☰ LUKE 13
13
Tomota itoboinedi situgavila, govila bei sivailai
1 E tomota maniyedi tuta amo goi sikaaiyaka, da Galili valedi sitalavaite Yeisu yaina goi sidigo kadi,
‘Da Galili maniyedi idi vininabeso sikaasaledi Yaubada yaina go, Pailato ina lovina goi ina tovayaviyayao sina tokasalayadi sikaumatedi.’
2 Go kina Yeisu idigo kana,
‘Manakae? Konuwonúwana bego amo da Galiliyadi amo nakae sivailai, tauna tauyadi toogoyoidi toina Yaubada matana goi namliyeta da Galili madabokidi ae? 3 Ame alatuuwokoimi konōve: Moe nakae geya, go sem kotugavīla, govila bei komi madabokimi nakae kovailai. 4 Aiyuwoina tomota eitin (18) boi Siloam‡† Yerusalema sinaena goi sikaaiyaka go, vada maanawena isou ikaumatedi. Manakae? Konuwonúwana bego kidi idi goyo ivakaigaga Yaubada matana goi namliyeta kidi Yerusalema ana tokaiyakoyao madabokidi, tauna moe nakae eitiniyadi (18) sivailai ae? 5 Ame alatuuwokoimi konōve: Moe nakae geya, go sem kotugavīla, govila bei komi madabokimi nakae kovailai.’
6 E livalakaibala ame Yaubada ina liuna manuna ilatuwokoidi idigo kana,
‘Koroto tayamo ina oine tanuina goi keukeu ibaguli. Tuta tuta ina alovayana keuwoina iilusala go, geya keuwoinamo. 7 E ina tanuwoyana ana torugwáuta ilatuwoko idigo kana,
“Gwa, tala aito bogina amamaima ame alovayana keuwoina aalusala go, tuta liliuna geya keuwoinamo. Tauna kutalāi isou. Kaga ana dedevina alovayana ikaaiyaka? Geya, go sem alovayana pasina poyapoya dedevina bei ikavavaluge.”
8 E kina go torugwautayana idigo kana,
“Tomoya, tuwo. Tala ame nakae kwalāve. Ikaaiyaka ana kadókana unana goi giyaina aeli be mosamosa ayato ana bíbina ana vaita manuna. 9 Neta tala imamaima ikéuwo, dedevina ikaaiyaka, go geya, bei atalai isou.” ’
Sabati goi Yeisu vavina
maana katówana ikideedevine tetelina
10 E Yeisu Sabati tayamo Diyuu idi kaba tugúguna goi isiu ivaatulúkwana. 11 Ivaatulúkwana go, vavina tayamo ikaaiyaka, dimoni pasina atówana tayamo iyoisi, tuwo tala eitin (18) goi isaaluyou; geya itoboineyeta ivatotóyoma. 12 E vavinayana isaaluyou go, Yeisu igite, tuwo iduduwe ima ilatuwoko idigo kana,
‘Namoya, im katówana goi Yaubada bogina italigeim.’
13 Tuwo nimana iyatoidi vavinayana goi, e mainao itaoya dókana go, Yaubada ina togaga ana káeyana ikamoitamoe. 14 Go kina aba tugugunayana ana tolovina gamona igoyo unana moe Sabati goi Yeisu ikidedevina. Tauna boda ilatuwokoidi idigo kana,
‘Maliyalina ana badabada ainima tayamo sikaaiyaka itoboine bei kita tapaaisewa.† Tauna amo maliyalinayadi goi kōma bego ami kidedevina kobabane go, maliyalina tayamo goi taabu kopaaisēwa; maliyalinayana moe Sabati.’
15 Go kina Tomoyayana idigo kana,
‘Komi tamogemogemi! Komi tamo tamo Sabati goi kona imi bulumakau be imi ase kotaaligeidi idi vada goi konavedi kovanimdi ae? 16 E ame vavinayana Eberamo tubuna tayamo go, tala eitin (18) goi bogina Kaleya iyowo. Manakae? Sabati goi itoboine tauyana ana yówana goi Yaubada italigei gea geya? Itoboine ae?’
17 Ago Yeisu ina livala goi ana tovakaleyayao igieomaemaedi. Go kidi bodayadi madabokidi Yeisu ina guinuwa kaausaraidi liliudi pasidi siiuyáwana.
Livalakaibala Yaubada ina kalibúbuna manuna:
Ina bodayauwo isáila
(Madiu 13:31-33; Maki 4:30-32)
18 E tauna ilatuwokoidi idigo kana,
‘Yaubada ina kalibúbuna sinaena goi ina bodayauwo adi vaituwo nakonakae? O kaga goi bei akatutuko? 19 Ana kaigigita alova tayamo kutukutuna giyaina toina nakae. Kutukutuyana koroto tayamo ikabi, ina ina tánuwo goi ibaguli. Niga itabo, ibíbina, imalakalova, imatuwo go, mánuwo sina laonina goi idi vátala siyowóidi.’
20 Aiyuwoina idigo kana,
‘Yaubada ina kalibúbuna sinaena ina bodayauwo adi vaituwo kaga goi bei akatutuko? 21 Ana kaigigita isti nakae. Vavina tayamo ana isti ikabi, ana parawa gagaina toina goi ipopoli. Ipopoli ikavava, iyato ana kadókana istiyana isiu parawa madabokina goi ipaisewa, tauna ibíbina gagaina.’
