RIRUUBE RIA KABERE RIA PAULO OMOTOMWA ASE
TIMOTHEO
Ogochaakera
Riruube eri ria kabere ase Timotheo nigo ribwate ogeteebereria kwabene gwa Paulo ase Timotheo ere buna omworokigwa omosae naende omokoonyi ase emeremo y’obokoreri bw’enchiri. Ekerenga ekenene n’oboremereria. Timotheo nigo agosegetwa na gotebererigwa abe omwegenwa ase okomobeera kirori Kristo, boigo gotaarera bokong’u amorokererio y’Okobwatana Okoyia naboigo na aria y’Okobwatana Ogokoro, naende ase ayio gokora okorangerigwa kwaye koba omorandia n’omwalimu bionsi ase egati yemechando n’okoengererigwa. Ase aya onsi, Timotheo nigo akoinyorigwa kweegia omogwekano n’obogima bw’omoriiki ayio atungetie; okoganya, okwegena, obwanchani, oboremereria amo n’ogochaandeka ase ogosusurwa.
Okobagwa kw’egetabu eke
Obweng’e bw’Egetabu eke 1:1-2
Ogotogigwa na ogokuurerwa 1:3—2:13
Ogoseemia na ogokuurerwa 2:14—4:5
Okoba gwa Paulo 4:6-18
Ogokoorera 4:19-22
Ⅰ
Ⅰ Korwa ase Paulo, omotomwa o Kristo Yeso ase ogwancha kwa Nyasae, ase engencho y’eira y’obogima bore ase Kristo Yeso,
Ⅱ gocha ase Timotheo, omwana one omwanchwa:
Obuya na amaabera, na omorembe, bikorwa ase Nyasae Tata, na ase Kristo Yeso, Omonene oito.
Ogoaka mbuya na kobeka omokia
Ⅲ Nigo nkomoakera Nyasae ng’a mbuya mono, oyo ngokorera nenkoro etari kongaambia, buna chisokoro chiane chiare gokora, nigo ngokoinyora botambe ase ogosaba kw’ane obotuko na omobaso.
Ⅳ Ekero nkoinyora amariga ao nigo nkoba namaiga gokorora, erinde ing’ichorwe nomogooko.
Ⅴ Ning’inyorete okwegena ore nakorokwo, gotari nobong’ainereria, okwo kwareenge ritang’ani ase nyagokoro Lois na ase nyoko Yunuke, na inche ninde nobomaene ng’a naye nokobwate boigo.
Ⅵ Ase engencho eyio ngokoinyoria, oigererie ekeegwa ekiaruure ase Nyasae, ekere ime yao, ekio kwaetwe ekero nakobeekerete amaboko aane,
Ⅶ ekiagera omoika twaetwe na Nyasae tari oyo bw’obwoba, korende oyo bw’echinguru na obwanchani, na omoika bw’okwerenga intwe abanyene.
Ⅷ Gaaki, torora obosooku kobeera Omonene oito kirori, gose tondorera inche, omosibwa oye, obosooku, korende nonya naye oremererie emechando ase engencho y’enchiri, ase okobua kwa Nyasae,
Ⅸ oyototooretie na agatorangeria ase okorangeria ogochenu, tari ase engencho y’ogokora gwaito korende koreng’ana nokorigia kwaye omonyene, na obuya bwaye. Obuya obo twaetwe ase Kristo Yeso korwa agwo kare
Ⅹ bwaorokigwe bono ase okoorokigwa kw’Omotooria oito Kristo Yeso. Ere agasiria chinguru chi’amakweri, na akarenta obogima na ogotasareka goetera ase enchiri.
Ⅺ Inaki ase enchiri eye nkaragwa koba omoraria, na omotomwa, na omworokia.
Ⅻ Ase engencho eyio nanyoorire emechando eye. Korende tinkorora obosooku, inaki nimomanyete ere oyonyegenete, naende ninde nobomaene ng’a goika Rituko riria ere nanyare korenda keria angacherete.
ⅩⅢ Bwatia amang’ana ayare ay’obogima, ayakwaigwete korwa ase ’nde, abe ekiorokererio ogotunyana ase okwegena na obwanchani bire ase Kristo Yeso.
ⅩⅣ Renda keria ekiya kwaetwe, okegache, okerende ase chinguru chi’Omoika Omochenu, oyomenyete ime yaito.
ⅩⅤ Kwamanyire ng’a bonsi abare Asia bantigire, na ase abwo mbareo Figelo na Hermogene.
ⅩⅥ Omonene abarorere amaabera abwo bare ab’enyomba y’Onesiforo, ekiagera ekero ase ekero nigo are gontimokia, gose t’are korora obosooku ase engencho y’obosibwa bwane.
ⅩⅦ Korende ekero aigete Rumi akandigia nomokia, akanyoora.
ⅩⅧ Omonene namwanchere anyoore amaabera korwa ase Omonene Rituko riria. Aye kwamanyire buya buna are gokora emeremo emenge aria Efeso.