4
स्वर्गरि परमेश्वरए मिं क्वेब
1 च लिउँइ ङइ धबै दर्शनर स्वर्गर्बै म्रा थोंथेंब् म्रोंइ। धै ङइ ओंसों थेबै कैइ “छुइ कैंडो खो, ङइ क्हिलाइ तारे लिउँइ तबै ताँमैं उँइँमिंस्यो” बिबै बिगुलए कै ङइ थेइ।
2 च तोंदोंन् पबित्र प्ल्हजी ङ प्लिंयाइ, धै स्वर्गर राजगद्दि घ्रि मुँल, चर परमेश्वर क्हुँरिल।
3 खीए लि बिल्लौर नेरो लालमणि धोंले टल्कदिब् मुँल। राजगद्दिए कारग्युले पिंग्या रङर्बै पन्ना धों तबै ह्यार्गों मुँल।
4 च राजगद्दिए कारग्यु ङ्हिस्यु से प्लि ठिमैं मुँल। च ठिमैंए फिर क्हुँबै ङ्हिस्युसे प्लि चिब्मैंइ माराए मुकुट कुसि फोस्रे ब्योंबै क्वें खिल।
5 च राजगद्दिउँइँले काम्लि तिम्लि धोंबै चारबै बत्तिमैं म्रोंमल धै मु ङ्हेबै कैमैं थेमल। च राजगद्दिए उँइँरि मि लुँब् धोंबै बत्ति ङि मुँल। च बत्तिमैं परमेश्वरए प्ल्ह ङि मुँल।
6 च राजगद्दिए उँइँर सिसा धोंबै टल्कदिबै मा ङ्युँइ धों तबै सै मुँल।
राजगद्दिए कारग्युले सो प्ह्याबै सैमैं प्लि मुँल। चए ज्यु तिगोंन् मि-मि मुँल।
7 च सो प्ह्याबै सैमैं घ्रि सिंह धों ब्योंब् मुँल। घ्रि क्ल्या भारा धों ब्योंब् मुँल। घ्रि म्हि धों ब्योंब मुँल। झाइले घ्रि प्हुररिबै क्व्रे धों ब्योंब् मुँल।
8 च सो प्ह्याबै सैमैं प्लिल प्ह्या टु-टु मुँल, चमैंए ज्यु तिगोंन् नेरो प्ह्यागों न्होंरै या मि-मि मुँल। चमैंइ त्हिंयाँ म्हुँइँस
“तोन्दोंरि लल् खाँबै याहवेह परमेश्वर पबित्र, पबित्र, पबित्र मुँ।
खी ओंसों ओनोंन् मुँल, तिंयाँ या मुँ, लिउँज्यै या तरिब्मुँ।”
बिसि भों आन्हल्ले भजन प्रिंबै प्रिंबन् लरिमल।
9 चर मुँबै सो प्ह्याबै सै प्लिइ राजगद्दिर क्हुँबै खोंयोंइ या तरिबै परमेश्वरलाइ थेबै मानले भजनमैं प्रिंसि खीए मिंलाइ थेब् लसि धन्यबाद पिंरिम्।
10 छ लरिमा च ङ्हिस्युसे प्लि चिब्मैंइ राजगद्दिर क्हुँबै खोंयोंइ या तरिबै परमेश्वरलाइ पद्खु तसि फ्योम्, झाइले खेंमैंइ कुबै मुकुट राजगद्दिए उँइँर थेंसि छ बिरिम्,
11 “ओ ङिए प्रभु परमेश्वर,
क्हि थेबै मान, थेबै मिं नेरो हग योंल् त्हुब मुँ।
तलेबिस्याँ ताँन् सै क्हिजीन् बनेब् ग,
झाइले क्हिए सैंर मैंब् धोंले च ताँन् सैमैं तसि सो प्ह्याइ।”