12
Abal ta wel garu dire bile Yesu tongwa
(Mat 26:6-13; Mak 14:3-9)
1 Ena komina bil nenangwa kaun i u bawa dinangwa, are kaun anan kole muru kole taran imo dungure, Yesu pi Alasaras gulere alungwa yal ain Betani ongwa.
2 Ibalin kobi komina ki Yesu tongure, Mata komina gwiire aa tekun erungure, Alasaras te Yesu bole komina nerala dire, bol mina amin di milungwa.
3 Milungure Maria milere, wel niriin minanin wai wen sungwa tobe bil bilungwa, mugu ta ali yuure, Yesu kawn mina garu dire gibiliigin aa gi di pire, kul tongwa kire di erungwa. Wel niriin minanin wai sungwa, ena ogu ala kuunin bi bawa dungwa.
4 Yesu gawlima kobe yal ta kaan Yudas Isikerio, yalini Yesu bale taal sirala dungwa yal milere ka iru dungwa,
5 “Wel niriin i tobe bilkaw bilungwa, kina kandret sutakobe irabinga, kul gal bona aa te nekungwa ibal terabinba.”
6 Dire bona gana aa te nekungwa ibal miriin pire tekire, kunibe nongwa yal milemia ena ka iru dungwa. Gawlima kobe kobile moni gal taran gule yongure, yalini kenin erimba, kamin kaun kaun kunibe ne nere milungwa.
7 Dimba Yesu ka iru dungwa, “Abalini kal erungwa, i ibal kobe kane gogo ero. Na gulabinga maul si yere wel niriin bile na terala dire, abalini wel niriin iray goma ye milungwa, malia bile na tomua.
8 Kul gal bona aa te nekungwa ibal i bole para morin mile painamba, na i ibal kobe bole baan araway ta milekerabilwa.”
Yuda ka main kenin erungwa yal bil kobe, Alasaras si gulala dire ka dungwa
9 Ena, “Yesu Betani ai milemua,” dungwa Yuda ibal singaba kobe binanbile pirere, ena Yesu milungwa gul ungwa. Umba Yesu tawle kanala di ukire, Alasaras gule alungwa para kanabina dire ungwa. Alasaras gulungwa Yesu kwi aa te ale iru ere tongwa.
10-11 Iru eremia ena Yuda ibal binanbile milere Yuda ka main kenin erungwa yal bil kobe ka dungwa pirala pirekire, pire gi di Yesu tongwa. Tomia ena Alasaras para si gulabina dire, kol ta waa duure ka di paalungwa.
Yesu singaba bil milere Yerusalem ongwa
(Mat 21:1-11; Mak 11:1-11; Luk 19:28-40)
12 God goma Yuda ibal ta sekungure, ibal kobe nomanin si pirungwa erin kaun, ibal binanbile komina bil nerala dire u milungwa. Wel niriin bile tongure pare, paire kamin taangure, “Yesu Yerusalem ai umua,” dungwa ibalin kobe pirungwa.
13 Piremia ena ibalin kobe simil nima arin bale aa te irere, Yesu guman kol baan kanala di pire, aya maya, dire deminin si God tere iru gala dungwa, “Yal ta God ka dungwa kebe ere yuungwa yal i, God miriin pai yalini tomua. Isirel ibal yal bil God miriin pai yalini tomua.”
14 Yesu bolima donki ta waa duure kane mun bolin mina amin di milungwa mere, ka main minin ganin iru dire bilungwa paangwa,
15 “Ai ta kaan Sayon ibal kobe i kuril pirekio. Kano, i yal bil ure bolima donki mun bolimina amin di milere umua.”
16 Ka bile dungwa i, yalini gawlima kobe kaun iray ta pirekemba, eme Yesu ale kamin mina ongure pare, ka main minin ganin ka i dungwa mere pirere, te ibal kobe kal iru ere tongwa para pirungwa.
17 Goma yal ta kaan Alasaras gulungwa maul si yongure, Yesu pire, “Ere mena wo,” di gala dire Alasaras alungwa, Yesu iru ere yalini tongwa. Iru erungwa ibal binanbile kanere malia pire bolin kule ibal para tongwa.
