3
Yaubada sivayuwoina Iyona iiduduwe tetelina
1 E sivayuwoina Yauwe ina livala ina Iyona yaina
2 idigo kana,
‘Iyona, kutāoya, woilīm kūna asa gagaina Ninivei goi guna livala bei alatuwokoim kutalavāite da Niniveiyadi yaidi.’
3 E tuwo moitamo Iyonayana itaoya mainao ina Ninivei nakae Yauwe idige. Niniveiyana asa gagaina nakae ana papaeva maliyalina aito nakae neta taaketoiya!
4 E Iyona ina Ninivei goi isiu ina maliyalina tayamo goi iiketoiya go, iiliwola da Ninivei yaidi idigo kana,
‘ “Maliyalina 40 sikavava, Ninivei bei atusaoli”, Yauwe kaena.’
Da Ninivei Yaubada ina livala siinumise tetelina
5 E tuwo livalayana da Ninivei sinove, Yaubada sinumise. Tuwo toinidi silovina kadi,
‘Liliuda tadiyakīmwana!’
Tuwo moitamo tomota liliudi gagaidi be giyaidi sidiyakímwana be nakae kwama salisalidi silosidi. Moe nakae aba kinana bego bogina situgavila.
6 E tutayana livalayana da Ninivei adi tolovina inove, e kebana esaaesaina goi itaoya, isou ina tanigo dedevina inisi go, kwama salisalina ilosi, e silekauna goi itusobu. Moe nakae aba kinana bego bogina itugavila.
7 Da Ninivei idi lovina ivinidi idigo kana,
‘Lovina ame yau imi tolovina be nakae imi tomoyamoya goi iwo yaimi. Lovinayana ame nakae: Kita tomota be nakae yoguyogu gagaidi be giyaidi taabu takakâika be nakae taabu tanimnîm,
8 go sem liliuda kwama salisalidi talosîdi be nakae areko salisalidi takabîdi yoguyogu toludi tavatûmdi. E liliuda takawanoi makimâki Yaubada yaina. Ida sinapu goyogoyoidi manudi tatugavila.
9 Seki, geya tayagoiyeta, nakona Tauyana nukotona igoyo bei itavívila, tauna ina egamogamogu gagaina itugavile, e bei geya tavailaita.’
10 E idi guinuwayadi Yaubada igitedi bego idi sinapu goyogoyoidi goi bogina situgavila, tuwo itavívila, e boi vailai idigedige bego iivinidi geya iguinuweyeta geya.