EGETABU GIA KABERE KIA
AMANG’ANA ’EBIRO
Ogochaakera
Egetabu eke giakabere kia’mang’ana ebiro nigo gekogendereria amang’ana ayio akwaneire ase egetabu kieritang’ani. Nigo gekogendereria amang’ana igoro buna Sulemani achagete kogamba goika ogokwa kwaye.
Nigo kegotworokia ake igo buna egesaku kia’Baisraeli inse yokogamba kwa Yeroboamu kiabete mamincha ya Rehoboamu oyio orenge omwana o Sulemani na nere oirete ribaga ria ise. Magega yayio nigo omoriki bw’egetabu eke agotweresa mono igoro yegesaku kia Yuda goika okogwa gwa Yerusalemu ase omwaka 586 magega Yeso ataraiborwa.
Ebisieri biomoerio bw’egetabu eke nigo bibwate amang’ana akobwatana negetabu kia Ezra boigo na keria kia Nehemia. Nigo tokorora omorwoti Koreshi okorwa ogochika Abayahudi bairane sobo erio baagache hekalu ya Yerusalemu ase oboyia.
Okobagwa kw’egetabu eke:
Okogamba gwa Sulemani 1:1—9:31
a. Emiaka ye ritang’ani 1:1-17
b. Hekalu ekoagachwa 2:1—7:10
c. Emiaka y’omoerio 7:11—9:31
Ogotaigwera kw’ebisaku bia sugusu 10:1-19
Abarwoti b’Abayuda 11:1—36:12
Okogwa kwa Yerusalemu 36:13-23
Ⅰ
Omorwoti Sulemani ogosaba aegwe obong’aini
(1 Abar 3:1-5)
Ⅰ Sulemani, mosinto o Daudi, akanyora chinguru ase oborwoti bwaye, n’Omonene, Nyasae oye, nigo arenge amo nere, na akamokora akaba omonene mono.
Ⅱ Omorwoti Sulemani agasangereria Abaisraeli bonsi, abatang’ani b’abasikari chilifu, na ab’amagana, na abagaambi ebiina, na abaraai bonsi b’Abaisraeli, nabwo abateneneri be chiamate chi’Abaisraeli.
Ⅲ Erio akagenda amo nomosangererekano oyio bwonsi goika aase aimokererete igoro agosasimerwa arenge agwo Gibeoni, ekiagera Eema y’Omosangererekano ya Nyasae, eria Musa, omosomba Omonene, aroisetie aaria ase erooro, nao yarenge.
Ⅳ Korende Esanduki eria ya Nyasae Daudi konya oyerentire korwa ase Kiriati‐Yearimu, goika aase aria ayeroiseretie, ekiagera konya oyeteneneirie eema agwo Yerusalemu.
Ⅴ Egesasiimero gi’etai keria Besaleli, mosinto o Uri o Huri, aroisetie nao kiarenge bosio bw’Eema y’Omonene, Sulemani amo nomosangererekano bwonsi bakaba bakogenda aroro kobori’Omonene.
Ⅵ Agwo Sulemani agatiira gochia ase egesasiimero keria kiarenge agwo ase Eema y’Omosangererekano, na igoro yaye akaruera Omonene ebing’wanso bi’ogosambwa elifu eyemo.
Ⅶ Ase obotuko boria Nyasae akaorokera Sulemani, akamoteebia, “Mboria aya oganetie nkoe!”
Ⅷ Sulemani akairaneria Nyasae, “Aye nkwaorogetie obwanchani obonene botari koera ase Daudi tata, na inche kwambekire nabeire omorwoti ribaga riaye.
Ⅸ Aye Omonene Nyasae, tiga eira yao kwarierete Daudi tata eikeranigwe bono, ekiagera kwambekire nabeire omorwoti igoro ase abanto abange banga buna orotu rw’ense.
Ⅹ Bono ing’a obong’aini ne chisemi imanye koraa na gotang’ana abanto aba, ekiagera ning’o rende oranyare kogambera abanto aba bao abange buna aba?”
Ⅺ Nyasae akairaneria Sulemani, “Ekiagera okogania okwo kore ime ase enkoro yao, naende toboreti oegwe obotenenku, gose obonda, gose ogosikwa, gose ogosirigwa kw’obogima bw’abaanto baria bakogechete, gose toboreti oegwe obogima obotambe, korende kwaboririe oegwe obong’aini ne chisemi, erinde omanye kogambera abanto baane abwo nakobekire obe omorwoti obo,
Ⅻ inche ninkoe obong’aini ne chisemi. Boigo ninkoe obotenenku ne chinibo, na ogosikwa oko omorwoti onde atana koegwa, gose oyorache korwa magega yao takoegwa.”
Okobua kw’omorwoti Sulemani na obotenenku bwaye
(1 Abar 10:26-29)
ⅩⅢ Erio Sulemani akairana korwa agwo aase aimokererete igoro agosasimerwa agwo Gibeoni, korwa ase Eema y’Omosangererekano, akagenda Yerusalemu na akaba okogambera Abaisraeli.
ⅩⅣ Sulemani agasangereria amo chigari ne chibarasi chikoriinwa; nigo abwate chigari elifu eyemo, na amagana ane (1,400), ne chibarasi chikoriinwa chilifu ikomi na ibere (12,000). Echinde ase echio nigo chiabegetwe ase emechie ye chigari, na echinde chikabekwa Yerusalemu, ang’e nase omorwoti amenyete.
ⅩⅤ Omorwoti akarenta chifeta ne chitaabu chinyinge agwo Yerusalemu, chikabucha buna amagena; ne chibao chi’emecharake chiarenge chinyinge buna echi’emeko yarenge ase ense omweya.
ⅩⅥ Sulemani nigo arenge korenterwa chibarasi korwa Misiri na korwa Kue; na abaonchoreria baye nigo barenge gochirenta korwa agwo ase ogochiakanera rigori gete.
ⅩⅦ Bakarenta chigari korwa Misiri ase ogoakanera kera eyemo chisekeli amagana atano na rimo (600) chi’echifeta, na ebarasi eyemo nigo yare goakanerwa chisekeli rigana erimo na emerongo etano (150); boigo abarwoti bonsi b’Abahiti na ab’Abasiiria nigo barenge kogora chigari ne chibarasi goetera ase abaonchoreria ba Sulemani.