15
Siipe siipe ta u baan ta ongwa, ka di bile dungwa
(Mat 18:12-14)
1 Kobile moni takis ingwa yal kobe, te yal digan kobe para, ibal binanbile Yesu ka dungwa pirala dire Yesu milungwa gul ungwa.
2 Parasi kobe te Yuda ka main nil si tongwa yal kobe para, kura ka dire iru dungwa, “Yal digan kobe Yesu ye nongwa milungure, te yalini yalin kobi bole komina nomua.”
3 Dungure Yesu ka di bile dire iru di yalini kobe tongwa,
4 “Yal ta i suna milungwa bolima siipe siipe, yal anan kole muru aan kawn muru, wan kandret, kobaan milangwa, ena ta wou bilangure, kobaan yal i takal erame? Bolima siipe siipe nainti nain wai milungwa kane pisere, ta u baan ta ongwa waa duu milangwa milangwa kanamua.
5 Kanangwa aan tawan mina si paru di yere, wai wen pirere awli unamua.
6 Yalini bolima siipe siipe awli malge pirere, ye nongwa ibal kobe te enin kobe, ‘Ere wo,’ di gala dire iru di tenangwa, ‘Na bolima siipe siipe ta u baan ta ongwa waa duure kanegire, i na bole maki ye terabinwa.’
7 Iru erungwa mere ka ta di terala piro. Ibal binanbile, nainti nain wai mile nomanin suna si kiruul sekungwa, kamin ibal maki ye tenamba, kal digan ere taalime erungwa yal taranta, nomanin suna si kiruul sinangwa, kamin ibal maki wen ye tenamua.
Kobile moni milin yaangwa ka di bile dungwa
8 “Mo te abal ta kobile moni anan kole kole muru yongwa ta yaanangure, abalini takal erame? Abalini kewa galere, ogu ala bomine kire di mena ere irala di pire, dobil wen waa duunamua.
9 Kanangwa ye nongwa ibal kobe te enin kobe, ‘Ere wo,’ di gala dire iru di tenangwa, ‘Na kobile moni ta yaangwa waa duure kanegire, i na bole maki ye terabinwa.’ Iru erungwa mere ka ta di i terala piro.
10 Kal digan ere taalime erungwa yal taranta, nomanin suna si kiruul sinangwa, God angel kobe maki ye tenamua,” dungwa.
Wan ta nen pisere u inin baan ongwa, Yesu ka baan dungwa
11 Yesu ka ta ainere iru dungwa, “Yal ta mile wan sutan kule yomua.
12 Wan emin ure ka iru di nen tongwa, ‘Abe, i kobile te kulgal bona aa te nenga obin sire kalkan na iralga mere, malia i na tenanba.’ Iru dimia ena nen obin si wan sutan tomua.
13 Are kaun taw wei sungure, wan emin i kalkan tongwa irere, te kobile moni irere, ogin pisere ere gariba ta tayan pi paire, kalkan pile wele ere i sutaw ere ne wei simua.
14 Kalkan para ne piserungure pare, kenan bil gulungwa kaun gariba iray u maribe ongure, yalini imore wen milemua.
15 Milemia ena yalini pi gariba i nen ta konagi ere ta milemua. Bolima kenin ere milama dire nusi mena eremua.
16 Yalini kenan gulungwa bolima komina nerala di pirimba, ibal kobe komina iray yalini tekemua.
17 Ena yalini nomanin si kiruul sire iru nomanin si pirungwa, ‘Na abe nil konagi yal komina binanbile dungwa ne milimba, na iwe, kenan gulere gulabinga paamiawa.
18 Na alere pi na abe milungwa gul pire iru di yalini terabinga, Abe, i te God bole kal digan ere taalime ere i yasu teiwa.
19 Na wanan milemua, dire malia iru dinanga ta paikinamia, ena i nil konagi yal milala di piriwa.’
20 Iru nomanin si pirere alere, nen milungwa gul nala di omua.
“Omba taw tayan milungwa nen kanere, miriin wen pire tere mugu di pire wan kaale tawa dire kay miimua.
21 Miingure wan iru dungwa, ‘Na abe, i te God bole kal digan ere taalime ere i yasu teiwa. I mile na wanan milemua, dinanga ta paikinamua.’
22 Dimba yalini nen iru di nil konagi yal kobe tongwa, ‘Na koray wai wen dungwa wei di pi yuure yalini pire tenanwa. Na inan siine bamin ire egin gale to.
23 Iru ere pisere ena bolimakau gawlin milin wai wen ongwa iray, si kiinana po. Si kiinangire komina bil nere miinin maarabinwa.
24 Na wanan iray kaya gulema di pirebinba, malia u milemua. Te yalini u baan ta ongwa kanekibinba, malia kanebinwa.’ Dire pare komina bil kawn kule ki nere miinin maamua.
25 “Ibal kobe iru ere milungwa kaun, wan kominin komina gul ware milemua. Milere kwi ere malge urere, ogin maala pire tawa sire egin ere dungwa piremua.
26 Pirere nil konagi yal ta ‘Wo,’ dire ungure, ka iru sirin bile tongwa, ‘Kal ere dungwa i, takal ereme?’
27 Dire nil konagi yal ka iru dungwa, ‘I kebininbi ure ta gulekimia, ena i nenin bolimakau gawlin milin wai wen ongure, iray si kiimua.’
28 Dungure wan kominin den gule milere, pi ogu ala ta pekemua. Pekemia ena nen ere mena ure yalini ala nama dire kawan dire di tomua.
29 Di tomba yalini ka iru di nen tongwa, ‘I iru dinba i piro. Me erin binanbile i nil konagi ere i tere, te i kile kaman ka di na tenga wiina ere teiwa. Tegire na ye nega bole komina bil nerabinga, i bolima meme gawlin iru si ki na tekingiwe.
30 Na tekinba wanin ta iray i kalkan tenga i pire, abal eri arin sungwa bile ire, kalkan para i sutaw eremua. Erungure pare i bolimakau gawlin milin wai wen ongwa iray si ki yalini tenwa.’
31 Dungure nen iru di tongwa, ‘Wanane, i na bole milingal milinga, ena na kalkan para aa te nega i, i kalkan dimua.
32 Dimba i kebininbi kaya gulema di pirebinba, malia u milere, te u baan ta ongwa kanekibinba, maliaga kanebinwa. Kanebinga ena komina bil ki nere para wai pirebinga, para paamua.’ ”