RIRUUBE RIA PAULO OMOTOMWA ASE
ABARUMI
Ogochaakera
Riruube ria Paulo gochia ase Abarumi nigo riarigetwe koarigania ogotaara okwo Paulo aroberetie gokora gochia ase ekanisa ya Rumi. Omoroberio oye nigo orenge akore emeremo gati y’abakristo ekero egeke, na goetera ase ogokonya kwabo agende Spaini. Nigo ariigete riruube eri erio kowerera buya eki amanyete igoro y’okwegena kw’omokristo na keria keganeirie ase obogima bw’omokristo. Egetabu eke nigo kebwate enkwana engikeranu igoro y’amang’ana aye.
Nyuma y’ogokwania abanto b’ekanisa ya Rumi nakobateebia igoro y’ogosaba kwaye ase bare, Paulo nigo agokwanera igoro y’ekerenga ki’eriruube: “Enchiri nigo ekorokia buna Nyasae agokora akobeeka abanto buya gochia ase are: aya ngoetera ase okwegena korwa omochakano goika omoerio” (1:17).
Eri neriruube riarigetwe ase ekanisa yare ase omochie o Rumi goetera ase omotomwa Paulo. Rumi nigo orenge omochie omonene ase ense engima ase ekiare egetang’ani gi’Ekanisa. Aiga buna koreng’ana ere ase ebiare bionsi, abanto b’ebisaku bionsi nao barenge koumerana ase amang’ana y’eserekari, ebiasara, amasoomo, okoenoka, nonya n’edini. Abanto nigo bare korua chinsinyo inye chi’ense basoa na gosoka kwa ase omochie oyio.
Okobagwa kw’egetabu eke
Ogochaakera na ekerenga ki’egetabu eke 1:1-7
Okoganerigwa ng’a Mwanyabaanto ng’a baegwe ogotooreka 1:18—3:20
Enchera ya Nyasae y’ogotooria Mwanyabaanto 3:21—4:25
Obogima oboyia ase okoba ime ya Kristo 5:1—8:39
Abaisraeli mbare ase omooroberio o Nyasae 9:1—11:36
Orogendo rw’Abakristo 12:1—15:13
Ogokoorera na amakwania a Paulo omonyene 15:14—16:27
Ⅰ
Amakwania
Ⅰ Korwa ase inche Paulo, omosomba o Kristo Yeso, n’omotomwa nachoretwe nakorangerigwa, korandia enchiri ya Nyasae,
Ⅱ eye Nyasae atang’anete koria eira ase emenwa y’ababani baye ase amariiko amachenu.
Ⅲ Eye nenchiri igoro y’Omwana oye Yeso Kristo, Omonene oito. Ere akaiborwa buna Mwanyabaanto ase ororeria rwa Daudi,
Ⅳ naende ase okobokigwa korwa ase abakuure na ase chinguru chi’Omoika bw’Obochenu akaorokigwa koba Omwana o Nyasae.
Ⅴ Asare ere ntwanyorete obuya na obotomwa, erio ase engencho y’erieta riaye tworokererie abanto b’ebisaku bionsi, erinde banyare koba nokoigwera gw’okwegena
Ⅵ amo nainwe abanyene, inwe abamwarangeretigwe koba aba Yeso Kristo.
Ⅶ Nabariikeire inwe mwensi abamomenyete Rumi, abanchwa ba Nyasae, abamwarangeretigwe koba abachenu.
Obuya bobe ase more na omorembe bikorwa ase Nyasae Tata oito, na ase Omonene Yeso Kristo.
Ogosaba kw’ogoaka mbuya mono
Ⅷ Ritang’ani naakeire Nyasae one ng’a mbuya mono ase Yeso Kristo ase engencho yaino inwe mwensi, ekiagera okwegena kwaino kwamanyekanire ase ense yonsi.
Ⅸ Inaki Nyasae, oyo ’ngokorera ase omoika one korandia enchiri y’Omwana oye, nere kirori one ng’a tintigeti kobaatora botambe ase ogosaba kwane.
Ⅹ Botambe nigo ngosaba ng’a Nyasae karanche konyigorera enchera engiya, inchiche ase more.
Ⅺ Nigo inde n’amaiga kororana nainwe na kobaa ekeegwa ase enchera y’Omoika Omochenu, erio mobekwe chinguru,
Ⅻ erinde toremanie inche nainwe, kera omonto ase okwegena kw’oyonde, okwaino na okwane.
