Ⅶ
Abaisraeli chilifu rigana erimo na emerongo ene na inye (144,000) babekirwe ekemanyererio
Ⅰ Magega ase aya nkarora abamalaika baane bateneine ase chinsemo inye chi’ense, bagotanga chimbeo inye chi’ense, erinde embeo tegusa igoro ase ense, nonya niigoro ase enyancha gose ase omote onde bwonsi.
Ⅱ Naende nkarora omomalaika onde ogotiira korwa aase erioba rigosoka korwa ore nekemanyererio kia Nyasae ore moyo; akabaakera egeturi ase eriogi rinene abamalaika baria baane baetwe ribaga gosaria ense na enyancha,
Ⅲ ogoteeba, “Timosaria ense, gose enyancha, nonya nemete, goika twabekire abasomba ba Nyasae ekemanyererio ase amasio abo igoro.”
Ⅳ Erio nkaigwa omobaro obo abwo babekirwe ekemanyererio. Nigo barenge abanto chilifu rigana erimo na emerongo ene na inye (144,000) korwa ase kera egesaku kia basinto ba Israeli.
Ⅴ Ab’egesaku kia Yuda nigo barenge chilifu ikomi na ibere
ababekirwe ekemanyererio,
ab’egesaku kia Rubeni chilifu ikomi na ibere,
ab’egesaku kia Gadi chilifu ikomi na ibere,
Ⅵ ab’egesaku gi’Aseri chilifu ikomi na ibere,
ab’egesaku kia Nafutali chilifu ikomi na ibere.
Ab’egesaku kia Manase chilifu ikomi na ibere,
Ⅶ ab’egesaku gia Simioni chilifu ikomi na ibere,
ab’egesaku kia Lawi chilifu ikomi na ibere,
ab’egesaku gia Isakaru chilifu ikomi na ibere,
Ⅷ ab’egesaku gia Sabuloni chilifu ikomi na ibere,
ab’egesaku kia Yusufu chilifu ikomi na ibere,
ab’egesaku kia Benjamini chilifu ikomi na ibere.
Emeganda korwa ase kera egesaku
Ⅸ Magega ase aya nkarigereria, nkarora omosangererekano omonene mono, oyo onde atarenge konyara kobara, korwa ase kera egesaku, na eamate, na abanto, na omonwa, bateneine bosio bw’ekerogo ki’obonene na ase obosio bw’Emanwa y’Eng’ondi, babeekeirwe chianga chindabu bare namato ’emekendo maboko abo,
Ⅹ bakorera neriogi rinene, bakobora, “Ogotooreka nkorwa ase Nyasae oito, oyoikaransete ase ekerogo ki’obonene, na korwa ase Emanwa y’Eng’ondi!”
Ⅺ Na abamalaika bonsi bateneine baetanaine ase ekerogo keria ki’obonene, na abagaaka baria, ne ching’iti chiria inye chire moyo; bagatung’ama bosio bw’ekerogo ki’obonene, bagasasiima Nyasae,
Ⅻ bakobora, “Amina! Ogotogigwa na obonene, na obong’aini, na ogoaka ng’a mbuya mono, na ogosikwa, na okobua, ne chinguru, nebia Nyasae oito goika kare na kare. Amina.”
ⅩⅢ Erio oyomo bw’abagaaka baria akaonchoka, akambooria, “Abanto aba babeekeirwe chianga chindabu barabwo mbarabi, naende ng’ai barure?”
ⅩⅣ Nkamoteebia, “Omonene one, aye nomanyete aya.” Ere aganteebia, Aba nabwo barure ase emechando emenene, basibirie chianga chiabo, bachikorire chindabu ase amanyinga ’Emanwa y’Eng’ondi.
ⅩⅤ Ayio naro agerete bare bosio bw’ekerogo ki’obonene kia Nyasae,
na barabwo nigo bakomokorera omobaso na obotuko ase Hekalu yaye;
ere oyoikaransete ase ekerogo ki’obonene
igo aramenye amo nabarabwo na kobarenda.
ⅩⅥ Barabwo tibakoigwa enchara naende, nonya nerang’o;
erioba tirikobasamba, nonya nomobaso omororo,
ⅩⅦ ekiagera Emanwa y’Eng’ondi oyore gati‐gati y’ekerogo ki’obonene nabarisie,
ere nabaraae gochia ase chinsoko chi’amaache are moyo,
na Nyasae natinyie amariga onsi korwa ase amaiso abo.