Ⅸ
Ogwechaanda gwa Paulo ase engencho y’ogoteegena kw’Abaisraeli
Ⅰ Nigo ngokwana ekeene ase Kristo, tindi goteeba oborimo. Okomanya gw’enkoro y’ane ime, gokwamorekirwe n’Omoika Omochenu, kwambereire kirori,
Ⅱ ng’a ninde nobororo obonge na ogwechanda kogendererete ase enkoro y’ane.
Ⅲ Inaki nanga naganetie ng’a ndagererigwe inche omonyene na gwatananwa korwa ase Kristo ase engencho y’abaminto abare b’eamate y’ane ase egesaku giaito.
Ⅳ Barabwo n’Abaisraeli, bakorirwe koba Abana ba Nyasae, barorire, obonene, bancheirwe okobwatana, baeirwe amachiiko ne ribaga ri’ogosasiima Nyasae, baeirwe ne chiira chiaye.
Ⅴ Inaki abagaaka baito ba kare nabaabo, na korwa ase bare Kristo nao aiboretwe buna Mwanyabaanto; ere nigo are Nyasae igoro ase ebinto bionsi, oy’orabakwe goika kare na kare. Amina.
Chiira chia Nyasae tichiamochete goikeranigwa
Ⅵ Tari ng’a ring’ana ria Nyasae ndiasinyire goikeranigwa. Inaki tari bonsi abare b’egesaku ki’Abaisraeli bare Abaisraeli b’ekeene;
Ⅶ gose tari bonsi bare abana ba Aburaamu ekiagera baruete ase oroiboro rw’aye, otatiga, “Ase Isaka oroiboro rwao narwatorwe.”
Ⅷ Engencho yaye, tari abana b’ororeria bare Abana ba Nyasae, korende n’abana b’eira bakobarwa ng’a noroiboro rw’aye.
Ⅸ Inaki ring’ana ri’eira neri, “Ekero kenga buna eke ninchiche, inyore ng’a Sara onyorire omwana omoisia.”
Ⅹ Gose tari igo rioka, korende Rebeka nere nabogoretie oborito ase omosacha oyomo, nere Isaka sokoro yaito.
Ⅺ-Ⅻ Inaki ekero abana baria konya bataraiborwa na batarakora amaya gose amabe, ng’ina nigo atebetigwe, “Oyo omonene namokorere oyio omoke.” Igo omoroberio o Nyasae bw’ogochoora goika ogenderere, tari ase engencho y’ogokora kw’ abanto, korende ase okorangeria kwaye.
ⅩⅢ Inaki nigo eriikire, “Namwanchete Yakobo, korende nkamogeecha Esau.”
Nyasae n’omonyene oboronge
ⅩⅣ Ninki rende torateebe? Ogotaba boronge nkore ase Nyasae? Yaya, taibo!
ⅩⅤ Inaki nigo atebeetie Musa, “Nimororere amaabera ere oyo ndarorere amaabera, na nimororere amabeebe ere oyo ’ndarorere amabeebe.”
ⅩⅥ Ase igo, tari ng’a nigo ere ase ogwancha kw’omonto, gose nokw’oria ogokora omokia, korende nokw’oria okororera amaabera, nere Nyasae.
ⅩⅦ Inaki amariiko nigo agoteeba ase Farao, “Nigo nagotenenetie, erinde nyorokie okobua kw’ane ase ore, na erieta riane nario rirararigwe ase ense yonsi.”
ⅩⅧ Ase igo, oyo arigetie kororera amaabera, nigo akomoororera amaabera, na oyo arigetie gokora abe omokong’u ase enkoro yaye, nigo akomokora abe omokong’u.
Nyasae n’omogaambi omonene
ⅩⅨ Aande gose nonteebie, “Nase ki nonya mbono Nyasae akonyora okomocha ase Mwanyabaanto? Inaki ning’o oranyare koamereria okorigia kwaye?”
ⅩⅩ Mwanyabaanto, aye naye ng’o okoiraneria Nyasae? Inee! Egento getongire nakemoteebie oyogetongete, “Ninki gwankorerete iga?”
ⅩⅪ Gose omokori chinyongo tari n’okobua igoro ase esike, ase ribomba ri’esike gokora egento ekemo eki’ogosikwa, na ekende kebe getari nogosikwa?
ⅩⅫ Inaki rende onye Nyasae okorigia koorokia endamwamu yaye, na komanyia abanto okobua kwaye, na ase oboremereria obonge akabogorerania n’ebinto biria bi’endamwamu biakorirwe ase ogosareka,
ⅩⅩⅢ erinde aorokie obonda bw’obonene bwaye, ase ebinto biria bi’amaabera ebiaroisetie korwa kare binyore obonene?
ⅩⅩⅣ Abwo nintwe, twarangeretigwe nere, tari korwa ase Abayahudi boka, korende nonya nkorwa ase abanto b’Ebisaku boigo.
ⅩⅩⅤ Naboigo akwanete ase egetabu ya Hosea,
“Abanto baria batarenge abanto baane,
nimbaroke abanto baane;
na oyotarenge omwanchwa one,
nimoroke omwanchwa one.”
ⅩⅩⅥ “N’abe aase aria barabwo bateebetigwe: Inwe timori abanto baane,
abwo inabarokwe abana ba Nyasae ore moyo.”
ⅩⅩⅦ Isaya nere ogoaka eriogi riaye igoro y’Abaisraeli, ogoteeba, “Omobaro bw’Abaisraeli n’oba buna omokenye ore nyancha, abatigari nabwo boka barache gotoorigwa;
ⅩⅩⅧ inaki Omonene n’ache ase ense agaambe ekiina, akenache na kogekoora.”
ⅩⅩⅨ Naende buna Isaya atang’anete gokwana.
“Onye Omonene bw’Emeganda atatotigerete oroiboro,
nanga nigo twabeete buna Sodomu,
na koreng’anigwa na Gomora.”
Ekiagerete Abaisraeli bakagwa
ⅩⅩⅩ Ninki rende torateebe? Ng’a abanto b’Ebisaku, abatarenge korigia oboronge ’mbanyorete oboronge boria bw’okwegena;
ⅩⅩⅪ korende Abaisraeli abare korigia oboronge bokorwa ase amachiiko, tibaikerete oboronge boria.
ⅩⅩⅫ Nase ki? Ekiagera tibarenge koborigia ase enchera y’okwegena, korende nase enchera y’ogokora, bakagochwa igoro ase rigena riria rikogocha;
ⅩⅩⅩⅢ buna eriikire,
“Rigereria, nabekire ase Sayoni rigena riragoche abanto,
na egetare kerabaiyerie inse,
na onde bwensi oramwegene takorora obosooku.”