Ⅳ
Okorora igoro y’ekebekerero gie chitaaya
Ⅰ Omomalaika oria okwanete nainche ritang’ani agacha naende, agantura buna omonto oraire agoturwa korwa ase chitoro.
Ⅱ Ere akamboria, “Ninki orooche?”
Nkairaneria, nkamoteebia, “Nigo ndoche ekebekerero gie chitaaya keroiseirie etaabu yoka, na igoro yaye egetaabo ki’amaguta ngeterekereireo, ne chitaaya isano na ibere nchireo, na emebirangwa etano na ebere ekorenta amaguta nigo esoete ase kera etaya ebekire igoro yaye.
Ⅲ Mbarabare ase ekebekerero keria gie chitaaya nereo emezeituni ebere, oyomo ensemo y’okorio na oyonde ensemo y’okobee.”
Ⅳ Erio nkaboria omomalaika oria okwanete nainche, “Omonene one, ninki engencho y’ebinto ebi?”
Ⅴ Erio akang’iraneria, akamboria, “Inee! Tomanyeti engencho y’ebinto ebi?”
Nkamoiraneria, “Yaya, omonene one, timanyeti.”
Ⅵ Erio akairaneria, aganteebia, “Eri nario ring’ana ri’Omonene riachierete Serubabeli, rikamoteebia: Ayio tagokoreka ase chinguru, gose ase okobua kw’omonto, korende nase Omoika one. Nabo Omonene bw’Emeganda agoteeba.
Ⅶ Aye egetunwa ekenene, ninki oisaine ase obosio bwa Serubabeli? Noiranigwe inse obe buna ense omweya. Serubabeli nabeeke rigena ri’ogokoorera, abanto kobaakire eriogi, bagoteeba: Obuya, obuya bobe igoro yaye!”
Ⅷ Naende ring’ana ri’Omonene rigacha ase ’nde, riganteebia,
Ⅸ “Serubabeli obekire oboroso bw’enyomba eye namaboko aye, boigo nere orayekoore namaboko aye. Erio nario oramanye ng’a Omonene bw’Emeganda nere ontomete ase more.
Ⅹ Ning’o orachaye rituko ri’amang’ana amake kagochaka, ekero amaiso aria atano na abere ararore ekebiro ase okoboko gwa Serubabeli, nagoke?
“Ayio atano na abere namaiso ’Omonene arigereretie chinsemo chionsi chi’ense.”
Ⅺ Naende nkaboria omomalaika oria, “Emezeituni eye ebere, oyomo ore ensemo y’okorio na oyonde ensemo y’okobee y’ekebekerero keria gie chitaaya, neya ki?”
Ⅻ Nkamoboria okoboria gwa kabere, “Ninki engencho ye chinsagia echio ibere chi’emezeituni chire mbarabare ase emebirangwa eyio ebere eroiseirie etaabu, eyio amaguta agoetera?”
ⅩⅢ Akairaneria, akamboria, “Inee! Tomanyeti engencho y’ebinto ebi?”
Nkamokania, “Yaya, omonene one, timanyeti.”
ⅩⅣ Erio aganteebia, “Aba nabwo abaakwa amaguta babere, abagotenena ase okomokorera Omonene bw’ense engima.”