9
Kuku Godundumunku bamanka Jew-warranka.
1 Ngayu kari jurrilmal, ngayu Christamu bama. Godumu Wawu ngayku majakuda, nyulu ngaykuwunbu dukurrbu bundanday. Nyulu binal ngayu jurril kari.
2 Ngayu manubajabuku balkal, “Ngayu jiba-badikuda ngaykuwunku jawun-karranka, jana Jesus Christ kari wukurrinya.”
3 Ngayu milka-bujarku bunday jananka, Godungku janangan bada-bada bayanga yunganya. Ngayu wawu nyulu nganyaku yunganka buralba janawunbu. Jana ngayku jawun-karra, jana Jew-warra yala ngayu. Yinyaynka ngayu wawu jana Jesus wukurrinka.
4 Godungku Jew-warra wangkanin nyungu bamamanka. Nyulu jananin kunjan, nyungu kangkal-kangkalmanka. Nyulu nyungu junkurr jirray milbin jananda. Nyulu nyungu law dajin jananda. Nyulu jananda balkan wanjarrku nyungun ngulkurrduku buyay-maninka. Nyulu promiseim-bungan, jananin ngulkurrduku kujinka.
5 Jew-warramu nganjan-karra ngadimunku Abraham, Isaac, Jacob. Nyulu Jesus Christ balkajin bubungu, nyulu bama Jewman. Jesus Christ maja jirray yiringkurrku. Ngana God buyay-mana wuljaljiku.
6 Godungku bamanda Jew-warranda promise dajin nyungu bamamanka. Yamba kanbalda nyungun kari wukurrinya, jana nyungu bama kari. Yinyaynka Godumu promise jananka kari. Godumu kuku promise kari kunban. Bamanga ngamu, nganjan nguba Jew. Yamba yinyamundu kari nyungun Godumu bama-bungal.
7 Jana bama Abrahamandamun kari wubulku Godumu kangkal-kangkalman. Kanbalku. Godungku Abrahamanda balkan,
“Jana bama yunuwunmun kangkalandamun Isaacandamun, janaku ngayku bamamal.”
8 Abrahamamu yindu kangkal Ishmael, bama nyungundumun kari Godumu bamaman, jana Godumu promise kari believeim-bunganya. Godungku Abrahamanda promise dajin kangkalanka Isaacankaku, Ishmaelanka kari.
9 Godungku Abraham promiseim-bungan,
“Next year ngayu junkurr dajil yunuwunbu manyarranda Sarahanda, kangkal balkajinka nyungu.”
Bulanga kangkal Isaac balkajin, yinya kuku manubajamankuda.
10-13 Isaac yalbayman, Rebecca nyungu manyarrman. Juma Rebecca kulngkulman, waralji jambulji twinsmunji. Godungku Rebeccanda yalaman,
“Nyulu kangkal Esaungurr balkaji, kangkal Jacob kudamundu. Yamba Jacob majamal Esaunku. Yabaju majamal yabanka.”
Godundumundu kabanda balkan,
“Ngayu Jacobanka wawu jirray bajaku jarra Esaunkulu.”
Godungku yinya kuku balkan, bula balkajinjiku. Nyulu yinya kuku balkan bula ngulkurrmanjiku, yala buyunmanjiku. Yinyaynka ngana binal Godungku nyubunku wangkanin, nyungun wukurrinka. Yamba nyulu Jacob kari wangkanin, Jacobangka ngulkurr balkanya. Kari. God walu-yindu bamanka. Kaki nyulu bama wangkaninka nyungun wukurrinka, nyulu wangkanilkuda. Nyulu kari wangkanil, jana ngulkurr balkanya.
14 Kanbalda nguba yalamal, “Nyulu God buyun, nyulu kanbal bama wangkaninya, kanbal kari.” Kari. Yala kari. Godku junkurrji, bama wangkaninka.
15 Yinyaynka nyulu Mosesanda yalaman,
“Kaki ngayu manun-manunmanka bamanka, ngayu manun-manunmal. Kaki ngayu jiba-badinka bamanka, ngayu jiba-badi. Ngayuku baja.”
16 Yinyamun kukumun ngana binalmal Godungku bama kari ngulkurrduku kujil, jana ngulkurr balkanya. Kari. Nyulu bama helpim-bungal, nyulu manun-manunmanya jananka.
17 Godungku King Pharoahundu yalaman,
“Ngayu yunun king-bungan, bamangka nyajinka ngayuku junkurrji bajaku. Yinyamun jana yiringkurrku binalda ngayuku Godkuda.”
18 Yinya manubajakuda. God manun-manunmal kanbalanka, jananin wangkanil nyungun wukurrinka. Yamba kanbal nyulu dukul-dandi-bungal, jana nyungun kari wukurrinka.
God kanbalanka kuli-kaday, kanbalanka manun-manunmal.
19 Yurra nguba yalamalda, “Kaki God yalaku, nyulu wanyurrinku bama nyuyal buyun-buyunku? Wanyurrinku jana malaji buyun-buyunku? Nyuluku jananin mambarril ngulkurr balkanka or buyun balkanka, nyulu janangan kari nyuyanyaku.”
