechando nigo nkorigia Omonene;
ase obotuko nigo nkorambora okoboko kwane ase ogosaba ntari korosa,
omoyo one nigo okwanga koremigwa.
Ⅲ Ekero nkoinyora Nyasae, nigo nkorera,
na ekero nkomorengereria, nigo ngokwa omoyo.
Ⅳ Aye Omonene, nigo ogotanga amaiso aane takonyora chitoro.
Nigo nchandegete mono, tinkonyara gokwana.
Ⅴ Nigo nkoba nkorengereria igoro y’amatuko a kare,
nkoinyora emiaka ya kare buna yarenge.
Ⅵ Ase obotuko obogima nigo nkoinyora amatera aane:
nigo nkoba nkorengereria ase enkoro yane ime, neriga‐rigia na kweboria:
Ⅶ “Inee! Omonene natotigire kegima?
Tagotororera amaabera rinde?
Ⅷ Inee! Obwanchani bwaye bwa botambe mbwaerire kegima?
Chiira chiaye nchiaikire omoerio?
Ⅸ Nyasae nigo ebire koba omonyamaabera?
Inee! Nigo abeire nendamwamu, goika osiekire amabeebe?”
Ⅹ Erio ngateeba, “Obo nobororo bwane,
eye nengaki okoboko gw’okorio kw’Oyore Igoro Mono gwantomeire.”
Ⅺ Ning’inyore ogokora kwao aye Omonene;
ee, ning’inyore amakumia ao a kare.
Ⅻ Nimbe nkorengereria igoro y’emeremo yao yonsi,
na imbe nkona‐koiranerera ogokora kwao gwe chinguru.
ⅩⅢ Aye Nyasae, chinchera chiao nigo chire chinchenu.
Nenyasae ereri ere enene buna Nyasae oito?
ⅩⅣ Aye nigo ore Nyasae ogokora amakumia;
kwaorokirie okobua kwao ase egati ya Mwanyabaanto.
ⅩⅤ Aye nigo gwatooretie abanto bao nokoboko kwao koramboire.
Abanto abwo nigo barenge ab’ororeria rwa Yakobo na orwa Yusufu.
ⅩⅥ Aye Nyasae, ekero amaache akorooche,
ee, ekero akorooche, nigo akwoboete,
ne chindiba chikanyegerigwa.
ⅩⅦ Amare agaitera amaache;
ne chinkoba chigaaka korwa igoro,
chinsara chiao chikamesa ase chinsemo chionsi.
ⅩⅧ Okogukura gw’enkoba nigo kwarenge ime ase ekerambauti,
na ense egatengecha.
ⅩⅨ Nigo gwakorete enchera yao ase enyancha,
oboeto bwao bokaba ime ase amaache amange mono,
korende nonya naboigo amabarato ao tarorekanete aroro.
ⅩⅩ Aye nigo kwaraaete abanto bao buna riicho rikoraagwa,
ee, okabaraa goetera ase amaboko a Musa na Aroni.