5
1 Guna nuwonúwana ataligei: Bogina tayagoi wowoda moe poyapoya wowonina yoyou nakae bei tuta kaakupina sikaaiyaka. Go neta sitauwe, wowoda vau Yaubada goi bei tababane. Wowoda vauyadi geya kada vada nakae tomota nimadi goi siiyowóidi geya, go sem ame wowoda vauyadi yábana goi sikaiyako vata.
2 Moe moitamo. Ame tuta wowoda ame goi takaaiyaka go, takalayawoi unana takatukúwana bego yábana wowonina vau kwama nakae takote.
3 Ago nakona ámasa goi wowoda bogo ame kwama nakae tavalilividi go, tuwo Yaubada bei geya ibabanedeta ma paawakuda geya o tadigo kada, ‘Geya wowodamo.’
4 U, kita ame tuta wowoda yoyou nakae goi takaaiyaka, tauna ida mou gagaidi pasidi takalayawoi go, geya latuwoda wowodayadi kwama bogo nakae tavalilividi, go sem latuwoda kwama bogo ada kwama vau goi talositaoidi bego kaga kaavavaidi ivalili yawoida vau goi.
5 E Tauyana wowoda vauyadi manudi ikatubayasida moe Yaubada. Tauyana aba kinana ivinida bei tayagoi nava wowoda vau tababanedi; ida kaba kinanayana moe Balomaina.
6 Tauna tuta liliuna takaatepatu. Bogina tayagoi bego tutayana ida vada wowoda goi takaaiyaka, e Tomoya taiyao geya takaiyaketa go, tuwo maada katepatu.
7 Moitamo. Ame tuta Tomoya geya tagiteyeta go, tuwo matada goi geya taketoiyeta, go sem ida numisa Tomoyayana yaina goi taaketoiya.
8 E takatepatu go, latuwoda wowoda ame takalave, e Tomoya ina dadava goi taiyao takaiyaka.
9 Tauna nakona ida vada wowoda goi takaiyaka o takalave go, ida nuwonúwana gagaina bego Yaubada tavauyaone.
10 Itoboineda tavauyaone unana madabokida Guyau ina kaba takínona goi bei tatáoya be kita tamo tamo nakonakae wowoda goi boi bogina taguinuwedi, neta dedevina o igoyo, e nakae guinuwayadi bei imapudi. Tauna tapoikīkina bego Tauyana tavauyaone.
Paulo latuwona da Korinta aedididi
sisamolai tauyana manuna
11 Tauna, ida Tomoya ina mapuyana pasina ana matoita wowooinina bogina kayagoi, tauna tomota katamyabidi bego Yaubada sinoko. E kai Yaubada bogina iyagoima. Go alotuta bego komi nakae koyagoima.
12 Geya kada aiyuwoina kakamoitamoema yaimi goi geya, go sem leta ame goi kalatuuwokoimi kaga unana itoboinemi manuma aedidimi kosamolai. Latuwoma bego itoboinemi ama toromgiyao kokatumapudi. Toromgiyaoyadi sigágasa toinidi adi kaigigita manuna go, aderidi manuna geya sinuwonuwoneta.
13 Imi samolaiyana itoboine. Kogita. Ama toromgiyao ima poisógana, ima bóbwara be ima sinapu sigitedi kadi, ‘Kidi Paulo adi kaigigita siyaluwo.’ Moe manuna geya kanuwonuwoneta unana ima poisoganayana atema goi moe Yaubada umana. O neta maniyedi sigitema kadi, ‘Kidi Paulo ma buluubuludi’, moe manuna nakae geya kanuwonuwoneta unana ima poisoganayana atema goi moe komi ami vaita manuna.
14 Moe itoboine. Ima poisoganayana unana Guyau ina matakoi ikalimonema. Ina matakoiyana manuna ame bogina kakinane: Bego koroto tayamo ikámasa tomota liliuda manuda, kita ada katumapu, tauna ana kaigigita madabokida takámasa.
15 Moe liliuuda manuda ikámasa bego kita maa yawoida geya tuwaina takaaiyaka toinida manuda, go sem Tauyana ikámasa be nakae itaoyamna manuda, e moe Tauyana umana takaaiyaka.
Paulo kidi sipaisewa Yaubada taiyao
tomota idi kabivekovekomna manuna
16 Tauna Tauyana ina kámasa pasina ame tuta ima sinapu ituli. Ame tuta be nakae tuta simamaima kai geya vatau tayaamo ana kaigigita goi bei kadovatusiye nakae da poyapoya siguinuwe. Boi mainao nava Guyau geya kayagoiyeta moe nakae Tauyana kadovatusiye bego Tauyana tomota besobeso go, ame tuta ima nuwonúwana ituli Tauyana manuna. Tauyana kayagoi Guyau.
17 Aiyuwoina Guyau ikámasa liliuda manuda, tauna avatauwa neta spwagoogonidi Guyauyana taiyao, e simalatomotavau. Sinapu bogo bogina isáwala go, konōve, sinapu vau bogina isowóduwo!
18 E moe dogoiyadi aivaudi liliudi Yaubada iguuinuwedi. Tauyana Guyau ina guinuwa goi ikabivekovekomneima go, abivekovekomnayana ana talavaita bogina ikawoima kaguinuwe.
19 Moe nakae Yaubada Guyau ina guinuwa goi da poyapoya ikabivekoveekomneida toinina umana, ida kapipilova geya ituuyouyoidita go, inumisema abivekovekomna valena katalavaite.
20 Tauna kai kina Guyau ana katumapuyao, e sopama goi Yaubada ina kawanoi itaalavaite. Tauna kai Guyau manuna kakawanoi makimaki tomota yaidi kama, ‘Kotagōna Yaubada ikabivekovekomneimi.’
21 Guyauyana goyo geya ilotowoeta go, kita manuda Yaubada ivayoko kina ada kimavada ana vininabeso bego kai ima spwagógana Tauyana taiyao pasina Yaubada ina kibóbwata ana kanasíuna manuna kakaiwoduwe.