14
जोगेथेंबै म्हिमैंए क्वे
1 ङइ धबै ङ्ह्योमा क्यु च्हज सियोन बिबै कोंर रारिब् म्रोंइ। खीने बालु लाख घ्रि से प्लिच्यु से हजार प्लि (१,४४,०००) म्हि मुँल। चमैंए ङ्होर क्यु च्हजए मिं नेरो खीए आबाए मिं प्ह्रिथेंल।
2 झाइले ङइ स्वर्गउँइँले बेल्ले नुबै क्यु छारेए कै धों तब, अथवा थेबै मु ङ्हेब् धों तबै कै थेइ। चए कै बीणा ह्राब्मैंइ ह्राबै बिणाए कै धों तब् मुँल।
3 च लाख घ्रि से प्लिच्यु से प्लि हजार म्हिमैं राजगद्दिए ओंसों सो प्ह्याबै सै प्लि, नेरो ङ्हिस्युसे प्लि चिब्मैंए उँइँर रारिल। चमैंइ छारा भजन प्रिंमल, तलेबिस्याँ खीए ल्हागिर फुइ धों तरिगे बिसि पृथ्बीर्बै म्हिमैंए म्हाँजोउँइँले खीजी चुमैं त्हाँब् ग।
4 चुमैं च्हमिरिमैंने आन्होंल्ले टिब्मैं ग। क्यु च्हज खनि खनि ह्यामुँ, चुमैं या खीए लिलिन् ह्यामल। चुमैं परमेश्वर नेरो क्यु च्हजए ल्हागिर म्हिमैंए न्होंउँइँले खासि ओंसोंबै रोए फुइ धोंले त्हाँब्मैं ग।
5 चुमैंइ स्योर ताँ खोंयोंइ आपोंमल, चुमैं तोइ छ्याब् आरेबै म्हिमैं मुँल।
स्वर्गदूत सों म्रोंब
6 च लिउँइ ङइ स्वर्गदूत घ्रि मुर प्हुररिब् म्रोंइ। खोंयोंइ तरिबै सैं तोंबै ताँ चने मुँल। च सैं तोंबै ताँ पृथ्बीर्बै म्हिमैंए ल्हागिर, अथवा ताँन् ह्रें, ताँन् कुल, ताँन् क्युइ पोंब्मैं नेरो ताँन् ह्युलर्बै म्हिमैंए ल्हागिर मुँल।
7 चइ थेबै कैले बिइ, “परमेश्वरने ङ्हिंन्, धै खीए मिं क्वेद्। तलेबिस्याँ खीजी म्हिमैंलाइ निसाफ लबै त्हे तखइमुँ। स्वर्ग, पृथ्बी, मा ङ्युँइ नेरो क्युए मुल्मैं बनेबै परमेश्वरलाइ पद्खु तसि फ्योद्।”
8 झाइले अर्को स्वर्गदूत ओंसोंबै स्वर्गदूतए लिलि ल्हैदिसि बिइ, “नास तयाइ! च बेबिलोन बिबै थेबै सहर नास तयाइ। च सहरर्बै म्हिमैंइ खैले खेंमैंइ ब्यभिचार लमुँ छलेन ताँन् ह्युलर्बै म्हिमैंलाइ ब्यभिचार लबर ल्हैदिल।”
9 झाइले अर्को स्वर्गदूत ओंसोंबै स्वर्गदूत ङ्हिंए लिलि ल्हौदिसि थेबै कैले बिइ, “खाबमैंइ च खेदो नेरो चए कुलाइ पूजा लमुँ, धै ह्रोंसए यो नेरो ङ्होर च खेदोए छाप झोंमुँ,
10 चमैंइ परमेश्वरए बेल्ले थेबै ह्रिसए प्हा थुँल् त्हुब्मुँ। च त्हेर तिफुँइ ल्हयो आखल्ले परमेश्वरजी सजैं पिंब्मुँ। च म्हिमैंइ पबित्र स्वर्गदूतमैं नेरो क्यु च्हजए उँइँरि मि नेरो गन्धकरि बेल्ले दुःख योंब्मुँ।
11 चमैंए सजैं पिंबै मिए मिखु खोंयोंइन कैंडो ह्यारिब्मुँ। च खेदो नेरो चए कुलाइ पूजा लब्मैं, धै चए मिंए छाप झोंल् ङिंब्मैंइ त्हिंयाँ म्हुँइँस सजैं योंसि खोंयोंइ छिं ङ्हाँल् योंरिब् आरे।”
12 दिलेया परमेश्वरए म्हिमैं बिस्याँ आङ्हिंन्ले ढुक्क तसि बिश्वासर भोंब तल् त्हुम्।
13 च लिउँइ “चु ताँ प्ह्रिद्: प्रभुए फिर बिश्वास लबइले तारे पिरु दु:ख योंसि सिब्मैंइ आशिक योंब्मुँ,” बिसि स्वर्गउँइँले युबै कै ङइ थेइ।
झाइले पबित्र प्ल्हजी बिइ, “चु ताँ क्ह्रोंसेंन् ग। चमैंइ दु:खले लबै केमैंए नों योंसि छिं ङ्हाँल् योंब्मुँ।”
पृथ्बीर्बै बालिमैं
14 झाइले ङइ फोस्रे ब्योंबै न्हाँम्स्यो म्रोंइ। च न्हाँम्स्योए फिर म्हि घ्रिइ योर कोरे छेसि टिरिब् म्रोंइ। चए क्रर माराए मुकुट मुँल।
15 झाइले अर्को स्वर्गदूत मन्दिरउँइँले बैरु त्होंसि थेबै कैले च न्हाँम्स्योर क्हुँरिबै म्हिने बिइ, “क्हिए कोरे छेसि बालि खैंन्, तलेबिस्याँ पृथ्बीर्बै बालिमैं खैंबै त्हे तयाल् खाँइमुँ।”
16 छबिमा च न्हाँम्स्योर क्हुँबै म्हिइ ह्रोंसने मुँबै कोरेइ पृथ्बीर्बै ताँन् बालिमैं खैंवाइ।
17 च लिउँइ स्वर्गर्बै मन्दिरउँइँले अर्को स्वर्गदूत बैरु त्होंब् ङइ म्रोंइ। चने या बेल्ले छ्यारबै कोरे मुँल।
18 छलेन अर्को स्वर्गदूत ख्रो पिंबै क्ल्ह्योउँइँले खइ। च स्वर्गदूतइ लुँरिबै मि सिल् आपिंबै जिम्मा योंल। च स्वर्गदूतइ बेल्ले छ्यारबै कोरे छेबै स्वर्गदूतने थेबै कैले बिइ, “पृथ्बीर्बै अँगुर ताँन् मिंल् खाँइमुँ। छतसि क्हिए कोरे छेसि थुद्।”
19 छबिमा च स्वर्गदूतइ ह्रोंसए कोरेइ पृथ्बीर्बै ताँन् अँगुरमैं थुसि कोलर झोंइ। च कोल परमेश्वरए ह्रिस ग।
20 च अँगुर म्हाबै क्ल्ह्यो सहरए बैरु मुँल। चर बोसि म्हाबै अँगुरउँइँले त्होंबै कोइ सोंप्र किलो मिटर समा प्हानेल धै च को सोंग्रु गैरु मुँल।