RIRUUBE RIA PAULO OMOTOMWA ASE
TITO
Ogochaakera
Tito nigo arenge omonto bw’ebisaku oonchogete gochia ase Obokristo na koba omokoreri ase okomobwatesia Paulo ase emeremo y’okoraria enchiri ase chinse chia isiko. Riruube eri ria Paulo ase Tito nigo ririikeire ase omokoonyi omosae ase ense ya Kirete oyio otigetwe aroro atenenere emeremo y’ekanisa.
Riruube eri nigo rigokwanera amaganio atato amanene.
Ritang’ani, Tito nigo akoinyorigwa chingeencho chingiya echio chimogwenerete omotang’ani bw’Ekanisa, ase okogwekania chinchera chimbe echio abamenyi abange ba Kirete babwate. Eriakabere, Tito nigo agoteebererigwa chinchera agwenerete kworokereria omwatananeko bwa abanto bare ime y’Ekanisa; abagaaka abagotu, abaang’ina abagotu (abwo boigo bagwenerete kworokereria abaang’ina abasae), abasae amo n’abasomba. Omoerio, omoriki nigo akworokereria Tito chinchera agwenerete kwebogoria buna Omobwatani o Kristo; abe omonto bw’omorembe naende omosaani bwa abanto, etange korwa ase obogeechi, okoiranerania na ogwatananeka ase Ekanisa.
Okobagwa kw’egetabu eke
Ogochaakera 1:1-4
Abaraai b’ekanisa 1:5-16
Emeremo y’ebiombe ao ao bi’ekanisa 2:1-15
Ogosorora na ogokuurerwa 3:1-11
Ogokoorera 3:12-15
Ⅰ
Ⅰ Inche Paulo nomosomba o Nyasae, na omotomwa o Yeso Kristo. Inche nigo narangeretigwe naboigo gotomwa ogokonya okwegena kw’abachoore ba Nyasae, erinde baike ase ayare ay’ekeene, ayio akworokererigwa ase okwegena gwaito,
Ⅱ ekio keigekire ase ogosemeria kw’obogima bwa kare na kare. Obogima obo Nyasae ariete eira korwa kare na kare.
Ⅲ Na ekero engaki yaye yaigete akabomaanora ase ring’ana riaye, eri inche negenirwe korandia ase ogochika kwa Nyasae, Omotooria oito.
Ⅳ Ngokoriikera nde aye Tito, omwana one bori ase okwegena tosangete naye:
Obuya na omorembe bikorwa ase Nyasae Tata, na ase Kristo Yeso, Omotooria oito.
Emeremo ya Tito aria Kirete
Ⅴ Nkagotiga Kirete, erinde oroisie aria aganetie gokorwa erio ochore abagaaka ime ase kera omochie. Inyora buna nagochigeete.
Ⅵ Omogaka goika abe omoikeranu; abe ore n’omokuungu oyomo, na ore nabana begenete, batari gosoerwa ng’a nabanyaka bare, gose abatari koigwera.
Ⅶ Ase engencho omotang’ani bw’ekanisa agotenera ebire ebia Nyasae, ere abe omoikeranu. Ere taaba omonto omoenenu, gose omwango bw’okobea, gose oy’ogotinda, gose omonto bwanchete goaka abanto, gose rinyandambe ase okonyora chitaabu.
Ⅷ Korende abe omooroisia abageni, oyobwanchete amaya, oyobwerendete ase onsi, omooronge, omochenu, na oy’omanyete kweriita ase onsi.
Ⅸ Ere nigo emogwenerete abwate ring’ana ri’ekeene buna riorokereretigwe, erinde anyare koremia abanto ase okworokereria gw’ekeene, na korongeyia abakoengererania nario.
Ⅹ Inaki mbare abange, mono korwa ase Abayahudi baria baonchokire batari koigwera, abagokwana amang’ana atari nengeencho, abakong’aina abande ase ayio.
Ⅺ Abwo mbagwenerete bakirigwe, ekiagera nkoonchorana bare abanto b’echinyomba chingima ase okworokereria aya’atagwenereti, naende ase obosooku, barabwo nigo bakorigia kwenyorera chitaabu.
Ⅻ Omonto oyomo obo Omokirete, omobani obo abanyene, oteebire, “Abanto ba Kirete nabanyaborimo botambe, ne ching’iti chintindi chi’orosana, abaribobe aboro.”
ⅩⅢ Ase igo nekogwenerete kobatogonyera bokong’u erio batware okwegena kore buya.
ⅩⅣ Naende totwara ribaga ri’ogotegerera emegano y’Abayahudi, gose amachiiko y’abanto abwo bakwanga ekeene.
ⅩⅤ Ebinto bionsi nebichenu ase abwo bare abachenu, korende tikeri ekere egechenu ase abwo batachenegeti na abategeneti, ekiagera ebirengererio biabo na okomanya gwe chinkoro chiabo ime biabeire ebitachenegeti.
ⅩⅥ Barabwo nigo bagoteeba ng’a mbamomanyete Nyasae, korende ase ogokora kwabo bagekaana. Nigo bare abokogeechia, abatari koigwera, na ase ayio tibakonyaara gokora ogokora konde gwonsi okuya.