18 Yesu kalkan naanin paangwa i maribe erungwai, ibal kobe bolin kule tongware ibal binanwenbile pi Yesu kol baan guman kanungwa.
19 Iru erungure Parasi kobe ka diria ere iru dungwa, “Na yal kobe kalkan ta erabinga wi yebe pekungwa kaninwa. Te kano, ibal gariba gariba para yalini duulin bile waremua.”
Giriki ibal taw Yesu kanabina dire ungwa
20 Ena komina bil i nerala dire, Yuda ibal Yerusalem pire deminin si ana di God terala di ongure, Giriki ibal taw bole para ongwa.
21 Galili gariba gul ai ta kaan Besaida, Pilipi baan i nen milungwa, ena Giriki yalin kobe pi yalini milungwa gul pire iru di tongwa, “Yalkuno, na yal kobe Yesu kanabina dire ubinwa.”
22 Dungure Pilipi pi Endiru di tongure, yal sui pi Yesu di tongwa.
23 Di tongure Yesu ka di kole ere iru dungwa, “Na U Ibal Obinga Yal gulalgire, God yobilaan bil pai na tenangwa kaun, kamin kaun i u maala omua.
24 Na kawen dirala piro. Dodal milin yaalangwa pi sire maanamba, yaalangwa milin i bile yaanamua. Ta bile yaakinangwa, ena milin i pi sikire ta maakire, milin binanbile ta kulekenamua. Main iru paimia, ena na gulabinga na ibalan kobe maale sulu dinamua.
25 Yal ta gariba gul mile pairalgal pairala di pire, kalkan aa te nongwa nomanin tegi dire aa gi di pirangwa, ena yalini u main namua. Te yal ta gariba gul mile painangwal painama di pirekire, kalkan aa te nongwa gibilin mui kol yenangwa, ena yalini mile painangwal painamua.
26 Yal ta nil konagi ere na terala di pirangwa, ena na munan kol duulan bilangwa paamua. Bilamia ena na milalga gul yalini para pi milamua. Yal ta nil konagi ere na tenangwa, ena na Abe yalini ai yebe di tenamua,” dungwa.
Yesu inin gulalwa di maribe erungwa
27 Dire Yesu ainere dungwa, “Na miriin bilkaw pire milia, ena malia ka tawa dirale? Ka ta iru diralo? ‘Na Abe malia na gaynan giil pirekeralga, i kal iru ere na to.’ Diralba na gaynan giil pirala dire, na ere ime wiwa.
28 Na Abe ibal kobe i kaanin gale yebe erama dire, i kal iru ero.” Dungure kamin mina ka ta iru ime ungwa, “I ka dinga kaya iru eriiba, kwi ama iru eralwa.”
29 Ibal binanbile maala milungwa ka dungwa i pirere iru dungwa, “Kamin guru dima di pirebinwa.” Dimba ibal taw mile, “Angel ta ka di yalini tomua,” dungwa.
30 Dungure Yesu ka di kole ere iru dungwa, “Na piralga ka ta ime ukumba, i ibal kobe pirana dire, ka iru ime umua.
31 Gariba ibal para muru kal erungwa pirin paim mo, paikim mo, malia God di maribe eramua. Gariba gul yal singaba Satan milungure, malia God yalini si kiranin bile i sutaw eramua.
32 Ibal kobe eri pera mina na bile waaki dinangwa, ena ibal para na aa gi di pirama dire, di ku bile na miliga gul eralga paamua.”
33 Yesu ka iru dungwa ibal kobe yalini si gulangwa mere, di maribe ere ibal kobe tongwa.
34 Ibal kobe ka di kole ere iru di Yesu tongwa, “ ‘Kirisito mile painangwal paanamua,’ dire na ibal kobe kile kaman ka iru bilungwa pirebinwa. Iru bilemia, ena ‘U Ibal Ongwa Yal eri pera mina bile waaki dinamua,’ dingi, tameran ka iru dine? U Ibal Ongwa Yal yalini ibena mileme?”
