EGETABU KIE RITANG’ANI GIA
SAMWELI
Ogochaakera
Egetabu eke kieritang’ani gia Samweli nigo kebogoretie omogano bw’oboonchoreria ase oborwoti bw’Abaisraeli korwa ase oboteneneri bwa Nyasae ase chingaki chia Abagaambi gochia ase oborwoti bwa Mwanyabaanto. Oborwoti obo iga nigo bokoereranigwa gati ya aba batato; Samweli oyio ore oyo bw’omoerio ase egati ya Abagaambi bengeencho enene, Saulo ere buna omorwoti bw’eritang’ani ase egesaku kia Abaisraeli, boigo Daudi oyio ogotang’anerwa na omogano o Saulo amo na Samweli.
Ekerenga kiegetabu eke ase omogwekano bwebitabu binde ebio bikorwa emegano emekoro ase Okobwatana Ogokoro, nigo kegotworokereria buna oboigweri ase Omonene nigo bokorenta obobui naboigo ogotaigwera asare kwarenta amaakwa. Aya nkoorokigwa are maiso marore ase amang’ana a Omonene ase Omokuani Eli: “ekiagera abanto bansigete, nainche nimbasike, na baria banchaayete, nabarabwo mbachaaywe goetania” (2:30).
Egetabu eke nigo kegotworokia chitang’utang’u chigotang’anera oborwoti bweke Mwanyabaanto. Omonene nere omanyekanete buna omorwoti bw’ekeene ase Abaisraeli, korende goetera ase amagania y’abanto, Omonene akabachoorera Omorwoti abagaambere. Ring’ana rinene ase bare ndiria ng’a omorwoti amo na Abaisraeli nigo barenge inse yokobua kwa Nyasae (2:7-10). Goetera ase okobua oko kwa Nyasae, aria abagwenerete abanto bonsi, abataka amo na abanda nigo arendire na goikeranigwa.
Okobagwa kw’egetabu eke:
Samweli ore omogambi bw’Abaisraeli 1:1—7:17
Saulo okobekwa koba omorwoti 8:1—10:27
Emiaka ye ritang’ani y’okogaamba gwa Saulo 11:1—15:35
Daudi na Saulo 16:1—30:31
Ogokwa gwa Saulo na abamura baye 31:1-13
Ⅰ
Elikana na Abanto b’enka yaye agwo Silo
Ⅰ Nareenge omonto ore korokwa Elikana korwa ase egesaku gia Efraimu, omenyete Ramataimu‐Sofimu, ase ebitunwa bi’ense ya Efraimu. Ere nigo areenge mosinto o Yerohamu bw’Elihu, o Tohu, o Sufu, Omoefraimu.
Ⅱ Elikana nabwate abakungu babere, Ana na Penina. Penina nabwate abana, korende Ana tabwate bana.
Ⅲ Kera omwaka omonto oyio nigo areenge gotiira korwa ase omochie oye, ogenda gosasiima na korua ebing’wanso ase Omonene bw’Emeganda agwo Silo. Aroro agwo Ofini na Finehasi, abamura babere ba Eli, nigo baarenge abakuani ba Omonene.
Ⅳ Kera engaki Elikana areenge korua ekeng’wanso, nigo areenge koa Penina amo nabana baye, abamura na abaiseke, kera oyomo egetari kiaye.
Ⅴ Korende ase Ana nigo areenge komoa ebitari bibere, ekiagera nigo amwanchete nony’Omonene osiegete oroiboro rwaye.
Ⅵ Penina, moibori omwabo, nigo anarete goichania Ana ase okomochaaya, ekiagera Omonene konya osiekire okoibora kwaye.
Ⅶ Nabo agendererete gokora boigo, kera engaki, omwaka ase omwaka. Ekero baareenge kogenda gosasiima ase enyomba y’Omonene, Penina akaba ogoichania Ana, na Ana nigo areenge kona‐korera goika takoria gento.
Ⅷ Erio Elikana akamobooria: “Nase ki okona‐korera iga? Naki otari koria endagera? Naende oichaanete iga? Inee! Inche tingoisaini goetania abana abamura ikomi?”
