20
King Hezekiah bambayman, ngulkurrman baja.
20.1-7
1-7 King Hezekiah balamumun bambayman, balu wulan. Prophet Isaiah kinganda dungan, yalaman, “Yundu wulay bambaymun, readymaka wulanka.” Yamba Hezekiah milka-bujarman, Godundu prayman. Nyulu yalaman, “Maja God, yundu binal ngayu yunun junkaynjaku wukurrin. Ngayu kari jurrkijin yunundumun.” Yinyamun nyulu milka-bujarku badin. Isaiahngka King Hezekiah bawan, yamba nyulu bayanmun kankadan, Godungku nyungundu yalaman, “Nyunbay baja kingandaku, nyungundu yanyu kuku balka, ‘Ngayu Davidamu God. Ngayu yunu milbal nyajin daranya, yunun nyajin ngaykundu praymanya. Ngayu yunun ngulkurr-bungalda bambaymun. Warngku kulurmal yundu ngaykuwunbu bayanba dungay. Yundu juranku bunday baja, 15 years. Ngayu yanyu town Jerusalem ngulkurrduku kujil Assyria-warrandamun, ngayu Davidanda promise dajinya.’ ” Yinya kuku Godungku Hezekiahanda balkan. Yinyamun Isaiahangka kingandamunbu workingmananda yalaman, “Medicine balka mayimun figmun, kinganda balamumunbu yijarrika, nyulu ngulkurrmalda.”
Bama kukuji bubumun Babyloniamun.
20.12-21
12-13 Nyulu kingangka bubumun Babyloniamun kuku nyajin King Hezekiah ngulkurrmanya bambaymun. Yinyaynka nyulu bama kukuji yungan, present dajinka Hezekiahnda. Hezekiahngka jananin kukuji yulmbarrin, jananda nyungu money silver and gold milbin, nyungu mayi jirray and soldier-soldier wubulku nyulu milbin Babylonia-warranda.
14-19 Yinyamun prophet Isaiah Hezekiahnda babajin, “Jana bama wanjamun kadarin? Yundu jananda wanyu milbin?” Hezekiahngka yalaman, “Jana kala-kalbaymun kadarin, bubumun Babyloniamun.” Isaiah babajin, “Jana wanyu nyajin yunuwunbu bayanba?” Hezekiahngka yalaman, “Jana wubulku nyajin, mayi, money, soldier-soldier.” Isaiahngka yalaman, “Godungku balkan jana Babylonia-warrangka juma junjuy-junjuy wubulku yalaymun ngakil, wundil janawunbu bubungu. Jana yanyu bubu buyun-damal, bama Israel-warra jananga slave-warramal.” Hezekiahngka yinya kuku nyajin, nyulu yalaman, “Kaki Godungku balkanka, balu nyulu balka.”
20-21 Wawu 15 yearsmun Hezekiah wulan, nyungu kangkal Manasseh kingman.