12
ISRAEL-WARRANGKA MAYI PASSOVER NUKAN, BUBU EGYPT BAWAN - Mayi Passover.
12.1-28
1-27a Godungku bulanda Mosesanda, Aaronanda yalaman, “Yubal Israel-warranda yanyu kuku balka: warngku 10-balamal yurra minya sheep karrkay or minya nanny goat karrkay wangkanyika, minya dingkar 1 year old. Minya ngulkurr wangkanyika, bambay kari, barrka-buyun kari. Yinyamun warngku 4-balamal, yilay-yilaymal Israel-warrangka wubulduku kunida, yinyarrin minya jana wangkanyin. Jana mula minyamun wangkar-wangkar doorngu julngka, yalarrku julngka doorngu karangkalba, jambulurr sidemunbu. Yinyamun jana minya wayju, nukada. Bread balan-balan, mayi nganja-burra yalarrku nuka. Minya wayju, kari kayalku nuka. Wubulku nukarrku, dukul, jina, julbi, jiba, burrkul, birra, wubulku yalaku nuka. Minya yanday kari bawa, bayanga wayjurrku. Yurra nukanjiku, yurra readymaka dunganka, dambal dida, jaba marabu kuji, readymanka dunganka. Yurra readymal, minyada, mayida jinbaldaku nuka. Wawu mayimun ngayu bububurr Egyptmundurr dungay, kangkal-kangkal dingkar-dingkar jakalbamun wubulku yarkin-bunganka, bama-bama, minya-minya. Ngayu Maja God. Kaki ngayu mula nyajil wangkar-wangkar doorngu, sidemunbu jambulurr, ngayu yinyaymba bayanba kari walal; kari, ngayu walkuku dungay, pass overmaniji, kangkal jakalbamun kari yarkin-bungal. Yamba ngayu bayanba mula-kariymba walal, jananin punishim-bunganka, kangkal jakalbamun yarkin-bunganka, Egypt-warra. Ngayu wawu yurra every year mayi Passover nukanka, kari milka-wulanka ngayu yurranin bubumun Egyptmun wundin kuli-bakandamun.” Godungku yalaku kuku dajin Israel-warranda.
27b-28 Yinyamun kukumun jana Israel-warra bungkubu janan, God buyay-manin. Wawu yinyamun jana Godumu kuku wukurrin yala Mosesangkaku balkan.
Kangkal-kangkal dingkar-dingkar jakalbamun wubulku wularin.
12.29-36
29-30 Kunarangkalba Godungku Egypt-warra kangkal-kangkal dingkar-dingkar jakalbamun wubulku yarkin-bungan. Kingamu kangkal jakalbamun wulan, yalarrku jail-warramu kangkal-kangkal jakalbamun wularin. Janawunbu minyamu kangkal-kangkal jakalbamun yalarrku wularin. Nyirraynja nyungun king and nyungu workingman warngkumun wandi-manin, jana bama nyajin banbadirinya. Bayanba yiringkurrku kangkal jakalbamun wulan.
31-33 Nyulu kingangka bulanin Moses, Aaron jinbalku kunjan, yalaman, “Dungayda, yurra Israel-warra! Yanyu bubu bawa, yurranga God buyay-mana. Yurranga bulki, sheep, nanny goat wubulku wundijika. Ngaykunku praymaka yurrawunbu Godundu.” Jana Egypt-warrangka Israel-warranda yalaman, “Jinbal, yurra dungayda. Kaki yurra kari dungari, nganjin wubulku wulari.”
34-36 Jana Israel-warrangka bread balan-balan dingkan dishmunbu, kambibu mulun-ban, bindabuku jarra-kulban. Jana Mosesamu kuku wukurrin, Egypt-warranda babajin kambika, goldmunku, silvermunku. Jana Egypt-warrangka jananda dajin. Yinyaynka jana Egypt-warramu yamba-yamba and jewelry jananji wundin bubumun. Jana Joseph yarkin yalarrku jananji wundin. Josephangka ngadi bajaku yalaman, “Godungku Israel-warra juma yaluymun wundil. Jana nganya yarkin yalarrku wundida.”
Israel-warrangka bubu Egypt bawan.
12.37-42; 13.21-22
37-39 Jana Israel-warra bubumun Egyptmun dungarin. Bama wubul bajaku dungarin, dingkar-dingkar 6 hundred thousand, jalbu-jalbu and kangkal-kangkal wubul bajaku. Minya bulki, sheep, nanny goat wubul bajaku jana wundin. Kanbal Egypt-warra yalarrku jananji dungarin. Jana bubu Egypt bawanjiku, jana bread balan-balan dingkan. Jana time kari, bread kujinka, yeastmun wubajinka.
40-42 Jana Israel-warra ngadingka bubungu Egypt bundandan, 430 years. Yinyamun jana Godundumundu bamangka wubulduku bubu Egypt bawan. Nyulu Godungku jananin ngulkurrduku kujin, kunarangkalba nyulu jananin jakalbamun-karra kari yarkin-bungan, yala nyulu Egypt-warra jakalbamun-karra yarkin-bungan. Nyiku-nyiku jana Jew-warrangka still Passover nukal, kari milka-wulanka Godungku jananin Egyptmun wundin kuli-bakandamun.