Livalakaibala Yaubada ina kalibúbuna manuna:
Ina bodayauwo idi siu manuna
(Madiu 7:13-14,21-23)
22 Tuwo Yeisu ivanibiníbita asa tamo tamo gagaidi be giyaidi goi ivaatulúkwana go, nava inonoina Yerusalema manuna. 23 E ivanibiníbita go, tomota tayamo ima idigo kana,
‘Tomoya, manakae? Nakona tomota adi taiyuwomo adi yava bei sibabane ae?’
E Yeisu kana,
24 ‘Yaubada ina kalibúbuna ana siu imoumou kedavapola totomna giyaiina ana siu nakae. Ame alatuuwokoimi konōve: Tomota badabadaidi ituli ta kenao siilusala bego sisiu go, geya itoboinedita bei sisiu. Tauna kokokōila kedavapola totomna giyaiina goi Yaubada ina kalibúbuna kosīu.
25 Aba gita aguinuwe. Toni vada itaoya totom bogina ikatunibode go, moetala goi kootaoya be kovatowo niboda kokaukeyekeye kami,
“Tomoya, manuma totom kwatupāeve kasiu!”
Go amo tutayana kina tomoyayana bei idigo kana,
“Komi tauyami geya ayagoimita nakae geya ayagoiyeta komi nako tomotaimi.”
26 Go komi bei kodigo kami,
“Bogina kuyagoima. Boi taiyao takakáika be tanimnim be ima kasa goi kuvaatulúkwana!”
27 Go kina tomoyayana bei idigo kana,
“Ame alatuuwokoimi konōve: Komi tauyami geya ayagoiyeta nako goi koma. Komi goyo ana toguinuwa liliumi, kosīya!”†
28 Yaubada bei ivalilivemi kona asa ituli goi go, amoko goi bei kotaiya vata, nakae salami kokakaavatedi komatamaimaita†a tutayana Eberamo, Aisake, Yakobo be nakae Yaubada ina tokabivalavala liliudi kogitedi Yaubada ina kaba kalibúbuna goi siitusobu sikakáika.†b 29 Ago Totuyoyowo poyapoya ana madabokina goi, bomatu be koiboga goi, nakae yawéyana be youya goi, bei sima Yaubada ina kaba kalibúbuna goi sisiu sikaaiyaka go, situsobu áika manuna. 30 Go konōve. Maniyedi ame tuta toolagaidi go, nava bei tauyadi toosobudi. Ago maniyedi ame tuta toosobudi go, nava bei tauyadi toolagaidi.’†
Yeisu itoboine Yerusalema goi ikámasa
(Madiu 23:37-39)
31 Moe tutayana goi Parisi maniyedi sima Yeisu yaina sidigo kadi,
‘Erodi latuwona ikaumatem,‡ tauna kūna. Ame asayana kwalāve.’
32 Yeisu idigo kana,
‘Erodi geya basabasainamo. Kōna kolatuwōko kami,
“Kunovēgu. Ame be itomo dimoni tomota naagovaidi goi avatapiyedi be tomota akidedevinedi. Ago koneiyuwe guna nuwonúwana alukavave.”
33 Go tuwo, Yaubada ina tokabivalavala geya itoboineyeta Yerusalema moetala goi ikámasa, tauna itoboine ame be itomo be koneiyuwe anonoina Yerusalema goi.
34 Oiyoi komi da Yerusalema e! Boi Yaubada ina tokabivalavala kokauumatedi. Nakae ina lobutu ana tolokoina ietunedi siwo yaimi goi go, gurewa goi kokaumatedi. Tuta liliuna latuwogu bego natumiyao alamgogoidi nakae kamkam bovavina natunao panepanena goi ilamgogoidi go, komi kokatae. 35 Konovēgu. Imi vada‡ Yaubada ikalave, itugavile. Ame alatuuwokoimi konōve: Geya tuwaina bei kogitemneigu ana kadókana kodigo kami,
 
“Tauyana Yauwe yoina goi imamaima kaaipakuna!” ’†
Same 118:26
‡ 13:4 Siloam: Ame asa tayamo giyaina Yerusalema goi. Asayana nakona bwae nikuunikuna tayamo yoina Siloam kikina. † 13:4 Iyo 9:7,11. † 13:14 Tat 20:9-10; Atu 5:13-14. † 13:27 Sam 6:8. †a 13:28 Mad 22:13, 25:30. †b 13:28 Mad 8:11-12. † 13:30 Mad 19:30, 20:16; Mak 10:31. ‡ 13:31 Erodi latuwona ikaumatem: Nakona ame Parisi latuwodi Yeisu sivaite, tauna tauyana silatuwoko bego isiya. O nakona Parisiyadi sipola; latuwodi Yeisu sikatumatoisi bego isiya ina Yudiya. Amoko goi Yerusalema adi tolovina gagaidi itoboinedi siyoisi. ‡ 13:35 Imi vada: Ame livalayana da Giriki niyadi goi geya imavadeta. Ana yagoina aiyuwo, tayamo moe Yerusalema go, tayamo moe Yaubada ina Vada Kimaasabaina. † 13:35 Mad 21:9; Mak 11:9; Luk 19:38; Iyo 12:13.
☰