ⅬⅩⅩⅩⅢ
Ogosaba gw’okonyora okobua igoro y’ababisa b’Abaisraeli
(Ogoteera gw’Asafu)
Ⅰ Aye Nyasae, tokira‐kiri!
Nyasae, totoerera na gotimoka.
Ⅱ Rora, ababisa bao buna bagokora rirorooche;
abwo bakogechete baimokereirie emetwe igoro ase oboenenu.
Ⅲ Nigo bagokora emeroberio y’obong’ainereria igoro y’abanto bao;
abwo nigo bagosemania kobakorera bobe abanto bao abwo orendete.
Ⅳ Nigo bagoteebania: “Inchuo tobasirie tibaaba egesaku naende,
tiga erieta ri’Abaisraeli riebwe kegima!”
Ⅴ Abanto abagaambire ase omoyo oyomo
na bakorire okobwatana mamincha yao nabwo aba;
Ⅵ abanto bamenyete ase chiema chi’Edomu na Abaisumaeli;
Abamoabu na Abahagari;
Ⅶ Abagebali, na Abaamoni, na Abaamaleki;
Abafirisiti amo nabamenyete Turo.
Ⅷ Boigo Abaasuri babwatanire nabwo
ase ogokonya abanto b’ororeria rwa Loti.
Ⅸ Omonene, obakore buna gwakorete Abamidiani,
na buna gwakorete Sisera na Yabini agwo ase orooche rwa Kisoni.
Ⅹ Abwo nigo baiteretwe agwo EniDori;
bakaba esike ase riroba.
Ⅺ Okore abanto babo basikire buna gwakorete Orebu na Seebu,
na abanene babo babe buna Seba na Salimuna,
Ⅻ ekiagera bateebete, “Inchuo toire amarisio a Nyasae abe ayaito.”
ⅩⅢ Aye Nyasae one, tiga abanto abwo bairurukigwe buna orotu,
ee, buna omoiriro okoirurukigwa nomwaga.
ⅩⅣ Buna omorero ogokoora rinani,
na buna ekebemberi ki’omorero kegosamba ebitunwa,
ⅩⅤ naboigo batunyanerie omwaga oo bw’omoubera,
na obaondokie nekembugu‐mbugu kiao.
ⅩⅥ Aye Omonene, kora amasio abo abe nobosooku obonene,
erinde babe bakorigia erieta riao.
ⅩⅦ Abanto abwo tiga babe nobosooku na omoichano goika kare na kare;
ee, tiga basookigwe na basire kegima.
ⅩⅧ Abanto abwo tiga bamanye ng’a naye bweka okorokwa Omonene,
nigo ore Oyore Igoro Mono igoro y’ense yonsi.