EGETABU KIA
RUTU
Ogochaakera
Egetabu eke gia Rutu nigo kere egetabu ekieng’e ekio keeire erieta riomonto oyomo bw’engencho mono okorokwa Rutu. Okomanyekana kwa Rutu nigo gokorigererigwa ase chinsemo ibere. Ritang’ani kabisa Rutu nomokuungu (ebitabu binde ase ebiblia bimanyekanete ase erieta riomokuungu ne’getaabu kia Esiteri na keria kia Yuditi). Eriakabere Esiteri nigo arenge Omoisraeli korende Rutu ere tarenge Moisraeli, nakio gekogera ekwana yaye gochia ase ng’ina biara ase Rutu 1:16 ere eyengencho enene, “Nyasae oo nabe Nyasae one”. Eke nakio gekogera Rutu akoorokigwa koba omonto bw’engencho mono na kobarwa koba oyomo bwe’mate ya Daudi.
Egetabu eke gia Rutu nigo gekobwatia egetabu kia’Bagambi kobwatekana nomoroberio bwebitabu ase Esuputuajinta, kero kende nase engencho yomogano oyio okwanetwe agwo ritang’ani oyio ogokwana chingaki chiria abagaambi bare kogamba Israeli. Korende ase egetabu ya Baiberania egetabu kia Rutu nigo kere gati ya egetabu kia Emebayeno na keria kia ogoteera gwa Sulemani
Eganga enene yegetabu kia Rutu nokoorokia Omuya bw’omonene Nyasae gochia ase abanto baye ense engima. Nigo kegotoorokia buna omonene Nyasae aerogetie koba Nyasae bw’abaanto bonsi goetera ase Rutu omomoabu oyio otigete Chinyasae chia sobo na gochora kobwatia Nyasae bw’Abaisraeli.
Okobagwa kw’egetabu eke:
Naomi okoirana gochia Bethlehemu na Rutu 1:1-22
Rutu okoumerana na Boazi 2:1—3:18
Boazi ogotwara Rutu 4:1-22
Ⅰ
Elimeleki na abanto baye bakong’anya gochia Moabu
Ⅰ Ase amatuko aria, ekero abagaambi ebiina barenge kogambera Abaisraeli, enchara enene ekaba ase ense yabo. Ase ayio, omonto oyomo o Bethlehemu, y’Aboyahudi, akaimoka amo na mokaye na abamura baye babere, akagenda komenya ase ense y’Abamoabu.
Ⅱ Omonto oria nigo arenge korokwa Elimeleki, na mokaye Naomi, na abamura baye babere Mahaloni na Kilioni. Barabwo nigo barenge Abaefarati ba Beteremu ya Boyahudi. Barabwo bakang’anya gochia ense ya Moabu bakamenya aroro.
Ⅲ Elimeleki omosacha o Naomi agakwa, agatiga Naomi ore omotakaanwa, ore nabamura baye babere.
Ⅳ Barabwo bakanyuoma abaiseke b’Abamoabu; oyomo nigo are korokwa Oripa na oyonde Rutu. Magega kabamenyire aroro koreng’ana emiaka ikomi,
Ⅴ Mahaloni na Kilioni nabarabwo bagakwa. Igo Naomi agakwerwa omosacha oye na abamura baye babere.
Naomi na Rutu bakoirana gochia Bethlehemu
Ⅵ Naomi kare agwo ase ense y’Abamoabu akaigwa ng’a Omonene ororeire abanto baye amaabera, obaeire endagera naende; ase ayio akamanora korua ense eria amo na baka bamura baye babere.
Ⅶ Barabwo bagatiga aase aaria bamenyete, bagachaaka orogendo koirana gochia ase ense y’Abayuda,
Ⅷ Naomi agateebia baka bamura baye babere ng’a bairane, na kera oyomo agende komenya mwa ng’ina. Naende akabora, “Tiga Omonene abakorere amaya, buna inwe mwakoreire baria bakuure, boigo nainche mwankoreire.”
Ⅸ Omonene abanchere kera oyomo oino anyuomwe naende, na anyore mwaye.
Erio Naomi akabanyunyunta ase okobatiga. Korende barabwo bagachaaka korera mono,
Ⅹ bakamoteebia, “Yaya, titokogotiga! Nigo torigetie kogenda amo naye ase abanto baino.”
Ⅺ Korende Naomi akabairaneria, akabateebia, “Abana baane, irana mogende seino! Nase ki moganetie kogenda amo nainche? Inee! Ninyare naende korwa ase enda yane koibora abana bagochia kobanyuoma?
Ⅻ Abana baane, irana mogende seino, ekiagera inche nagotire mono, tinkonyuomwa naende. Nonya nare korengereria ng’a ninde nogosemeria, na onye nare konyora omosacha reero, nyibore abana abamura.
ⅩⅢ Inee, nkoganya mware goika bakine? Gose ngwetanga mware timonyuomwa nabasaacha bande? Taibo, abana baane! Amang’ana ane namakong’u mono ase more ase engencho Omonene ong’onchokeire.”
ⅩⅣ Naende bagachaaka korera mono goetania. Erio Oripa akanyunyunta ng’ina biara, akamotiga, korende Rutu akaanga komotiga.
ⅩⅤ Ase igo Naomi agateebia Rutu, “Naama! Oripa, moka momura omwabo omosacha oo, oiranire ase abanto baye, na ase enyasae yaye. Naye irana, mogende komo!”
ⅩⅥ Korende Rutu akamoiraneria, “Tagonsorora ng’a ngotige. Tiga ngende amo naye. Aande onsi ase aye ogochia, nainche nao ndachie; na aande onsi ase aye oramenye, nainche nao ndamenye. Abanto bao mbabe abanto baane, na Nyasae oo nabe Nyasae one.
ⅩⅦ Aase aye orakwere, nainche nao ndakwere, na ntindekwe aroro. Tiga Omonene ang’e egesusuro ekenene kegima bono na kogenderera onye gento kende kegochia konyatanana korwa asore, otatiga amakweri oka.”
ⅩⅧ Ekero Naomi arooche ng’a Rutu bwerure kogeenda amo nere, takwana gento kende.
ⅩⅨ Ase igo barabwo babere bakagenderera orogendo rwabo, goika bagaika Bethlehemu. Ekero baigete aroro, abanto bonsi b’omochie bakaeegaeega ase engencho yabo, na abakungu bakaboorania, bagoteeba, “Inee! Oyo Naomi?”
ⅩⅩ Naomi akabateebia, “Timondoka Naomi, ndoke Mara, ekiagera Nyasae Omobui ondeteire obororo obonge.”
ⅩⅪ Ekero nagendete nigo narenge omonda, korende Omonene ong’iranirie inde namaboko amasa. Nase ki rende mokondoka Naomi bono, ekero Omonene Omobui ang’onchokeire na ondeteire amaakwa?
ⅩⅫ Naboigo Naomi airanete korwa ase ense y’Abamoabu amo na Rutu, oria Omomoabu, moka momura oye. Barabwo bagaika Bethlehemu ekero abanto konya bachakire kogesa esairi.