7
ग. चमैंइ ङ्योएबै ताँमैंए ज्वाफ पिंब
१. ब्ह्या लबै बारेर्बै ताँमैं
1 क्हेमैंइ प्ह्रिबै प्ह्रिछ्यार्बै ताँमैंए ज्वाफ ङइ चु प्ह्रिछ्यार प्ह्रिइमुँ।
“म्हिइ ब्ह्या आलल्ले टिब छ्याँब ग” बिसि क्हेमैंइ प्ह्रिइ।
2 दिलेया [ङइ छ बिम्:] च्हौ ल्हें ब्यभिचार तबइले ताँन् मुँयुँमैंल ह्रों-ह्रोंसल्न प्ह्रेंस्यो मुँल् त्हुम्, छलेन ताँन् च्हमिरिमैंलै या ह्रों-ह्रोंसल्न प्युँ मुल् त्हुम्।
3 प्युँइ ह्रोंसए प्ह्रेंस्योए ल्हागिर लल् त्हुबै केमैं लरिगे, छलेन प्ह्रेंस्योज्यै या प्युँए ल्हागिर लल् त्हुबै केमैं लरिगे।
4 प्ह्रेंस्योए ज्यु ह्रोंसल् आङिं, चए ज्यु प्युँल् तम्। छलेन प्युँए ज्यु या ह्रोंसल् आङिं, चए प्ह्रेंस्योल् तम्।
5 छतसि क्हेमैं क्ह्रिसि टिबै ल्हागिर घ्रिइ बिब घ्रिइ ङिंल् त्हुम्। दिलेया प्राथना लबै ल्हागिर क्हेमैं सल्ला लसि तिस्या स्यो तलेया लिउँइ क्हेमैं बालुन् तल् त्हुम्। छ आलस्याँ क्हेमैंइ सैं फैल् आखाँबइले दुष्टइ मौका योंल् खाँम्।
6 क्हेमैंइ ब्ह्या ललन् त्हुम् बिसि ङइ कर आल्हैदि, दिलेया क्हेमैं ब्ह्या लबै सैं मुँस्याँ ललेन् तम्।
7 ङए सैंरम् क्हेमैं ताँन् ङ धोंलेन् ब्ह्या आलल्ले टिरिगे ङ्हाँइमुँ। दिलेया ताँन् म्हिलाइ परमेश्वरजी स्यो-स्योबै बरदान पिंइमुँ। कोइलाइ घ्रि खालर्बै बरदान पिंइमुँ बिस्याँ, कोइलाइ अर्कोन् खालर्बै बरदान पिंइमुँ।
8 तारे ब्ह्या आलब्मैं नेरो म्हरेस्योमैंने ङ बिमुँ: क्हेमैं ङ धोंलेन् ब्ह्या आलल्ले टिब ठिक मुँ।
9 दिलेया क्हेमैं ब्ह्या आलल्ले टिमा ह्रोंसए सैं फैल् आखाँस्याँ क्हेमैंइ ब्ह्या लबन् छ्याँब् तम्। तलेबिस्याँ ज्युर्बै इच्छाइ दुःख पिंब् भन्दा क्हेमैंए ल्हागिर ब्ह्या लब छ्याँब मुँ।
10 तारे ब्ह्या लब्मैंने ङइ चु ताँ बिम्। प्ह्रेंस्यो ह्रोंसए प्युँने फ्रेयाल् आत। चु ताँ ङइ मत्त्रे बिब आङिं, प्रभु येशूजीन् बिब् ग।
11 च ह्रोंसए प्युँने फ्रेसि टिलेया ब्ह्या आलल्ले टिल् त्हुम्, धै ह्रोंसए प्युँने बालु क्ह्रिल् त्हुम्। छलेन प्युँज्यैया प्ह्रेंस्योलाइ पार लल् आत।
12 अरूमैंलाज्यै या ङइ चु ताँ बिमुँ। (चु ताँ प्रभु येशूजी बिब आङिं, ङइ बिबै ताँ ग।) येशूए फिर बिश्वास लबै मुँयुँल बिश्वास आलबै प्ह्रेंस्यो मुँस्याँ, च प्ह्रेंस्योइ च मुयुँने अझै टिबै सैं लस्याँ च बिश्वास लबै मुँयुँइ ह्रोंसए प्ह्रेंस्यो पार लल् आत।
13 छलेन येशूए फिर बिश्वास लबै च्हमिरिल बिश्वास आलबै प्युँ मुँस्याँ, च प्युँइ च च्हमिरिने टिबै सैं लस्याँ च च्हमिरिइ ह्रोंसए प्युँलाइ पार लल् आत।
