Ⅶ
(Omonyuomi)
Ⅰ Aye omoiseke bw’omogambi, naki ebisanyi bi’amagoro ao bire ebiya ase ebikoroto ime!
Naki ebibwato biao bimerete buya,
nigo bire buna emeremo y’omooroisia omong’aini.
Ⅱ Ekenyobu kiao nigo keborongosire buya buna egetaabo
getari koererwa edivai yochoganirie.
Enda yao nigo ere buna etui y’engano,
eetananeirie ebisicha ebiya.
Ⅲ Chimbeere chiao nigo chinga buna chimanwa ibere
chire chisare chi’engabi.
Ⅳ Rigoti riao nigo ringa buna omoorobiri oroiseirie amaino e chinchogu,
amaiso ao nigo anga buna amatibo a Hesiboni,
ang’e negeita kia Bati‐Rabimu.
Emioro yao nigo enga buna omoorobiri o Lebanoni orochie Damesiki.
Ⅴ Omotwe oo nigo osongoire buna egetunwa gia Karimeli.
Etukia y’omotwe oo ekona‐gosanyoka nigo ere ekieni kemonyinga;
eyio yang’usire omorwoti.
Ⅵ Naki aye ore omoseera naende oyo bw’okogokia mono!
Aye omwanchi bw’okogokia!
Ⅶ Aye nigo okinete buna omokendo,
ne chimbeere chiao nigo chire buna ebisago bi’amasabibu.
Ⅷ Nkarengereria: Nkoriina inde omokendo oyo,
imbwaterere chinsagia chiaye.
Naki yare koba buya
onye chimbeere chiao nchiaba buna ebisago bi’amasabibu,
ne rimisu ri’omonwa oo ribe buna eri’amapera,
Ⅸ na omonwa oo obe buna edivai ere engiya mono.
(Omoriakari)
Ee, edivai eyio nigo egetirimboka gochia ime y’omwanchi one,
naende yanyororoka ng’ora ng’ora, yakuna ebikoba bi’abwo baraire.
Ⅹ Inche nigo inde oyo bw’omwanchi one,
ere nigo are namaiga ase ’nde.
Ⅺ Aye omwanchi one, inchwo togende ase amaremo aito,
tobeere ase emechie botuko,
Ⅻ toimoke mambia chuni togende ase emegondo y’emesabibu,
torore gose yachakire goseboka,
naende gose amasabibu amanokire na gosicha,
boigo gose amakomomanga asichire.
Aroro agwo ninkoboanie nobwanchani bwane.
ⅩⅢ Aye omwanchi one,
amatunda amansu nigo agotioka rimisu rigiya mono,
na igoro y’ebisieri biaito nareo amatunda ao ao are amaya mono,
amakoro na amayia;
ayio nasangereirie ase ogokogachera.