18
DAVID BULA JONATHAN
1-4 Saulumu kangkal dingkar nyubun burri Jonathan. Nyulu Davidanka wawu jirray. Davidangka Goliath yarkinkaku kunin, yinyamun Saulungku David nyunguwunbu bayanba kujin, David kari nganjananji bundan baja. Jonathan Davidanka wawumanya, nyulu nyungu kambi, nyungu kunjuri shield, naybu, wayarri Davidamu dajin.
Saulungku David soldier-bungan, nyungun yungan, bamanji kuli-bakanji kuniwanka. David binalman kuniwanka, bama kuli-baka kuninyarrkuda. Yinyaynka Saulungku nyungun maja-bungan kanbalanka soldier-soldieranka. Jana soldier-soldier wawurr-wawurrman, David jananka majamanya.
Saulungku ngura-nyajin David.
18.6-16
6-9 Davidangka Goliath yarkinkaku kunin, yinyamun jana David, Saul, soldier-soldier wubulku bayanbaku dungarin baja. Jalbu-jalbungku yiringkurrku jananin maku-nyajin, singman, wulngku balkan, dancemanijin. Jana jalbu-jalbu singman, yalaman, “Saulungku bama kuli-baka wubul kunin, yamba Davidangka wubul bajaku kunin.” Saulungku yinya kuku nyajin, nyulu kuli-kadan, yalaman, “Juma jana David king-bunganka, nyulu nganya karrnga-dajinka.” Yinyaynka Saulungku ngura-nyajin David, nyungunku wawu-kariman.
10-16 Warngku nyubunman dubu Godundumun Saulundu walan, nyulu Saul kiru-kariman. Davidangka wulngku harp balkal-balkan, Saulungku nyungun kalkabu damanka. Saulungku kalka jambul yilban Davidanda, yamba David jinbalku jurrkijin, Saulungku nyungun nyundan. Saul binal God Davidanji, yamba Godungku nyungun Saul bawan. Yinyaynka Saul yinyilman Davidanka. Saul yinyilmanya Davidanka, nyulu David nyungundumun yungan. Nyulu David maja-bungan soldier-soldieranka 1000-balanka, jananin bubungu yindu-yinduymbu yungan, bamanji kuli-bakanji kuniwanka. God Davidanji bundandanya, David junkurrjiman bamanka kuli-bakanka, jananin kangan. Saulungku yinya kuku nyajin, nyulu David ngura-nyajin baja. Yamba jana Israel-warra Davidanka wawu jirray, nyulu binalmanya kuniwanka, bama kuli-baka kanganka. Davidangka juma Saulumu kangkal marryim-ban.