16
परमेश्वरए म्हिमैंए ल्हागिर भेटि
1 यहूदीया ह्युलर्बै परमेश्वरए म्हिमैंलाइ ल्होबर रेबै भेटिए बारेर ताँ घ्रि बिल् त्हुम्। ङइ गलातिया ह्युलर्बै बिश्वासीमैंने बिब् धोंले क्हेमैंज्यै या लद्।
2 सद् ह्रोंसे क्हेमैं ताँनइ ह्रों-ह्रोंसए कमैं अनुसार मुइ स्यो थेंन्। छ लस्याँ ङ खबै त्हेर मुइ स्योरिल् आत्हु।
3 धै ङ खसि क्हेमैंइ त्हाँबै म्हिमैंए योर्न प्ह्रिछ्या पिंसि क्हेमैंइ स्योबै मुइ पिंनेबर चमैं यरूशलेमर कुल्मिंब्मुँ।
4 ङन् ह्याल् त्हुलेया ङ चमैं बोसिन् ह्याब्मुँ।
ह्रोंसए बारेर्बै ताँ
5 ङला माकेडोनिया ह्युलर ह्याल् त्हुबै के मुँ। छतसि माकेडोनियाउँइँलेन् ङ क्हेमैंने त्होबर खम्।
6 दे त्हे ङ क्हेमैं ङाँर्न टिमुँ, खै ग तस्याँ सर्ख तिमिंन् टिब्मुँ। च लिउँइँ ङ खनिर ह्यालेया ङलाइ चैदिबै घ्याँ खर्ज क्हेमैंइ पिंल् खाँब्मुँ।
7 चु लार ङ क्हेमैंने दे त्हे मत्त्रे आङिं, प्रभुजी ङलाइ टिल् पिंस्याँ ङ क्हेमैंने ल्हेन् टिबै सैं मुँ।
8 पेन्तिकोसए चाड समाम् ङ एफिसस सहरर्न टिम्।
9 बिरोध लब्मैं ल्हेन् मुँलेया चुर सैं तोंबै ताँ बिमिंबै थेबै मौका ङइ योंइमुँ।
10 तिमोथी क्हेमैं ङाँर खमा चलाइ छेनाले मान लद्। चइ तोइ सैरै न्हुँ लल् आत्हुरिगे, तलेबिस्याँ ङइ लब् धोंलेन् चज्यै या प्रभुए के लम्।
11 छतसि खाबज्यै या चए सैं नल् आलरिगे, बरु च ङ ङाँर एखबै ल्हागिर छेनाले कुल्मिंन्। तलेबिस्याँ अरू बिश्वासमैंने बालुन् चै या ङ ङाँर खब्मुँ बिसि ङइ ह्रेरिइमुँ।
12 अलि अपोल्लसए बारेर्बै ताँ तो जा बिस्याँ, चलाइ अरू अलिमैंने क्हेमैं ङाँर ह्यारिगे बिसि ङइ ल्हेन् यो छ्युँ लइ। तिंयाँ समा चइ ह्याबै सैं आल, दिलेया लिउँइ बिस्याँ मौका योंस्याँ खबै सैं लइमुँ।
आखिरिर बिल् त्हुबै ताँमैं
13 न्ह क्रों मि क्रोंले टिद्, बिश्वासर भों तद्, सैं भोंब् लद्, आङ्हिंन्ले टिद्।
14 ताँनने म्हाँया लद्। छेनाले क्ह्रिसि के लद्।
15 अखैया ह्युलर्बै स्तिफनस नेरो चए परवाए बारेर क्हेमैंइ था सेइमुँ। च ह्युलर्बै म्हिमैं न्होंरि चमैं ताँन् भन्दा ओंसों प्रभुए फिर बिश्वास लब्मैं ग। परमेश्वरए म्हिमैंए सेवा छेनाले लबर चमैंइ ह्रोंसलाइन पिंवाइमुँ।
16 छतसि ओ अलि-अङाँमैं, क्हेमैं या छाबै म्हिमैं नेरो चमैंने क्ह्रिसि छलेन् के लब्मैंइ बिबै ताँमैं ङिंन् बिसि ङ क्हेमैंने यो छ्युँ लम्।
17 स्तिफनस, फोर्टुनाटस नेरो अखाइकस चुर खमा ङ सैं तोंइ। तलेबिस्याँ क्हेमैं चुर आरेलेया क्हेमैं मुँब् धोंन् ङ्हाँइ।
18 चमैंइ क्हेमैंए सैं तोंन् लब् धोंले ङलाज्यै या तोंन् लमिंइमुँ। छाबै म्हिमैंए मान लल् त्हुम्।
19 चु एशिया ह्युलर्बै बिश्वासीमैंइ क्हेमैंने जय मसीह बिमिंइमुँ। अकिलास, प्रिस्का नेरो चमैंए धिंर खागु तबै बिश्वासीमैंज्यै या क्हेमैंलाइ प्रभुए मिंरि जय मसीह बिमिंइमुँ।
20 चुर मुँबै ताँन् अलि-अङमैंज्यै या क्हेमैंने जय मसीह बिमिंइमुँ।
क्हेमैंज्यै या घ्रिइ घ्रिने ह्रोंसए अलि-अङमैंने धोंलेन् म्हाँया लद्।
21 ह्रोंसए योइन ङ पावलइ क्हेमैंलाइ जय मसीह प्ह्रिरिइमुँ।
22 प्रभुलाइ म्हाँया आलबै म्हिइ सराप योंरिगे।
ओ प्रभु यु।
23 प्रभु येशू ख्रीष्टए दयाम्हाँया क्हेमैंए फिर तरिगे।
24 क्हेमैं ख्रीष्ट येशूए फिर बिश्वास लब्मैं ताँनए फिर ङइ म्हाँया खरिम्।