14 तलेबिस्याँ बिश्वास लबै प्ह्रेंस्योउँइँले बिश्वास आलबै प्युँ पबित्र तम्। छलेन अबिश्वासी प्ह्रेंस्यो बिश्वासी प्युँउँइँले पबित्र तम्। च पबित्र आतस्याँ क्हेमैंए प्हसेमैं पबित्र आतमल, छतसि क्ह्रोंसेंन क्हेमैंए प्हसेमैं या परमेश्वरए म्हिमैं तसि पबित्र तइमुँ।
15 दिलेया बिश्वास आलबै मुँयुँ अथवा च्हमिरिइ फ्रेयाबै सैं लस्याँ फ्रेयारिगे। छ तस्याँ बिश्वासी म्हि चए न्होंर टिल् आत्हु, तलेबिस्याँ परमेश्वरजी ङ्योलाइ शान्तिर टिबर त्हाँब् ग।
16 ओ बिश्वासी च्हमिरि, क्हिइ आसे वा? ह्रोंसए अबिश्वासी प्युँलाइ परमेश्वरए घ्याँउँइ डोरेल् खाँम् उ? छलेन ओ बिश्वासी मुँयुँ, क्हिइ आसे वा? ह्रोंसए अबिश्वासी प्ह्रेंस्योलाइ परमेश्वरए घ्याँउँइ डोरेल् खाँम् उ?
ओंसों क्हेमैं खैब मुँल छलेन छ्ह थोद्
17 परमेश्वरजीन् ङ्यो ताँनलाइ त्हाँब् ग, बरदानै या खीजीन् पिंब् ग। छतसि ह्रोंसइ योंबै बरदान अनुसार्बै केमैं लसि छ्ह थोल् त्हुम्। ताँन् क्ल्ह्योर्बै बिश्वासीमैंने ङइ चु ताँन् बिइमुँ।
18 ज्युर चिनु लबै म्हिलाइ परमेश्वरजी त्हाँइमुँ बिस्याँ चइ च चिनु मेटिदिवाबै सैं आलरिगे। छलेन ज्युर चिनु आलबर्न परमेश्वरजी त्हाँइमुँ बिस्याँ चइ ज्युर चिनु आलरिगे।
19 तलेबिस्याँ ज्युर चिनु लबै ताँ थेब आङिं। बरु परमेश्वरजी बिबै ताँ ङिंब थेबै ताँ ग।
20 परमेश्वरजी त्हाँमा क्हेमैं खैले छ्ह थोरिल, छलेन् क्हेमैं थोल् त्हुँम्।
21 परमेश्वरजी क्हिलाइ त्हाँमा क्हि केब्छैं मुँस्याँ तोइ न्हुँ आलद्। दिलेया क्ल्हेए धिंउँइँले त्होंसि ह्याबै मौका योंस्याँ ह्याद्।
22 तलेबिस्याँ प्रभुजी त्हाँमा केब्छैं मुँलेया तारे चलाइ प्रभु येशूजी केब्छैं तबइले फ्रेमिंइमुँ। छलेन प्रभुजी त्हाँबै त्हेसेरो च म्हि केब्छैं तबइले फ्रेमिंइमुँ, छतसि च म्हि प्रभुए के लबै म्हि तइमुँ।
23 परमेश्वरजी क्हेमैं सै फोसि खामिंब् ग, तारे क्हेमैं पापए न्होंर टिल् आत्हु। छतसि क्हेमैं म्हिमैंए केब्छैं आतद्।
24 ओ ङए अलि-अङाँमैं, परमेश्वरजी त्हाँमा क्हेमैंइ खैले छ्ह थोरिल, छलेन् परमेश्वरने संगति लसिन् टिरिद्।
म्हरेस्योमैं नेरो ब्ह्या आलब्मैंए बारेर्बै ताँ
25 तारे कन्येमैंए बारेर प्रभु येशूउँइँले बिल् त्हुबै ताँ ङने तोइ आरे। दिलेया प्रभु येशूउँइँले दयाम्हाँया योंसि ङ म्हिमैंइ क्वेंल् खाँबै म्हि तबइले ङइ क्हेमैंलाइ सल्ला पिंम्।
26 तिंजोरो ल्हें दुःख म्रोंमा खाब् खैले मुँ छलेन् टिस्याँ छ्याँब तम् बिब ङए सैं मुँ।
