Ⅺ
Daudi okoba omorwoti bw’Abaisraeli na Abayuda
(2 Sam 5:10)
Ⅰ Erio Abaisraeli bonsi bagasangerereka ase Daudi agwo Heburoni bakamoteebia, “Naama! Intwe nigo tore abamo naye, aba amanyinga ayamo, na omobere oyomo.
Ⅱ Ase engaki yaetire, nonya nekero Saulo arenge omorwoti, naye kwarenge gotang’ana Abaisraeli kobaare korwana esegi naende kobakoirana. Na Omonene, Nyasae oo, akagoteebia ng’a naye orabe omorisia bw’Abaisraeli, abanto baye, na koba omogambi igoro yabo.”
Ⅲ Nabo abagaaka bonsi b’Abaisraeli bagacha ase omorwoti agwo Heburoni; na aroro Daudi agakora okobwatana kw’ogotianania nabarabwo ase obosio bw’Omonene, na barabwo bagaaka Daudi amaguta akaba omorwoti igoro ase Abaisraeli, koreng’ana ne ring’ana riri’Omonene akwanete goetera ase Samweli.
Ⅳ Daudi amo n’Abaisraeli bonsi bakagenda Yerusalemu, noro Yebusi, ase Abayebusi, abanto b’ense eria, barenge.
Ⅴ Abanto ba Yebusi bakamoteebia, “Aye tokonyara gocha aiga nonya ng’ake.” Korende nonya naboigo, Daudi akabua eburi ya Sayoni, oyio noro Omochie o Daudi.
Ⅵ Daudi konya oteebire, ng’a “Monto onde bwensi orabe oyo bw’eritang’ani goita abanto ba Yebusi, ere oyio nabe omochiki omonene bw’abarwani.” Yoabu, omomura bw’omokuungu Seruya, akaba oyo bw’eritang’ani kogenda aroro; ase ayio ere akaba omochiki.
Ⅶ Daudi akaba okomenya ase eburi eria enkong’u, ase ayio ekarokwa Omochie o Daudi.
Ⅷ Erio akaagacha omochie goetanana onsi korwa Milo, okaba egesingo kegima; na Yoabu akaroisia omochie ase konya otagokire.
Ⅸ Daudi akamenta koba omonene, na koba nokobua, ekiagera Omonene bw’Emeganda nigo arenge amo nere.
Abarwani chituoni ba Daudi
(2 Sam 23:8-9)
Ⅹ Aba nabwo abanto abanene chituoni ba Daudi, baria bamosiirete bokong’u ase oborwoti bwaye, amo n’Abaisraeli bonsi bakamobeeka akaba omorwoti, koreng’ana ne ring’ana ri’Omonene igoro y’Abaisraeli.
Ⅺ Oyo noro omobaro bw’abaanto chituoni ba Daudi: Ritang’ani Yasobeamu korwa Hakimoni. Ere nigo arenge omonene bwa baria batato. Ere akarwania abanto amagana atato ne ritimo riaye akabaita ase engaki eyemo.
Ⅻ Na oyo o kabere bw’abwo batato n’Eleazari, mosinto o Dodo, Omoahohi.
ⅩⅢ Ere nigo arenge amo na Daudi agwo Pasi‐Damimu ekero Abafirisiti basangererekanete amo, barwane esegi aase omogondo bw’esairi orenge. Ekero abanto batamete korwa ase Abafirisiti,
ⅩⅣ Eleazari agatenena gati gati y’omogondo oria, akaba omokong’u akayoegera, agaaka Abafirisiti, akabaita. Omonene akabaa obobui obonene.
ⅩⅤ Rituko erimo abanto batato ba baria abanene emerongo etato bagatirimboka gochia ase egetare, bakagenda ase Daudi agwo ase rikuruma ri’Adulamu, ekero abasikari b’Abafilisti batoorete ase ense omweya y’Abarefai.
ⅩⅥ Ase engaki eria Daudi nigo arenge ime ase eburi, na abasikari b’Abafilisti nigo barenge Bethlehemu.
ⅩⅦ Daudi akabora ase okogania okonene, “Ntare konyora omonto andetere amaache inywe korwa ase ensoko eyio ere ase egeita kia Bethlehemu?”
ⅩⅧ Erio abanto baria batato bakabinya‐binyia egati y’Abafilisti aase batoorete, bakabuucha amaache korwa ase ensoko eria yarenge ase egeita kia Bethlehemu, bakayairera Daudi. Korende Daudi tayanywa otatiga ayaumorete akaba okoruegwa gw’ekenyugwa ase Omonene,
ⅩⅨ akabora, “Omonene ontange tiyanywa. Aya nigo anga buna nkonywa amanyinga ’abaanto bataegerete obogima bwabo ase okorenta amaache aya.” Ase ayio akaanga tayanywa. Ayio naro abanto abwo chituoni batato bakorete.
