Ⅲ
Ⅰ Gaki rende, Omoyahudi inki abuete abande? Na okwaroka inki kogwenerete?
Ⅱ Nkogwenerete mono ase kera enchera. Ritang’ani, Abayahudi mbegenetwe konyora ring’ana ria Nyasae.
Ⅲ Inki rende onye abande tibari abegenwa? Inee! Ogotegenwa kwabo nakonyaare gokora obwegenwa bwa Nyasae bobe bosa?
Ⅳ Yaya, taibo! Goika Nyasae amanyekane ng’a nomonyene ekeene, nonya ’nkera omonto ore omorimo, buna eriikire,
“Erinde omanyekane ng’a mboronge ore ase amang’ana ao, na obue ekero ogosoa ase ekiina.”
Ⅴ Korende ker’abe ng’a obobe bwaito bokoorokia oboronge bwa Nyasae, inki torateebe rende? Nyasae noy’otari omooronge ekero akorenta endamwamu? (Nakwanire buna Mwanyabaanto).
Ⅵ Yaya, taibo! Onye nabo, inaki rende Nyasae aranyare kogaambia ense?
Ⅶ Korende onye oboene obonge bwa Nyasae bwamentekire ase obonene bwaye ase engencho y’oborimo bwane, nase ki inche nonya mbono nkona‐kogambigwa buna omonyene ebibe?
Ⅷ Inaki rende totagokora obobe, erinde obuya boche? Buna abande bagoteeba ase ogotoitania. Okogambigwa kwabo nigo kore boronge.
Onde tari ore omooronge
Ⅸ Ninki rende? Intwe Abayahudi n’abaya tore kobua abande? Yaya, nonya ng’ake! Inaki nasoereire Abayahudi amo n’Abagiriki ng’a bonsi nigo bare inse y’okobua kw’ebibe;
Ⅹ buna eriikire ng’a,
“Onde tari omonyene oboronge, nonya noyomo;
Ⅺ onde tari okomanya,
onde tari okorigia Nyasae.
Ⅻ Bonsi bachiire bogeeka korwa ase Nyasae, bonsi babeire bosa;
onde tari oy’ogokora amaya, nonya n’oyomo.
ⅩⅢ Emioyo yabo noboina bwasie,
ase emenwa yabo nigo bagokwana obong’ainereria,
obosongo bwe ching’iti nigo bore ase ebikoba bi’emenwa yabo.
ⅩⅣ Emenwa yabo yaichoirwe nokoragereria na obororo,
ⅩⅤ amagoro abo nigo are amaango ase ogoitera amanyinga,
ⅩⅥ obosareku na emechando nigo bire ase chinchera chiabo.
ⅩⅦ Enchera y’omorembe tibayemanyeti.
ⅩⅧ Okomoiroka Nyasae tikori ase amaiso abo.”
ⅩⅨ Twamanyire ng’a amang’ana onsi agokwanwa n’amachiiko nigo agokwanwa ase baria bare inse y’amachiiko, erinde kera omonwa osiekwe, na ense yonsi ebekwe inse ase ekiina kia Nyasae.
ⅩⅩ Inaki ase ogokora kw’amachiiko onde tari ase Mwanyabaanto oranyare konyora oboronge ase obosio bwa Nyasae, ekiagera amachiiko n’aro akorenta okomanya ebibe.
Buna tokobekwa boronge ase Nyasae
ⅩⅪ Korende bono oboronge bwa Nyasae bwaorokigwe machiiko ataiyo, obwaberetwe kirori namachiiko na ababani,
ⅩⅫ engencho yaye oboronge bokorwa ase Nyasae obo bogocha ase enchera y’okomwegena Yeso Kristo ase bonsi abegenete. Inaki gwatananekana tikori,
ⅩⅩⅢ ekiagera bonsi bakorire ebibe, na baremeirwe n’obonene bwa Nyasae;
ⅩⅩⅣ baeirwe oboronge buna ekeegwa ase obuya bwaye, ase enchera y’okoboorigwa kore ime ase Kristo Yeso.
ⅩⅩⅤ Ere Nyasae omobekire koba ekeng’wanso gi’okobwatania ase amanyinga aye, erinde tomonyoore ase enchera y’okwegena. Igo Nyasae oorokirie oboronge bwaye, ekiagera ase okoremereria kwaye atigete ebibe biria biatang’anete.
ⅩⅩⅥ Ekero ekeiga oorokirie ng’a ere nomonyene oboronge, naende nere okomoa oboronge oyo okomwegena Yeso.
ⅩⅩⅦ Ng’ai rende ogwetogia gwaito kore? Kende tikeri. Ase ogochika ki? Ase ogochika kw’ogokora? Yaya, korende ase ogochika gw’okwegena.
ⅩⅩⅧ Naboigo, tokobara ng’a omonto nigo akoegwa oboronge ase okwegena kore ao nogokora kw’amachiiko.
ⅩⅩⅨ Gose Nyasae nigo are Nyasae bw’Abayahudi boka? Tari Nyasae bw’Ebisaku boigo? Ee, ere ’Nyasae bw’Ebisaku boigo.
ⅩⅩⅩ Inaki Nyasae noyomo, oranyare koa Abayahudi oboronge ase okwegena, na abanto b’ebisaku ase enchera y’okwegena.
ⅩⅩⅪ Inee! Ntwaonchoire amachiiko abe bosa ase okwegena okwo? Yaya, taibo! Nigo togwanchera amachiiko.