4
Kamin mina ana dire deminin si God tongwa
Iru di na tongure pare, na kwi kane yebe ere kamin ai kaana kol yawle erungwa dungwa kaniwe. Goma ka di na tongwa, ibal bu dungwa mere di na tongwa, malia ka kwi iru di na tongwa, “Yon ye, i ere yebe wo. Unangire kalkan eme u maribe nangwa kalin i, i maribe ere i teralwa.” Dungure gin taran God Iban na denan miranan suna paire niminin mile na tongure, ena kamin ai suna kenin ere ke milungwa bol kanere, te ibal ta bol iray amin di milungwa, na para kaniwe. Ibal ta i amin di milungwa, kobile sui kaan yasipa te konilian, naabile aw dungwa mere, ibalini iru naabile aw dimue. Ibalini kenin ere ke milungwa bol kole kole wenabe di dungwa iwe, kobile ta kaan emeral, more yere aw dungwa mere, bol iray kamin kaabinin gi dire wenabe di dimue. God kenin ere ke milungwa bol iray suna dungure, bol dungwa mere yal ta aan kawn muru te yal ta aan milin sui sui wenabe di dimue. Dungure yal singaba yal ta aan kawn muru te yal ta aan milin sui sui bol mina amin di milere, gal pege sigi dire yal bil gibilin gal kobile gol ere yongwa, yalin kobi kaure milemue. Kenin ere ke milungwa bol suna dire kamin nege erungwa, te teli bilkaw dungwa, te kamin guru dungwa, i maribe eremue. Bol iray guman mina kewa anan kole muru kole sutan de dimue. Kewa dongwa iwe, God Iban anan kole muru kole sutan milemue. Te bol iray guman mina nil benge ta milungwa mere milemue. Nilniminin gilasi ta kaan kirisital, dungwa mere, nil benge iray iru mere milungure, nil benge main ali aw dungwa kaniwe.
Bol iray kole kole wenabe di dungure, kalkan sui sui milemue. Milungwa mere iwe, omilin binanbile kulere taw guman kol kulere, te taw mun kol kulemue. Milungwa kalkan kobe ta awi pus bilkaw ele paangwa mere milungure, te ta bolimakau milungwa mere milungure, te ta ibal guman mere kulungwa milungure, te ta sibayaa puru di warungwa mere milemue. Te kalkan sui sui milungwa, inin inin kain anan kole muru kole taran kulere, te omilin gain mena kol te gain suna ali kirara kulere, te girungwa taangwa para geril di milungwal milemue. Di mile geril iru dungwa,
“Yobilaan bilkaw bilungwa yal, Yobilaan Kobaan, God Singaba yalini taran dime dire dorimil milemio. Yalini taran dime dire dorimil milemio. Yalini taran dime dire dorimil milemio. Yalini milungwal milungwa milere, te milangwal milangwa milere, te eme unangwa yal milemio.”
Kalkan sui sui milungwa kobi geril dire deminin si tere, kaan gale yebe ere maki ye tere, bol iray amin di milungwa yal mile painangwal painangwa kal iru ere yalini tomue. 10 Tongwa kaun iray yal singaba yal ta aan kawn muru te yal ta aan milin sui sui God kawn mina yaa gobin bile mile ana dire deminin si mile painangwal painangwa yal tomue. Yal bil gibilin gal pusi kenin ere ke milungwa bol iray, guman mina ere, ka iru di tongwa,
11 “Na Singaba te na Abe God i kalkan para muru ere yengire, te kal iray u maribe nama di piringire, u maribe pi milemua. Iru milemia, ena ibal para muru deminin si i tere, i kaanin gale yebe ere yobilaan pai i tenangwa i para kuunin erinwa.”