Ana na Eli
Ⅸ Rituko erimo magega kobakoorire koragera na konywa aaria Silo, Ana akaimoka, na ase emechando yaye akarera mono kegima, ore nobororo, agasaba Omonene. Eli Omokuani nao aikaransete ase ekerogo kiaye ang’e nomotobwa bw’egesieri gie Hekalu y’Omonene.
Ⅹ Ana nigo arenge nobororo obonge mono, ere agasaba na akaria eira, agakwana
Ⅺ “Aye Omonene bw’Emeganda, ondigererie inche omosomba oo ase emechando yane! Tonyeba! Korang’e omwana omomura, nigo ndamorue abe oyoo, aye Omonene; ase amatuko onsi ay’obogima bwaye takogingirwa etukia yaye.”
Ⅻ Buna omokungu oyio agendererete gosaba Omonene, Eli akaba origereretie omonwa oye.
ⅩⅢ Ana nigo areenge gosabera enkoro yaye ime bokiriru; akaba okomonya‐monyia ebikoba biaye rioka, korende riogi tiriare koigweka. Ase ayio Eli agakaga ng’a Ana nigo atindire,
ⅩⅣ akamoteebia: “Ngoika ririri oragenderere gotinda? Tiga ogotinda kwao, otindoke!”
ⅩⅤ Ana akamoiraneria, “Taibo, omonene one, inche nomokuungu inde nobororo ase enkoro yane. Tinyweti edivai gose ekenyugwa kende kegotindia. Nigo nabeire ngosaba na kobeeka emechando yane yonsi ase Omonene.
ⅩⅥ Tokaga ng’a inche, omosomba oo, nomokuungu otagwenereti, inaki ase engaki eye yonsi nabeire ngokwana ase engencho y’emechando yane na ogoichana kwane.”
ⅩⅦ Erio Eli akamoiraneria, akamoteebia: “Genda nomorembe, na Nyasae bw’Abaisraeli nakoe aya kwamosabire.”
ⅩⅧ Ana akabora, “Tiga inche, omosomba oo, inyore ogwancherwa ase obosio bwao.” Erio omokungu oria akarua aase agwo, akagenda koragera, gose taba oichaanete naende.
Okoiborwa gwa Samweli na ogwatananwa kwaye ase Omonene
ⅩⅨ Rituko ria kabere Elikana na Abanto baye bakaimoka mambia chuni, bagasasiima ase obosio bw’Omonene. Erio bakairana gochia nka sobo agwo Rama. Elikana akaba na Ana mokaye, n’Omonene akaba omoinyorete.
ⅩⅩ Ana akaba morito, na ekero engaki yaigete akaibora omwana omoisia, akamoroka Samweli, agateeba, “Nekiagera namosabete korwa ase Omonene.”
ⅩⅪ Elikana amo na’baanto b’enka yaye bakagenda naende koruera Omonene ekeng’wanso gia kera omwaka na goikerania eira bariete.
ⅩⅫ Korende ase engaki eyio Ana tagendeteo, agateebia omosacha oye, “Ninganye goika ’ntache omwana, erio nario ndamoire imoorokie ase obosio bw’Omonene, erinde imotige amenye aroro botaambe.”
ⅩⅩⅢ Elikana, omosacha oye, akamoteebia, “Kora aya orarore are buya; ganya goika otache omwana. Tiga Omonene aikeranie ring’ana riaye.” Erio omokungu oria agatigara nka korera omwana goika akamotacha.
ⅩⅩⅣ Ekero omwana oria atachirwe, Ana akamoira ase enyomba y’Omonene agwo Silo, akairana eeri yakoorire emiaka etato, n’obosie ebimunu emerongo ebere, na ekerandi kiaroisirie korwa ase risankwa kere nedivai. Omwana oria omomura nigo areenge omoke.
ⅩⅩⅤ Erio bakanyenya eeri eria, na bakaa Eli omwana oria.
ⅩⅩⅥ Ana agateebia Eli, “Omonene one, inyigwa. Amaene, buna ogendererete koba moyo, inche nomokuungu oria natenenete aiga ase obosio bwao, nareenge gosaba Omonene.
ⅩⅩⅦ Nigo nasabete ng’a ’ng’eegwe omwana oyo omomura, n’Omonene akaigwa ogosaba kwane.
ⅩⅩⅧ Ase ayio namorentire ase Omonene. Ase obogima bwaye bwonsi abe oyoye.”
Erio bagasasiima Omonene aroro agwo.