35 Yesu ka di kole ere iru di tongwa, “Aw dungure i nomanin suna naabilama dire, na kaun tawle i bole milabinwa. I ibal kobe iru mile paina, ena kanekun ere kalkan konagi ere ere milo. I nomanin suna kama ta sekenama dire, kanekun ere kalkan konagi ere milo. Ibal kobe si bilungwa gul kol namba, nala dinangwa ain ta kanekinamua.
36 Aw dire i nomanin suna naabile tongwa yal bole para milebilga, i pire gi di yalini to. Tenanga ena yalini wan abilin muru milanwa.”
Yuda ibal binanbile pire gi di Yesu tekungwa
Ena Yesu ka iru di pisere ibal kwi ta na kanekinama dire, ere aal kule ongwa.
37 Yalini kal guman kwi dungwa binanbile erungure, ibal kobe kanimba, pire gi di yalini tekungwa.
38 Ta tekemia ena goma God ka kebe yal Aisaya ka iru dungwa pi nima ongwa.
“God Singaba ka bolin kule di maribe erebinga, ibena kawen dima di pireme? Di maribe erebinba God Singaba yobilaan bile kal guman kwi dungwa erinba, ibal kobe ta kane pirekemua.”
39 Iru dungwa paamia, ena pire gi di Yesu tekungwa paangwa. Aisaya ka kwi ta iru dungwa,
40 “Nomanin paikungwa milama dire, te kiraan te omilin gi dungwa imo dinama dire, God kal iru ere tomua. Kiraan gi dungwa pirekenama dire, te nomanin paikungwa pirekenama dire, nomanin si kiruul sire na aa te wai ere tekerala dire, God kal iru ere tomua.”
41 Kirisito yobilaan bile niminin milungwa Aisaya kanere, Yesu milungwa mere ka iru di maribe erungwa.
42 Iru dimba, Yuda ibal yal singaba kobe binanbile pire gi di Yesu tongwa. Tomba Yuda ka main ogu kaan paangwa, Parasi kobe i mena erekinama dire, pire gi di Yesu tongwa di maribe erekungwa.
43 Ibal kobe kaan gale yebe ere deminin si na tenama dire, yalin kobe iru di pirimba, God deminin si yalin kobe tenama di ta pirekungwa.
Yesu ka dungwa mere ka kol ere ibal tenangwa
44 Ena Yesu ka bil dire iru dungwa, “Ibal kobe pire gi di na tenangwa, ena ibalin kobe na inan tawle pire gi di na tenangwa, tamama. Na nusi ime erungwa yal, ibalin kobe para pire gi di yalini tenamua.
45 Ibal kobe na kanungwa mere, na nusi ime erungwa yal para kanemua.
46 Gariba ibal para nomanin naabilama dire, aw di ibalin kobe terala di ere ime wiwa. Ibal kobe pire gi di na tenamia, ena ibalin kobe nomanin suna kama ta sekenamua.
47 Na ka nil si tega ibal kobe pirere wiina ere na tekenamba, na ibalin kobe ka kol ta ere tekeralwa. Gariba ibal ka kol ere terala dire, na ime ta ukiwa. Gariba ibal aa ki di tegire, sigare kule u wai nama dire, na ime wiwa.
48 Ibal kobe mun kal waa na tere, te na ka nil si tega wiina ere na tekenangwa, ena yal ta ka kol ere ibalin kobe tenamua. Kamin te gariba wei sinangwa kaun na ka diga mere, ka kol ere ibalin kobe tenamua.
49 Na inan nomanin si pirega mere, ta di ibal kobe tekiwa. Na Abe na nusi ime erungwa yal, ‘Iru do,’ dire kaman na tongwa mere, di maribe ere teiwa. Iru di tega, ena na ka diga mere iray, ka kol ere ibalin kobe tenamua.
50 Ibal kobe mile painangwal painama dire, na Abe kile kaman ka di tongwa piriwa. Iru paimia ena na Abe, ‘Iru do,’ dungure diwa,” dire Yesu iru dungwa.