4
1 तिगें येशू ख्रीष्ट ग्याल्स लबर युब्मुँ। च त्हेर खीजी सियाब्मैं नेरो सोगोंमैं ताँनए निसाफ लब्मुँ। छतसि क्हिइ लल् त्हुबै के तो जा बिबै ताँ ङइ येशू ख्रीष्ट नेरो परमेश्वर आबाए उँइँर क्हिने बिमुँ।
2 प्रभुउँइँले खबै सैं तोंबै ताँ म्हिमैंने बिप्रद्।
खैतबै त्हर्न बिलैया प्रभुउँइँले खबै सैं तोंबै ताँमैं बिब्रें लद्।
म्हिमैंलाइ अर्थि बुद्धि पिंन्।
चमैंए सैं क्होबै ताँमैं लद्। आतबै ताँमैंर हौदिद् धै म्हिमैंलाइ छेनाले लोदा सैंदा लद्।
3 तलेबिस्याँ म्हिमैंइ क्ह्रोंसेंन्बै ताँ थेदा आङ्हाँबै त्हे खब्मुँ। च त्हेर चमैंइ खेंमैंए सैंर तो मैंमुँ चन् लप्रब्मुँ। धै खेंमैंइ थेदा ङ्हाँबै ताँमैं मत्रै लोमिंबै म्हिमैं हुइसि चमैंए ताँ थेब्मुँ।
4 छले चमैं क्ह्रोंसेंन्बै ताँमैंउँइँले स्योयासि स्योलिबै ताँमैंए लिलि प्रयाब्मुँ।
5 क्हि बिस्याँ दुःख तलेया सैं तोंबै ताँमैं बिप्रबै के लब आपिद्। धै खैतबै दुःख तलेया सैदिद्, छले परमेश्वरउँइँले खबै सैं तोंबै ताँ बिप्रदै खीए के छेनाले लद्।
6 तलेबिस्याँ खैले म्हिमैंइ ख्रो पिंबर क्यु सैमुँ, छलेन ङलाज्यै या सैबै त्हे खइमुँ, तारे ङ क्हिने फ्रेइ ह्याबै त्हे खइमुँ।
7 ङए छ्हर खैतबै दुःख तलेया ङइ सैदिइ। धै ङइ लल् त्हुबै के छेनाले लइ। छले ङए फिर खैतबै दुःख तलेया ङइ बिश्वास लब आपि।
8 छले ङइ लबै केमैं खीए उँइँर ठिक ठर्दिबइले खीजी ङए ल्हागिर थेबै क्रेगि थेंइमुँ। छेनाले निसाफ लबै प्रभुजी च त्हिंइर च क्रेगि ङलाइ पिंब्मुँ - ङलाइ मत्त्रे आङिं, दिलेया प्रभुलाइ म्हाँया लसि खी युबै त्हिंइए घ्याँ ङ्ह्योरिब्मैं ताँनलाइ खीजी च क्रेगि पिंब्मुँ।
ह्रोंसए बारेर्बै ताँमैं
9 छतसि खाँन् समा ङ ङाँर युनन् खो।
10 तलेबिस्याँ डेमासइ चु ह्युलर्बै सैमैंए म्हाँया लसि ङलाइ वाथेंसि थेसलोनिका सहरर ह्याइ। क्रेसेन्स बिबै अलि गलातिया ह्युलर ह्याइ, धै तीतस दलमातिया बिबै क्ल्ह्योर ह्याइ।
11 लूका मत्त्रे ङने बालु मुँ। क्हि चुर खमा मर्कूसलाज्यै या म्है पखो, तलेबिस्याँ चइ प्रभुए के लबर ङलाइ ल्होम्।
12 तुखिकसलाइ ङइ एफिसस सहरर कुलइमुँ।
13 क्हि चुर खमा ङइ त्रोआस नाँसर कार्पसए ङाँर वाथेंबै कोट नेरो काउदमैं, बिलेन् त्हुमा ट्हुबिए काउदमैं खैलसे पइ खो।
14 अलेक्जेन्डर बिबै कुमालेइ ङलाइ बेल्ले दुःख पिंइ। प्रभुजी चलाइ चइ लबै के अनुसार्बै दण्ड पिंब्मुँ।
15 छतसि क्हि या चउँइँले जोगेसि टिद्, तलेबिस्याँ ङिइ म्हिमैंने सैं तोंबै ताँ बिमा चइ बेल्ले बिरोध लइ।
16 ङइ ओंसों रोमर्बै अड्डारि राइ पोंमा खाबज्यै या ङए ख आल। बरु ताँन् ङलाइ वाथेंसि छ्युडिह्याइ। दिलेया चु ताँए दोष चमैंलाइ आल्हैदिरिगे।
17 ताँन् म्हिमैंइ प्रभुए ताँ थेल् योंरिगे बिसि प्रभु ङए ङाँर रायुइ, धै खीए ताँ बिबै ल्हागिर ङलाइ भों पिंइ। छतसि ङ सिंहए सुँउँइँले स्योरसि खल् खाँइ।
18 प्रभुजी ङलाइ ताँन् आछ्याँबै सैमैंउँइँले जोगेमिंब्मुँ। झाइले खीए स्वर्गर मुँबै ग्याल्सर बोब्मुँ। खीलाइ म्हिमैंइ खोंयोंइन् बिलै या थेबै मान लरिगे। आमेन, छान् तरिगे!
आखिरि जय मसीह
19 प्रिस्किला, अकिलास नेरो ओनेसिफरसए परवाने ङए जय मसीह मुँ बिमिंन्।
20 इरास्तस कोरिन्थ सहरर्न टिइ, त्रोफिमस बिस्याँ सन्ज आतसि ङइ मिलेटस बिबै क्ल्ह्योर्न वाथेंइमुँ।
21 खाँन् समा क्हि सर्ख खब् भन्दा ओंसोंन् खो।
युबुलस, पुडेस, लिनस, क्लौडिया नेरो चुर्बै ताँन् बिश्वासी अलि-अङाँमैंइ क्हिलाइ जय मसीह बिमिंइमुँ।
22 प्रभु खोंयोंन् बिलै क्हिने प्रे तरिगे। धै खीए दयाम्हाँया क्हेमैंइ योंरिगे।