ⅩⅩ Abisai, momura omwabo Yoabu, nigo amanyekanete ase baria batato; akarwania abanto amagana atato akabaaka ne ritimo riaye, akabaita, na igo akaba nerieta rinene ase egati ya baria batato.
ⅩⅪ Ase baria batato ere nigo abwate ogosikwa okuya goetania abande, akaba omoraai obo, korende tareng’anetie na baria batato b’eritang’ani.
ⅩⅫ Benaya, mosinto o Yehoyada, nigo arenge omonto etuoni korwa ase Kabuseli. Ere agakora emeremo emenene, agaita abanto babere chituoni b’Abamoabu. Engaki ende, ekero ki’obokendu na amagena ’embura yatwete, agasoa engoro agaita endo aroro.
ⅩⅩⅢ Naende agaita Omomisiri, omonto orenge nobotambe bw’ekerengo gie chimita ibere. Omomisiri oria nigo abwate ritimo koboko kwaye, riachomeire orotanga oronene buna omwaro, korende Benaya akamochiera nenyimbo, akamoura ritimo riarenge koboko kwaye, akamoitera ne ritimo riria riaye omonyene.
ⅩⅩⅣ Amang’ana aya naro Benaya, mosinto o Yehoyada, akorete. Nigo anyorete erieta rinene ase egati ya baria batato.
ⅩⅩⅤ Nonya osikire kobua baria Emerongo etato, tareng’anirie na baria batato. Daudi akamobeka akaba omoteneneri bw’abarendi b’obogima bwaye.
ⅩⅩⅥ Abanto chituoni b’abasikari nabwo aba: Asaeli momura omwabo Yoabu, na Elihanani, mosinto o Dodo korwa Bethlehemu.
ⅩⅩⅦ Samoti korwa Harodi na Helesi korwa Peleti;
ⅩⅩⅧ Ira, mosinto o Ikesi korwa Tekoa, na Abieseri korwa Anatoti;
ⅩⅩⅨ Sibekai korwa Husa, na Ilai korwa Ahohi;
ⅩⅩⅩ Maharai korwa Netofa, na Heledi, mosinto o Baana korwa Netofa;
ⅩⅩⅪ Itai, mosinto o Ribai korwa Gibea o Benjamini, na Benaya korwa Piratoni;
ⅩⅩⅫ Hurai korwa ase amakura ang’e na Gaasi, na Abieli korwa Ariba;
ⅩⅩⅩⅢ Asimaweti korwa Gahurimu na Eliaba korwa Saalaboni;
ⅩⅩⅩⅣ basinto ba Hasemu korwa Gisoni na Yonathani, mosinto o Sagee, korwa Harari;
ⅩⅩⅩⅤ Ahiamu, mosinto o Sakari korwa Harari, na Elifali, mosinto o Uri;
ⅩⅩⅩⅥ Heferi korwa Mekera na Ahiya korwa Peloni
ⅩⅩⅩⅦ Hesero korwa Karimeli, na Naara, mosinto bw’Esibai;
ⅩⅩⅩⅧ Yoel, momura omwabo Nathani, na Mibihari, mosinto o Hagiri.
ⅩⅩⅩⅨ Seleki korwa Amoni na Naharai korwa Beroti, omobogoria ebirwanero bia Yoabu, omomura bw’omokuungu Seruya;
ⅩⅬ Ira na Garebu korwa Itiri;
ⅩⅬⅠ Uria Omohiti na Sabadi, mosinto bw’Alai,
ⅩⅬⅡ Adina, mosinto o Sisa bw’egesaku kia Rubeni, omoraai bw’abaanto b’egesaku ekio, na amo nere abanto emerongo etato;
ⅩⅬⅢ Hanani, mosinto o Maaka na Yosafati korwa Mitani;
ⅩⅬⅣ Usia korwa Asitera; Sama na Yeieli, basinto ba Hotamu korwa Aroeri;
ⅩⅬⅤ Yediaeli, mosinto o Simuri, na Yoha, momura omwabo, omonto o Tisi;
ⅩⅬⅥ Elieli korwa Mahawa Yeribai na Yosawia, basinto b’Elinamu, na Itima korwa Moabu;
ⅩⅬⅦ Elieli, na Obedi, na Yaasieli korwa Soba.