ⅩⅢ
Abiya okorwania Yeroboamu esegi
(1 Abar 15:1)
Ⅰ Ase omwaka o ikomi na gatano na gatato bw’okogamba kw’omorwoti Yeroboamu, Abiya agachaaka kogambera Abayuda.
Ⅱ Akagamba ase engaki y’emiaka etato agwo Yerusalemu. Ng’ina nigo arenge korokwa Mikaya, mosubati o Urieli, korwa Gibea.
Esegi yarenge gati y’Abiya na Yeroboamu.
Ⅲ Abiya akagenda korwana esegi, akaira abasikari chilifu amagana ane (400,000), abanto chituoni chi’esegi bachoretwe, korende Yeroboamu agacha komorwania, akaroberia abarwani baye b’esegi chilifu amagana atano na atato (800,000), abanto chituoni.
Ⅳ Na Abiya agatenena igoro ase egetunwa gia Semaraimu, agwo ase ense y’ebitunwa y’Efraimu, akabora, “Aye Yeroboamu, nainwe Abaisraeli mwensi, ntegerera moigwe!
Ⅴ Inee! Inwe timomanyeti ng’a Omonene, Nyasae bw’Abaisraeli, nigo aete Daudi, amo nororeria rwaye, oborwoti bw’Abaisraeli bobe ase bare kare na kare, ase enchera y’okobwatana kw’ogotianania kw’omonyoo?
Ⅵ Korende Yeroboamu, mosinto o Nebati, omosomba o Sulemani, mosinto o Daudi, akarega omonene oye omorwoti, akaanga komoigwera.
Ⅶ Abanto bande abachorochombu, abanto ababe, bagasangererekana ase Yeroboamu, bakaba abaengereria abakong’u ase Rehoboamu, mosinto o Sulemani, ekero Rehoboamu arenge omoyia ataranara emeremo yaye, na tarenge konyara kobabua.
Ⅷ Bono inwe igo morengereretie korwania oborwoti bw’Omonene bore ase amaboko ’abaanto b’ororeria rwa Daudi, ekiagera more omoganda omonene, naende ekiagera mobwate emegwekano ye chimori ye chitaabu eria Yeroboamu abaroiseirie ekaba chinyasae chiaino.
Ⅸ Inee! Inwe timwaseria abakuani b’Omonene, abanto b’ororeria rwa Aroni, na Abalawi, na mwebekire abakuani baino, buna abanto b’echinse chinde bagokora? Bono omonto onde bwensi okorenta eeri ensae, gose chimingichi isano na ibere, gwatananwa na gochenwa, oyio nigo akoba Omokuani bwe chinyasae chitari Nyasae bori.
Ⅹ “Korende ase tore intwe, Omonene nere Nyasae oito, na intwe titomotigeti. Intwe ntobwate abakuani bagokorera Omonene, baria bare b’ororeria rwa Aroni na Abalawi abare gokora emeremo yabo.
Ⅺ Kera emambia na omogoroba nigo baare koruera Omonene ebing’wanso bi’ogosambwa na gosambera ubani ere nogotioka okuya, naende babeka igoro y’emesa y’etaabu emegati ekoruegwa ase Nyasae. Naende nigo barendete ebibekerero bie chitaaya biroisirie korwa ase chitaabu, erinde chitaaya chiria chigenderere gwoka kera omogoroba. Intwe nigo torendete amang’an’Omonene, Nyasae oito, achigete, korende inwe mwamotigire.
Ⅻ Rora Nyasae nigo are amo naintwe, nere ototang’aine, na abakuani baye nigo babwate ebitureeri biabo bi’esegi bakobibugia, bagotorangeria tobarwanie inwe esegi. Inwe Abaisraeli, timobaisa korwana n’Omonene, Nyasae bwe chisokoro chiaino, ekiagera timokonyara kobua.”
ⅩⅢ Yeroboamu konya otomire abarwani baetanane na koumokera Abayuda korwa magega; igo abarwani baye b’esegi bakaba bosio bw’Abayuda na baria batometwe nigo barenge magega yabo.
ⅩⅣ Ekero Abayuda barigereretie bakarora ng’a esegi nigo yarenge bosio bwabo na magega abo, na igo bakarera ase Omonene, na abakuani bakabugia ebitureeri biria.
ⅩⅤ Abanto ba Yuda bagaaka amariogi amanene ay’esegi; na ekero Abayuda barenge kwoga, Nyasae akabua Yeroboamu na Abaisraeli bonsi, ase obosio bw’Abiya na ase Abayuda.
ⅩⅥ Erio Abaisraeli bagatama korwa ase Abayuda, na Nyasae akababeeka ase amaboko ’Abayuda.
ⅩⅦ Abiya amo nabaanto baye bagaita Abaisraeli ase ogoita okonene mono. Abanto baitetwe nigo barenge chilifu amagana atano (500,000), abanto abachore.
ⅩⅧ Igo Abaisraeli bakabugwa bakabeekwa inse y’obogambi bw’Abayuda, na Abayuda nigo babuete ekiagera basemeretie Omonene, Nyasae bwe chisokoro chiabo.
ⅩⅨ Abiya akabwatia Yeroboamu, akamoura emechie eye: Beteli, na Yesana, na Efuroni, amo nebichie biabo.
ⅩⅩ Yeroboamu tanyorete chinguru chi’okoirania oborwoti bwaye ase amatuko Abiya arenge kogamba, korende Omonene akamoaka erinde agakwa.
ⅩⅪ Abiya akanyora chinguru chinyinge, akanyuoma abakungu ikomi na baane; akaiborerwa abana abamura emerongo ebere na babere, na abaiseke ikomi na batano nomo.
ⅩⅫ Amang’ana ande onsi igoro y’Abiya ne chinchera chiaye, ne chinkwana chiaye, nigo ariikire ase omogano bw’omobani Ido.