ⅩⅩⅣ
Emeremo abakuani baetwe
Ⅰ Ebi nabio ebiombe bi’abaanto b’ororeria rwa Aroni. Abana abamura ba Aroni nabwo aba: Nadabu na Abihu, Eleazari na Itamari.
Ⅱ Nadabu na Abihu bagakwa bagatiga ise ore moyo, barabwo tibabwate abana; na igo Eleazari na Itamari bakaba abakuani.
Ⅲ Daudi agaatanana abwo b’ororeria rwa Aroni na akaroberia buna bakore emeremo. Zadoki bw’ororeria rw’Eleazari na Ahimeleki bw’ororeria rwa Itamari barabwo m babete bakomokonya.
Ⅳ Abanto b’ororeria rw’Eleazari bakanyorekana bare nabateneneri abange kobua abwo b’ororeria rwa Itamari. Ase ayio bakabeeka abanto ikomi na batano nomo b’ororeria rw’Eleazari babe abateneneri be chiamate chiabo, na batano na batato b’ororeria rwa Itamari babe abateneneri be chiamate chiabo.
Ⅴ Igo baatananetwe ase ogoakerwa obomera, bonsi ase enchera eyemo, ekiagera abateneneri abwo b’Aase Aachenu na abwo ba Nyasae nigo bachoretwe korwa ase ororeria rw’Eleazari amo norwa Itamari.
Ⅵ Semaya, mosinto o Netaneli Omolawi, akarika amarieta abo agwo ekero omorwoti na abanene abarenge komokonya, na Zadoki Omokuani, na Ahimeleki, mosinto bw’Abiatari, na abateneneri be chiamate chi’abakuani, na echi’Abalawi barigereretie. Chiamate chigachorwa ase ogoakerwa obomera, eyemo korwa ase ororeria rw’Eleazari, na eyende korwa ase orwa Itamari.
Ⅶ Obomera obotang’ani bokagwera Yehoyaribu, na obwa kabere Yedaya;
Ⅷ obwa gatato bokagwera Harimu, na obwa kane Seorimu;
Ⅸ obwa gatano bokagwera Malikia, na obwa gatano na rimo Miyamini;
Ⅹ obwa gatano na kabere bokagwera Hakosi, na obwa gatano na gatato Abiya;
Ⅺ obwa kianda bokagwera Yesua, na obwa ikomi Sekania;
Ⅻ obwa ikomi na rimo bokagwera Eliasibu, na obwa ikomi na kabere Yakimu;
ⅩⅢ obwa ikomi na gatato bokagwera Hupa, na obwa ikomi na kane Yesebeabu;
ⅩⅣ obwa ikomi na gatano bokagwera Biliga, na obwa ikomi na gatano na rimo Imeri;
ⅩⅤ obwa ikomi na gatano na kabere bokagwera Hesiri, na obwa ikomi na gatano na gatato Hapisesi;
ⅩⅥ obwa ikomi na kianda bokagwera Petahia, na obwa emerongo ebere Ezekieli;
ⅩⅦ Obwa emerongo ebere na rimo bokagwera Yakini, na obwa emerongo ebere na kabere Gamuli;
ⅩⅧ obwa emerongo ebere na gatato bokagwera Delaya, na obwa emerongo ebere na kane Maasia.
ⅩⅨ Oyo noro omooroberio obo bw’obokoreri bwabo bw’enyomba y’Omonene Nyasae bw’Abaisraeli buna Aroni, sokoro yabo, abarobereretie koreng’ana buna Omonene amochigeete.
Abateneneri bande b’Abalawi
ⅩⅩ Aba nabwo Abalawi bande: Subaeli bw’ororeria rw’Amuramu na Yehedia bw’ororeria rwa Subaeli;
ⅩⅪ Isia, omoteneneri korwa ase ororeria rwa Rehabia;
ⅩⅫ Selomoti bw’ororeria rwa Isari, na Yahati bw’ororeria rwa Selomoti.
ⅩⅩⅢ Abana abamura ba Heburoni nabwo aba: Yeria omotangi, na Amaria oyo o kabere, na Yahasieli, oyo o gatato, na Yekameamu oyo o kane;
ⅩⅩⅣ Mika bw’ororeria rwa Usieli, na Samiri bw’ororeria rwa Mika;
ⅩⅩⅤ Isia omomura omwabo Mika, na Zakaria bw’ororeria rwa Isia.
ⅩⅩⅥ Abana abamura ba Merari nabwo Mali na Musi. Omwana omomura o Yaasia nere Beno.
ⅩⅩⅦ Abanto b’ororeria rwa Merari ase Yaasia, omwana oye omomura, nabwo aba: Beno na Sohamu, Sakuri na Ibiri.
ⅩⅩⅧ Omwana o Mali n’Eleazari; ere tabwate abana abamura.
ⅩⅩⅨ Yerameeli nomwana omomura o Kisi.
ⅩⅩⅩ Abana abamura ba Musi nabwo aba: Mali na Ederi, na Yerimoti.
Aba nabwo barenge ab’ororeria rwa Lawi koreng’ana ne chiamate chiabo.
ⅩⅩⅪ Abateneneri abwo be chiamate chiabo, abatang’ani amo nabamwabo abake, bagaaka obomera buna abamwabo, abanto b’ororeria rwa Aroni, ekero Daudi omorwoti, na Zadoki, na Ahimeleki, na abatang’ani be chiamate chi’abakuani na echi’Abalawi barigereretie. Oyorenge omonene ase eamate ogaakerwa obomera koreng’ana buna oyorenge omoke.