ⅩⅥ
Ⅰ Kobarentire Esanduki eria ya Nyasae, bakayebeeka ime ase eema eria Daudi ayeteneneretie, bakarua ebing’wanso bi’ogosambwa na ebi’omorembe, ase obosio bwa Nyasae.
Ⅱ Na ekero Daudi akoorire korua ekeng’wanso ki’ogosambwa na eki’omorembe agasesenia abanto ase erieta ri’Omonene.
Ⅲ Naende akagaba endagera ase omoganda bwonsi bw’Abaisraeli, ase abasacha na abakungu; kera oyomo akaegwa omogati oyomo, na enyama inke, ne ribomba ri’amasasabibu amomo.
Ⅳ Naende agachora abanto bande b’Abalawi bakaba abakoreri bosio bw’Esanduki eria y’Omonene, bakaba bagotogia Omonene, Nyasae bw’Abaisraeli, na komoiraneria ng’a mbuya mono na komobaka.
Ⅴ Asafu nere orenge omotang’ani obo. Abaare komobwatia nabwo aba: Zakaria na Yeieli, Semiramoti na Yehieli, Matitia na Eliabu, Benaya na Obedi‐Edomu, na Yeieli, baria barenge kobugia amakano, na amakano ’ebirigisa. Asafu agaakania chisani chiarenge kwoga.
Ⅵ Benaya na Yahasieli, abakuani, bakaba bakobugia ebitureeri botambe agwo bosio bw’Esanduki ere ne chibao chiriikire Okobwatana kwa Nyasae.
Ⅶ Rituko eri nario Daudi achigete ritang’ani ng’a ogoteera gw’okomoiraneri’Omonene ng’a mbuya mono goterwe n’Asafu na abanto bamwabo ase enchera eyio.
Ogoteera kw’ogotogia
(Zab 105:1-5; 96:1-3; 106:1,47-48)
Ⅷ Moiranerie Omonene ng’a mbuya mono!
Rangeria erieta riaye ase ogokonywa,
teebia abanto b’ebisaku ogokora kwaye.
Ⅸ Terera Omonene,
moterere amatera ay’okomotogia;
raria ogokora kwaye kw’ogokumia.
Ⅹ Etogerie erieta riaye richenu,
abanto bonsi abakorigia Omonene basasoke ase chinkoro chiabo ime.
Ⅺ Rigia Omonene amo ne chinguru chiaye,
morigie mobe ase obosio bwaye botambe.
Ⅻ-ⅩⅢ Inwe ab’ororeria rwa Israeli, omosomba bw’Omonene,
inwe abanto ba Yakobo, abachore b’Omonene,
inyora ogokora kwaye kw’ogokumia
na amakumia aye amo nebiina anachete.
ⅩⅣ Ere nere Omonene, Nyasae oito,
ebiina biaye nigo bire ase ense yonsi.
ⅩⅤ Inyora botambe okobwatana kwaye kw’ogotianania,
goika ebiaare elifu mobe mokoinyora ring’ana achigete,
ⅩⅥ na okobwatana koria kw’ogotianania akorete na Aburaamu,
na eira yaye y’ogotianania arierete Isaka.
ⅩⅦ Eira eyio aenegetie koba ase Yakobo buna ogochika,
ee, ase Israeli okobwatana gwa kare na kare,
ⅩⅧ agateeba, “Aye ninkoe ense ya Kaanani
ebe omwando bw’ororeria rwao.”
ⅩⅨ Ase engaki eria nigo barenge abake ase omobaro,
bakabarwa ng’a tibaisaini gento,
nigo barenge abaeti ase ense eyio.
ⅩⅩ Bakaba bagoetanana korwa ase egesaku ekemo gochia ase ekende,
na korwa ase oborwoti obomo gochia ase obonde.
ⅩⅪ Nyasae tatigete abanto bande baabachande;
agatogonyera abarwoti ase engencho yabo,
ⅩⅫ agateeba, “Timobaisa gokuna abaakwa amaguta baane,
gose timokorera ababani baane bobe!”
ⅩⅩⅢ Inwe abanto b’ense yonsi, moterere Omonene!
Raria ogotooreka kwaye rituko ase rituko!