27 क्हिइ ब्ह्या लइमुँ बिस्याँ ह्रोंसए ह्रेंस्योने फ्रेयाबै सैं आलद्। छलेन क्हिइ ब्ह्या आलइमुँ बिस्याँ ब्ह्या लल् आम्हैद्।
28 दिलेया क्हिइ ब्ह्या ललेया पाप आख, कन्ये च्हमिरिइ ब्ह्या ललेया च पाप आङिं। दिलेया ब्ह्या लब्मैंइ त्हिंइ ह्रोंसे न्हुँ लल् त्हुम्। छतसि क्हेमैंइ छले न्हुँ लल् आत्हुरिगे बिब ङए सैं मुँ।
29 ओ अलि-अङाँमैं, ङइ बिल् म्हैबै ताँ चुन् ग: प्रभु युबै त्हिंइ चेंदोन् तखइमुँ। छतसि ब्ह्या लब्मैं ब्ह्या आलब्मैं धों तसि प्रभुए के लद्।
30 झाइले न्हुँ लब्मैं न्हुँ आलब्मैं धोंले टिरिद्। छलेन सैं तोंब्मैं सैं आतोंब्मैं धोंले टिरिद्, किंसि पखबै सैमैं या ह्रोंसल् धों आङ्हाँन्।
31 झाइले छों लब्मैं छों आलब्मैं धोंन् तरिगे तलेबिस्याँ चु ह्युल युनन् नास तयाम्।
32 क्हेमैं चु ह्युलर टिमा तोइ न्हुँ लल् आत्हुरिगे बिब ङए सैं मुँ। ब्ह्या आलबै म्हिइ प्रभुलाइ खैले सैं तोंन् लब् ङ्हे ङ्हाँसि प्रभुए केर मत्त्रे न्हुँ लम्।
33 दिलेया ब्ह्या लबै म्हिइ ह्रोंसए प्ह्रेंस्योए सैं खैले तोंन् लब् ङ्हे ङ्हाँसि ह्युलर्बै सैर न्हुँ लम्।
34 छाबै म्हिए सैं ङ्हिरि तम्। छलेन ब्ह्या आलबै च्हमिरिइ अथवा कन्येइ ज्यु नेरो सैं ङ्हिंन-ङ्हिंनइ प्रभुए के खैले लब् ङ्हे बिसि प्रभुए केर्न सैं पिंम्। दिलेया ब्ह्या लबै च्हमिरिइ ह्रोंसए प्युँए सैं तोंन् लबै ल्हागिर ह्युलर्बै सैर न्हुँ लम्।
35 क्हेमैंइ ब्ह्या आलरिगे बिसि ङइ चु ताँ बिब आङिं। क्हेमैं सैं घ्रिन् तसि प्रभुए के छेनाले लसि छ्ह थोल् खाँरिगे धै क्हेमैंलाइन छ्याँब तरिगे बिसि ङइ चु ताँ बिब् ग।
36 खाबज्यै या ब्ह्या लब् बिसि ह्रिथेंबै च्हमिरिने खेंमैं ङ्हिंन् सल्ला लसि “दे त्हे ङ्यो ब्ह्या आलल्ले टिले” बिलेया, लिउँइ मुँयुँए ब्ह्या लबै सैं खस्याँ चमैं ब्ह्या लरिगे। छले लबै ब्ह्या पाप आङिं।
37 दिलेया च म्हिइ ह्रोंसए सैं फैल् खाँमुँ, ब्ह्या आलल्ले टिल् खाँमुँ, बिस्याँ च ह्रिथेंबै च्हमिरिने चइ ब्ह्या आललै या ठिकन् मुँ।
38 छलेन खाबइ ह्रोंसइ ह्रिथेंबै च्हमिरिने ब्ह्या लमुँ, चइ ठिकन् लम्। दिलेया ब्ह्या आलल्ले टिस्याँ झन् छ्याँब तम्।
39 ह्रोंसए प्युँ आसिन् समा च्हमिरि ह्रोंसए प्युँनेन् टिल् त्हुम्। दिलेया प्युँ सियाबै लिउँइ धबै च म्हरेस्योइ ब्ह्या लदा ङ्हाँस्याँ चइ ब्ह्या ललेया तम्। दिलेया चु ब्ह्या प्रभु येशूए फिर बिश्वास लबै म्हिनेन् तल् त्हुम्।
40 दिलेया चइ ब्ह्या आलल्ले टिम् बिस्याँ झन् छ्याँब तम्। चु ङए सैंर्बै ताँ ग, ङने या परमेश्वरए प्ल्ह मुँ बिब ङइ मैंमुँ।