ⅩⅢ Korende abaminto, nindigetie momanye ng’a ekero ase ekero nigo narengereretie gocha ase more (korende ngatangeka goika bono) erinde inyore okwama ase egati yaino, buna inde nakwo ase abanto b’Ebisaku binde.
ⅩⅣ Ase ayio ninde n’esiira ase Abagiriki na ase abatari Abagiriki, ase abanyasemi na ase abariri.
ⅩⅤ Ase ensemo yane nigo nganetie mono korandia enchiri nonya nase more abamomenyete Rumi.
Chinguru chi’enchiri
ⅩⅥ Inaki tinkororera enchiri obosooku, ekiagera ero n’okobua kwa Nyasae gokorenta ogotooreka ase onde bwensi oyo bwegenete, ritang’ani ase Omoyahudi, na ase Omogiriki boigo.
ⅩⅦ Ekiagera ime yaye oboronge bokorwa ase Nyasae bwaorokiigwe korwa okwegena goika okwegena, buna eriikire, “Omonyene oboronge nabe moyo ase okwegena.”
Obobe bw’ abanto b’Ebisaku
ⅩⅧ Inaki endamwamu ya Nyasae yaorokiigwe korwa igoro, ase ogotamoiroka Nyasae gwonsi na obobe bwa Mwanyabaanto, abagotanga ekeene nobobe bwabo.
ⅩⅨ Bono ayaranyare komanywa igoro ya Nyasae aorokigwe ase bare, ekiagera Nyasae nabaorokeretie.
ⅩⅩ Inaki chingencho chiaye, echi chitari kororekana, engencho yaye okobua kwaye gwa kare na kare, na obonyasae bwaye, nchimanyekanete korwa ase ogotongwa gw’ense ase ebinto atongete. Ase igo tibari naya bagotaamera.
ⅩⅪ Inaki nonya bamanyete Nyasae, tibamosigete buna Nyasae, gose komoakera ng’a mbuya mono; korende ebirengererio biabo bikaba bosa, na emioyo yabo y’oboriri ekabekwa omosunte.
ⅩⅫ Bagateeba ng’a mbare nobong’aini, korende bakaririeka.
ⅩⅩⅢ Bakaonchoreria obonene bwa Nyasae, oyotari n’ogosareka, ase omogwekano bw’ekieni kia Mwanyabaanto oyore nogosareka, na oyobwechinyoni, na bwe ching’iti chire n’amagoro ane, na bwe ching’iti chikwagura.
ⅩⅩⅣ Ase ayio Nyasae akabatiga ase okogania okobe gwe chinkoro chiabo, batunyane obonyaka goika bagasarerania ogosika ase emebere yabo barabwo ase barabwo,
ⅩⅩⅤ ekiagera batigete ekeene kia Nyasae, bagachoora oborimo, bagasasiima na gokorera ebitongwa ribaga ri’Omotongi, oyorabaakwe kare na kare! Amina.
ⅩⅩⅥ Ase engencho eyio Nyasae akabatiga batunyane okogania kwabo kw’obosooku, goika abakungu babo bakaonchoreria okomenyana kw’omobere kwa boronge ase oko gotari kwa boronge.
ⅩⅩⅦ Na abasacha boigo bagatiga okomenyana nabakungu kwa boronge, bagasambwa ase okorigania abasacha ase abasacha, bagakora ogokora kw’obosooku, bakanyora abanyene ogoakanwa kwa boronge kw’ogosaria kwabo.
ⅩⅩⅧ Ekiagera batabarete ng’a ngento komomanya Nyasae, Nyasae akabatiga ase ebirengererio bie chingencho chiabo chimbe, bakore aya’atagwenereti.
ⅩⅩⅨ Bagaichorwa ne chingencho chionsi chitari boronge, na obobe, na okogania okobe, na okorengereria okobe, ne ribero, na oboiti, na eriomana, na obong’ainereria, na okogeechana. Bakaba abagenkani,
ⅩⅩⅩ abaitania, abamogechete Nyasae, abachaayi, abaenenu, abetogia, abaroisia amabe, abatari koigwera abaibori babo,
ⅩⅩⅪ abariri, abatari abegenwa, abatari nobwanchani, abatari n’amaabera.
ⅩⅩⅫ Barabwo abanyene mbamanyete mono ekiina kia Nyasae kia boronge, ng’a abagokora ayaiga nebagwenerete amakweri; tibakorete aya oka, korende nigo bagwancherana nabwo bakoyakora.