ⅩⅩⅣ Raria obonene bwaye ase egati y’ebisaku,
na ogokora kwaye kw’ogokumia ase abanto bonsi!
ⅩⅩⅤ Omonene nigo are omonene mono, goika atogigwe,
na airokwe goetania chinyasae chinde.
ⅩⅩⅥ Chinyasae chionsi chi’abaanto b’ebisaku nemegwekano y’ogosasimwa rioka,
korende Omonene nere otongete igoro chionsi.
ⅩⅩⅦ Ogosikwa na obonene nigo bire ase obosio bwaye,
chinguru na omogooko nigo bire ase obomenyo bwaye.
ⅩⅩⅧ Inwe abe chiamate chi’abaanto, togia Omonene!
Motogie ase obonene bwaye na okobua kwaye!
ⅩⅩⅨ Mobake Omonene ase obonene bw’erieta riaye;
moche ase obosio bwaye morentane ebiegwa,
mosasime Omonene mweboetie obochenu!
ⅩⅩⅩ Inwe abanto b’ense yonsi, mobe mokoiguswa ase obosio bwaye,
ee, ense nigo eteneine bokong’u, tekonyegerigwa.
ⅩⅩⅪ Tiga igoro chibe nomogooko na ense echenge,
abanto b’ebisaku bateebigwe: “Omonene nere okogamba.”
ⅩⅩⅫ Tiga enyancha echenge ase okoeera, amo n’ebinto bionsi bire ime yaye,
na emegondo echenge amo n’ebinto bionsi bireo.
ⅩⅩⅩⅢ Erio emete ye rinani netere nomogooko ase obosio bw’Omonene,
ekiagera ere ngocha are konachera ense ekiina.
ⅩⅩⅩⅣ Iraneri’Omonene ng’a mbuya mono, ekiagera ere nomuya;
obwanchani bwaye nigo bogendererete kare na kare.
ⅩⅩⅩⅤ Kwana: Aye Nyasae, ogotooreka gwaito, totoorie,
otosangererie amo, na otoboorie korwa ase abanto b’ebisaku,
erinde totogie erieta riao richenu, na twetogerie ogotogigwa kwao.
ⅩⅩⅩⅥ Omonene, Nyasae bw’Abaisraeli, atogigwe,
korwa kare na kare, na gochia kare na kare!
Erio abanto bonsi bagateeba, “Amina!” Na bakamotogia Omonene.
Ogosasiima ase Yerusalemu na Gibeoni
ⅩⅩⅩⅦ Ase ayio Daudi agatiga Asafu na abanto bamwabo agwo bosio bw’Esanduki eria y’Okobwatana kw’Omonene babe abakoreri asare botambe, buna okogania gwa kera rituko kwarenge.
ⅩⅩⅩⅧ Obedi‐Edomu na abanto bamwabo nigo barenge emerongo etano nomo, na batano na batato (68). Ere Obedi‐Edomu mosinto o Yedutuni, na Hosea, bakabeekwa bakaba abarendi b’egeita.
ⅩⅩⅩⅨ Daudi akabeeka Zadoki Omokuani amo nabakuani bande bamwabo, babe bagokorera Omonene ase Eema yaye agwo aase aimokererete igoro agosasimerwa aaria Gibeoni.
ⅩⅬ Kera emambia na omogoroba botambe babe bakorua ekeng’wanso ki’ogosambwa ase egesasiimero gi’ekeng’wanso ki’ogosambwa, koreng’ana buna arigetwe ase amachiiko ari’Omonene aete Abaisraeli.
ⅩⅬⅠ Amo nabwo barenge Hemani na Yedutuni, na abanto baria bachoretwe na korikwa amarieta abo ase okoiraneri’Omonene ng’a mbuya mono ase engencho y’obwanchani bwaye obwo bogendererete kare na kare.
ⅩⅬⅡ Hemani na Yedutuni nigo bagachete ebitureeri ne chisani chiarenge kwoga ekero chiare goakanigwa, amo n’ebinto binde biare kobugigwa ekero amatera amaachenu agoterwa. Abanto b’eamate ya Yedutuni bagachorwa korenda egeita.
ⅩⅬⅢ Erio abanto bonsi bakarua agwo, kera omonto akagenda nka bwoye, na Daudi akagenda bwoye gosesenia abanto b’enyomba yaye.