20 Ngana kari yalaku milkabu wukurrika. God junkurrjikuda. Ngana nyungun kari murru-kanga. Nyulu nganangan balkan. Ngana kari nyungundu balka, “Yundu nganya wanyurrinku yalaku balkan?”
21 Yinya yala bamangka dish balkal bubumun claymun. Nyuluku decidemaniji wanyu dish nyulu balkanka. Nyulu nguba bubu clay manil, nguba nyubun dish mayika balkal, nguba yindu rubbishmunku balkal. Yamba nyuluku baja wanjarrmanka.
22 Godumu way yalaku. Nyuluku baja wanjarrmanka bamanda. God kuli-kaday bamanka buyunku, nyulu jananda nyungu junkurr milbinka. Nyulu janangan bada-bada bayanga yunganka, yamba nyulu kariku yungal. Nyulu jananka waitmal. Juma nyulu yungalkuda.
23 Nyulu manun-manunman nyunguwunku bamanka, and nyulu waitmalmal nyuluku milbijinka ngananda. Nyulu wawu ngana nyajinka nyulu ngulkurr bajaku, dayirr bajaku. Nyulu ngadiku nganangan wangkanin nyungu bamamanka. Juma nyulu ngananin nyunguwunbu bubungu dayirrba wundil.
24 Nyulu nganangan wangkanin nyungu bamamanka. Ngana kanbal Jew-warra, kanbal kari, yamba ngana wubulku nyungukuda.
25 Godungku kuku balkan bamanka Gentile-warranka. Prophetangka Hoseangka Godumu kuku kabanba balkan. Nyulu balkan,
“Jakalbaku kanbal bama ngayku kari, yamba ngayu jananin ngayku bama bambalda. Jakalbaku ngayu jananka wawu kari, yamba ngayu jananka wawu jirrayda.”
26 Nyulu Hoseangka yanyu kuku yalarrku kabanba balkan,
“Jakalbaku Godungku yurranda balkan, ‘Yurra ngayku kari bama.’ Yamba juma nyulu yurranda balkal baja, ‘Yurra ngaykukuda kangkal-kangkal. Ngayu yurranga God. Ngayu wuljaljiku juranku bunday.’ ”
27 Ngadiku Isaiahangka yanyu kuku kabanba balkan,
“Jana Jew-warra wubulmarinkuda, wubul yala jukar jalunbu. Yamba bubanku Jew-warra ngayku bamamal, bubanku jirakalmal.
28 Godungku bama yiringkurrku jinbaldaku punishim-bungal, nyulu kari ngadingka waitmal.”
29 Isaiahangka yalarrku kabanba balkan,
“Nyulu God junkurrji bajaku. Nyulu kanbalku Jew-warra juran-bungan, kari wubulku. Nyulu kanbalamu wawu kari ngulkurr-bunganyaku, ngana wubulku wularinyaku yala jana bama ngadimunku townbu Sodom, townbu Gomorrah.”
Jew-warrangka law wukurrinka, janangaku wawu ngulkurrmanka.
30 Ngayu yinya kuku milkanga-bungal yurranda. Jana bama Gentile-warra, jana Jew-warra kari. Jakalbaku jana God kari nubin, ngulkurrmanka. Yamba juma jana kanbal ngulkurrman, jana janaku mambarrijinya Jesusanda, nyungundu milka-jananya.
31 Yamba jana Jew-warrangka wadu-wadu yalaman, “Kaki ngana law wubulku kujil, Godungku ngananga buyun-buyun kidal, ngananga wawu ngulkurr-bungal.” Kari. Jana can't law wubulku wukurril. Kanbal law jana dumbarrin. Yinyaynka jananga wawu kari ngulkurrman.
32 Jana Godumu way kari warrmba-bungan. Jana law wubulku wukurrinka, balu jana ngulkurrmal, jana junkayku bundanya. Yamba Godumu way yalaku: Kaki ngana ngulkurrmanka, ngana nganaku mambarrijika Jesusanda, nyungunduku milka-janay. Yinyamun God nganawunku buyun-buyunku milka-wulay. Jesus bubungu bundandan, jana Jew-warrangka kari believeim-bungan nyulu Godumu kangkal. Jana nyungun kari believeim-bungan, nyulu buyun-buyun kidanka. Jesus yala kulji jirray jananda. Jana jurrngajin, yala kulji nyungundu, jana nyungun warmbinya.
33 Godundumundu kabanda balkal,
“Ngaykuwunbu townbu Zion ngayu Jesus Christ yijarrin. Nyulu yala kulji bama jurrngaji. Kaki bamangka nyungun warmbil, yinyarrin bama yala jurrngaji nyungundu, jananga wawu wulaykuda. Yinya yala jana bubungu daraykuda. Kari. Kaki bamangka nyungun believeim-bungal, jananga wawu juranmalkuda. Godungku jananin kari manubu-wundil.”