EGETABU GIA
ZAKARIA
Ogochaakera
Egetabu eke gia Zakaria nigo gekorokwa egetabu ki’ogosemeria. Egetabu eke nigo kebwate chinsemo ibere. Ensemo y’eritangani (egesieri 1-8) nigo kebwate amarandio y’omobani ayio arandetigwe gati y’omwaka 520 na 518 nyuma Yeso ataraiborwa. Amarandio ayio y’obobani ase chinchera chinyinge nigo are gokoreka goetera ase enchera y’amaroro, nigo ara aange are kobeka chinguru buna okoagacha oboyia Hekalu na omochie o Yerusalemu nigo kerabe ekemanyererio gi’echingaki chingiya chi’okobwena. Chingaki echio nigo chirachakwe na Nyasae ase okomochora omoteneneri Serubabeli na Omokuani omonene Yoshua. Ogosemeria kw’Abaisraeli nigo gokooraua gochia ase okoganya ase ogosemeria okonene chingaki chiria Nyasae agocha kogambera ense yonsi.
Ensemo yakabere y’egetabu eke egesieri (9-14) nigo kegokwanera igoro y’amang’ana abere: Ring’ana ri’eritang’ani nigoro y’embua n’omogima bw’omonto oyio Nyasae arakore emeremo nere erio gochaka okogamba kwa Nyasae. Oyio ogokwanerwa buna omorwoti omointongo na omobui; omorwoti oyio onga buna eng’ondi ekoirwa konyenywa. Ase okobwatana okoyia, abariki b’enchiri nigo bagotworokia omogwekano o Yeso kobua mono ogokwa kwaye (rigereria Mat 21:4-5; 26:31; Mariko 14:27 na Yohana 19:37).
Okobagwa kw’egetabu eke
Amang’ana ogokuurerwa na ay’ogosemeria 1:1—8:23
Abanto baetanaine Abaisraeli bakonacherwa ekiina 9:1-8
Ogosesenigwa na omorembe bigochi gocha 9:9—14:21
Ⅰ
Omonene okorangeria abanto baye bairane asare
Ⅰ Ase omotienyi o gatano na gatato, omwaka o kabere bw’okogamba kwa Dario ring’ana ri’Omonene rigacha ase omobani Zakaria, mosinto o Berekia o Ido, rikamoteebia,
Ⅱ “Omonene nigo agechetigwe mono ne chisokoro chiaino.
Ⅲ Ase ayio teebia abanto: Aya naro Omonene bw’Emeganda agoteeba: Ing’iranere inche Omonene bw’Emeganda, nainche nimbairanere. Nabo Omonene bw’Emeganda agoteeba.
Ⅳ Timobaisa koba buna chisokoro chiaino, abwo ababani ba kare barerete ase bare, bakabateebia: Aya naro Omonene bw’Emeganda agoteeba: Onchoka, motige chinchera chiaino chimbe, na ogokora kwaino okobe. Korende chisokoro chiaino tichiategererete chinyigwere. Nabo Omonene agoteeba.
Ⅴ Bono chisokoro chiaino ng’ai chire? Na ababani baino, ng’ai bare? Inee! Mbagendererete koba moyo botambe?
Ⅵ Amang’ana aane na emeroberio yane echiikire, ayio naruete goetera ase abasomba baane ababani nigo yasoete ase chinkoro chie chisokoro chiaino. Barabwo nigo beitetie bagateeba: Bun’Omonene bw’Emeganda arengereretie gotokorera ase engencho ye chinchera chiaito na ogokora gwaito, naboigo atokoreire.”
Okorora kw’omobani igoro ye chibarasi
Ⅶ Ase rituko ri’emerongo ebere na kane, omotienyi o ikomi nomo, noro okorokwa Sebati, omwaka o kabere bw’okogamba kwa Dario, ring’ana ri’Omonene rigacha ase ’nde inche omobani Zakaria, mosinto o Berekia o Ido.
Ⅷ Nkarora ase okorora kwa botuko omonto oriinete ebarasi embariri. Omonto oyio nigo ateneine ase egati y’emete ekorokwa emehadasi yarenge ase rigoko. Na magega yaye nchiarengeo chibarasi chinde chimbariri, na echire chincherati, ne chindabu.
Ⅸ Erio nkabori’Omonene one, ninki engencho ye chibarasi echi?
Omomalaika oria okwanete nainche, aganteebia. “Ninkworokie engencho ye chibarasi echi.”
Ⅹ Ase ayio omonto oria oteneine ase egati y’emehadasi eria akang’iraneria, aganteebia, “Chibarasi echio nachio Omonene atomire chietanane ase ense yonsi.”
Ⅺ Chibarasi chigateebia omomalaika bw’Omonene, oria oteneine ase egati y’emehadasi eria, “Twaetananire ase ense yonsi, twarorire ng’a ense yonsi nigo etoererete ekirete‐kiri.”
Ⅻ Erio omomalaika oria bw’Omonene akaboria, “Aye Omonene bw’Emeganda, ngoika ririri orabe otari kororera Yerusalemu, na emechie y’Abayuda amaabera, eyio kwabeire kogechirie mono nero ase engaki y’emiaka emerongo etano na ebere (70)?”
ⅩⅢ Omonene akairaneria amang’ana amaya na ay’okoremia ase omomalaika oria okwanete nainche.
ⅩⅣ Ase ayio omomalaika oria aganteebia, “Raria, otebe ng’a aya naro Omonene bw’Emeganda agoteeba: Nigo inde ne risemi rinene ase engencho ya Yerusalemu na Sayoni.
ⅩⅤ Nigo ngechirie mono nabaanto b’ebisaku ebio batoererete, bakirete‐kiri, ekiagera ekero nagechetigwe ake nabarabwo, nigo bamentete korenta emechando.
ⅩⅥ Ase ayio, aya naro Omonene bw’Emeganda agoteeba: Inche nairanire Yerusalemu na koyororera amaabera. Enyomba neagachwe imeo, na engori y’okorengera eramborwe igoro ya Yerusalemu. Nabo Omonene bw’Emeganda atebiire.
ⅩⅦ “Raria naende, otebe ng’a aya naro Omonene bw’Emeganda agoteeba: Emechie yane neichorigwe nogosesenigwa okonge, na inche Omonene nindemie Sayoni naende, na ninchore Yerusalemu obe oyone naende.”
Okorora igoro ye ching’unchara
ⅩⅧ Naende nkarigereria, nkarora ching’unchara inye.
ⅩⅨ Erio nkaboria omomalaika oria konya okwanire nainche, “Ninki engencho ye ching’unchara echi?”
Ere akairaneria, aganteebia, “Ching’unchara echi nachio chiasiarerete Abayuda, na Abaisraeli, na abanto ba Yerusalemu.”
ⅩⅩ Erio Omonene akanyorokia abaturi b’ebioma baane.
ⅩⅪ Naende nkaboria, “Abanto aba, ninki bacha gokora aa?”
Ere akairaneria, aganteebia, “Ching’unchara chiria chiasiarerete Abayuda gochia aaria na aaria, goika monto onde tanyarete koimokia omotwe oye igoro. Bono abanto aba bachire gochiondokia na kobutora ching’unchara chi’abaanto b’ebisaku, baria baimokereretie ching’unchara chiabo igoro y’ense y’Abayuda, chigasiarera abamenyeteo.”