OKOMAANOKA KWA YOHANA
Ogochaakera
Egetabu eke giokomanoka kwa Yohana nigo kiarigetwe chingaki abakristo bare gochandwa ase engencho yokwegena kwabo ime ya Yeso Kristo Omonene. Ekerenga ekenene kiomoriki nokoa abasomi baye ogosemeria boigo nakobabeeka chinguru nakobaboria bagenderere koba abegenwa ase chingaki chigochandwa boigo nagochandeka ase engencho ya Yeso.
Ase omochakano nigo togotebigwa buna okomaanoka oko nigo kwaruete ase Nyasae goetera ase Kristo, oyio ore omonene goetenia abagaambi bonsi ense eye kogacha ase Yohana ase enchera ya amaroro nechindoto. Boigo nigo gokobeka chinguru ogokwa kwa Yeso ase omosalaba okwo gwatosiborete twensi korwa ase ebibe okoboka kwaye boigo nogosemeria gwokoirana kwaye eriakabere ase ense, ekero Nyasae agocha gosaria ababisa baye bonsi amo na Saitani. Ase chingaki echio Nyasae nabae abegeeni baye eng’eria yobogima bwa kare na kare erio nakore igoro enyia na ense enyia ase abachore baye barabe goika kare na kare.
Okobagwa kw’egetabu eke
Ogochaakera 1:1-8
Okorora kw’eritang’ani na amarube ase chikanisa isano na ibere 1:9—3:22
Egetabu eke nebimanyererio bitano na bibere 4:1—8:1
Ebirombeta bitano na bibere 8:2—11:19
Enchoka ne ching’iti ibere 12:1—13:18
Amaroro ao ao 14:1—15:8
Ebitaabo bitano na bibere bire nendamwamu ya Nyasae 16:1-21
Ogosirigwa kwa Babiloni, na okobugwa kw’eng’iti na okw’omobani bw’oborimo, na ogwa Saitani 17:1—20:10
Ekiina ki’omoerio 20:11-15
Igoro aayia, na ense enyia, na Yerusalemu omoyia 21:1—22:5
Ogokoorera 22:6-21
Ⅰ
Ⅰ Oko nokomaanoka kwa Yeso Kristo oko Nyasae amoete, erinde arokie abasomba baye amang’ana agwenerete gocha gokoreka bwango. Ase ogotoma omomalaika oye akoorokia omosomba oye Yohana,
Ⅱ oyorenge kirori ase ring’ana ria Nyasae na ase oborori bwa Yeso Kristo, ase ogoteeba amang’ana onsi ayaroche.
Ⅲ Nare nomogoko ere oyogosoma, na abwo bakoigwa amang’ana obobani obo, na kobwata ayarikireo, ekiagera engaki ng’ang’e ere.
Amakwania gochia ase chikanisa isano na ibere
Ⅳ korwa ase Yohana gochia ase chikanisa isano na ibere chi’Asia:
Obuya bobe ase more na omorembe bikorwa ase Nyasae ere oyoreo, na oyorengeo, na oyorache kobao, na korwa ase emeika etano na ebere ere bosio bw’ekerogo kiaye ki’obonene,
Ⅴ na korwa ase Yeso Kristo, oyore kirori omwegenwa, omoiborwa bw’eritang’ani oyobogete korwa ase abakuure, omogambi bw’abarwoti b’ense.
Asare ere oyotwanchete na agatobooria korwa ase ebibe biaito namanyinga aye ase ogotokwera,
Ⅵ oyotokorete koba ab’oborwoti na abakuani ase Nyasae Ise oye asare ere obonene na okobua goika kare na kare. Amina.
Ⅶ Rigereria, ngocha are namare, na kera eriso narimorore, nonya nabwo bamoitete, na abanto b’ebisaku bionsi bi’ense nabeng’ererie ase engencho yaye. Ee, nabo. Amina.
Ⅷ “Inche n’Alifa na Omega,” Omonene oteebire, oyoreo, na oyorengeo, na oyorache kobao.
Oborori igoro ya Kristo
Ⅸ Inche Yohana, momura omino, na omobwatani amo nainwe ase emechando, na ase oborwoti, na ase okoremereria amo na Yeso, nigo narenge ase egesinka gekorokwa Patimo, ekiagera nigo narenge koraria ring’ana ria Nyasae na komobera Yeso kirori.
Ⅹ Ase rituko ri’Omonene nigo nabogoretigwe n’Omoika, nkaigwa korwa magega aane eriogi rinene, buna eriogi ri’egetureeri,
Ⅺ rigoteeba, “Aya orarore oyarike ase egetabu, oyatome ase chikanisa echi isano na ibere echire Efeso, na Sumurina, na Perigamo, na Tiatira, na Saridi, na Filadelfia, na Laodikia.”
Ⅻ Nkeonchora ndore eriogi riria rigokwana nainche. Ngachia kweonchora nkarora ebibekerero bie chitaaya bitano na bibere bie chitaabu,
ⅩⅢ na gati‐gati y’ebibekerero biria nkarora oyomo onga buna omwana o Mwanyabaanto, obekeire eanga entambe eigete inse ase ebisanyi bi’amagoro, na bweboeretie orokini rw’etaabu gekuba kiaye.
ⅩⅣ Etukia yaye nigo yarenge endabu se buna amarionya amarabu, ebirabu se buna amagena embura; na amaiso aye nigo arenge buna ekebemberi ki’omorero.
ⅩⅤ Na amagoro aye nigo arenge buna etai esenirie koyasibigwe ase eriko ri’omorero, na eriogi riaye buna eriogi ri’amaache amange akoeera.
ⅩⅥ Ase okoboko kwaye gw’okorio nigo abwate ching’enang’eni isano na ibere, na ase omonwa oye okaruao omoyio o birende ore nobwoge chinsemo ibere, na obosio bwaye nigo bware kobara buna erioba rikobara ne’chinguru chiaye.
ⅩⅦ Ngachia komoorora nkagwa ase amagoro aye, nkaba buna oyokuure. Erio akabeeka okoboko kwaye gw’okorio igoro ase ’nde, aganteebia, Toiroka, inche noyo bw’eritang’ani, na oyo bw’omoerio,
ⅩⅧ na oyore moyo. Inche konya nakuure, na rigereria, nigo inde moyo goika kare na kare, ninde nebigorero bi’amakweri na ebi’aase abakuure.
ⅩⅨ Bono riika amang’ana aya kwarorire, ayareo, na ayarache koba magega y’ayio.
ⅩⅩ Obo nabwo obobisi bwe ching’enang’eni chiria isano na ibere kwarora ase okoboko kwane gw’okorio, na ebibekerero biria bie chitaaya bie chitaabu bitano na bibere: Ching’enang’eni chiria isano na ibere nabamalaika be chikanisa isano na ibere, na ebibekerero biria bitano na bibere nechikanisa isano na ibere.