Yeisu ina katubayasi
ina paisewa manuna tetelina
3
(Luke 3:1—4:13)
Iyoni tosayóyova ina katubayásina
Yeisu ina sowóduwo manuna tetelina
(Madiu 3:1-12; Maki 1:1-18; Iyoni 1:19-28)
1 E Sisa Tiberiyasi bogina iilovina tala ana badabada yawou ainima, e Pontiyo Pailato moe da Yudiya adi gávana, Erodi moe da Galili adi gávana, Erodiyana siyana Pilipo moe da Itureya be da Tarakonita adi gávana, Lusaniya moe da Abilene adi gávana
2 be nakae Tonúwala Gagaidi moe Anasi be Kaiyapasi. Ame tolovinayadi idi tuta lovina goi Yaubada ina livala ima Sakarayau natuna Iyoni yoyowo goi yaina.
3 Tuwo tauyana itáoya ina asa liliudi sákala Iyoridani kikina goi, e tomota yaidi itaalavaita idigo kana,
‘Imi goyo goi kotugavīla namliyeta bei asayoyoimi, e bei Yaubada imi goyo inuwotaoidi.’
4 Ina talavaitayana nakae tokabivalavala Aiseya ina buki goi boi nimatu igini kana,
‘Toduduwo niyana gagaina yoyowo goi iiduduwo kana,
“Yauwe ina kenao kounāi be nakae kokitotomōi!
5 Nakae sákala liliudi kovayāmdi
be koya liliudi kotaviguyalīdi!
Enao kaudoodogaidi kokitotomoiīdi go,
enao kitukitudi kokatumoyasūdi.
6 Moeko goi tomota liliudi bei Yaubada ina yava sigite.” ’
Aiseya 40:3-5
7 E tuwo boda gagaina sima Iyoniyana yaina latuwodi bego isayoyoidi go, ilatuuwokoidi idigo kana,
‘Komi siyasiyaimi moteta nakae! Manakae? Konuwonúwana bego sayóyova kaka goi itoboinemi Yaubada ina egamogamogu imamaima yaina kosiya ae? Sayóyova kaka geya ivaitemita! Mainao imi goyo goi kotugavīla.
8 Tauna neta sayóyova vavagimi koma bego Yaubada ina egamogamoguyana yaina kosiya, e mainao imi tugavilayana goi keuwoimi dedevidi koguinuwēdi. Ago taabu taumiva kodigoopopōita kami,
“Kai tuwo unana kai Eberamo tubunao, tauna liuna bei geya kababaneyeta.”
Nakae geya go, ame alatuuwokoimi konōve: Eberamo tubunao kaga? Yaubada itoboine gurewa ame ikabidi, e Eberamo tubunao imadagidi. Tauna neta komi Eberamo tubunao, moe geya ivaitemita.
9 E Yaubada ina egamogamoguyana kíyama nakae. Kiyamayana bogina alova lamdi goi iyokaabubune, tauna ava kalovava neta sikéuwo goyogoyo, bei itaunanedi go, ikabidi ilavedi yeu goi igabudi. Tauna nakae ina egamogamogu giyakainava isowóduwo yaimi neta geya kotugavileta.’
10 Tuwo boda siluumadade sidigo kadi,
‘Tauna kaga bei kaguinuwe, e bei ima tugavila kavagitakoe?’
11 E Iyoni idigo kana,
‘Avatauwa komi neta mami tanigo aiyuwo, e tayamo tauyana geya ana tanigomo kovīni. Avatauwa komi neta ma kavami, nakae; tauyana geya avanamo kovīni.’
12 E takisi ana togogo maniyedi nakae sima latuwodi Iyoni isayoyoidi. Iyoniyana silumadade kadi,
‘Tovatulúkwana, kaga bei kaguinuwe, e bei ima tugavila kavagitakoe?’
13 ‘Ami lovina takisi ana kakainaki manuna siivinimi nakae kogogo go, taabu kotalaavagōgana’, Iyoniyana kaena.
14 E tovayaviya nakae sima sidigo kadi,
‘Kai manakaema? Kaga bei kaguinuwe, e bei ima tugavila kavagitakoe?’
Iyoni idigo kana,
‘Taabu imi katumatoita goi tomota kovaaobūdi bego tuwaina kokabi be nakae taabu mani manuna tomota kowoowokōidi. Ami maisa manuna to kouyawanāmo.’
15 E bodayadi siilotuta bego Guyau giyakainava bei ima. Tuwo liliudi nuwodi goi sinuwonúwana Iyoni manuna kadi,
‘Amo Tauyana Guyau, Yaubada ana Vadámana, gea geya?’
16 Idi lotutayana Iyoni ikinane, tuwo madabokidi ilatuwokoidi idigo kana,
‘Yau bwae goi asaayoyoimi. Go koroto tayamo imamaima itobukukuyuigu; nakae geya itoboineguta bei ana sendoro ana búyala ataligei unana yau sobuyekoina. Moe Tauyana Baloma Kimaasabaina goi be yeu sabeninimina goi bei isayoyoimi.
17 Tauyana ina kaba takínona bogina iyokaabubune bei giyakainava witi kutukutuna be mosamosaina itakinodokoidi. Ikavava, ana kutukutu bei ikabidi, ina sánala goi idodoidi go, mosamosayana, bei ikabidi yeu aiyako vaatayaina goi igabudi.’
18 E tuwo liwola badabadaidi goi tomota yaidi Vala Dedevina itaalavaite.
19 E kina go tolovina Erodi ina goyo badabadaidi go, ivaituwedi. Boi ina bágala be ina guinuwa goyogoyoidi liliudi tomota matadi goi Iyoni ikamamaetalidi kana,
‘Erodi, bogina kubágala unana tuwowom Pilipo nava maa yawoina go, tuwo monena kukabi kunai.’
20 Moeko goi Erodiyana ina goyo ivaituwedi ame nakae: Ilovina Iyoni siyoisi deri goi sivaisiu.
Yeisu ana sayóyova tetelina
(Madiu 3:13-17; Maki 1:9-11)
21 E Iyoni boda liliudi isaayoyoidi ikavava, Yeisu nakae isayoyoi. Ikavava, Yeisu ikawanoi go, Yaubada yábana ikatupáeve,
22 Baloma Kimaasabaina ma wowona ana kaigigita bunabuna nakae isou ima Tauyana yaina goi. Ago níyana tayamo yábana goi itumasobu idigo kana,
‘Kom natugu guna kakaya, auyaonedokoim.’
Yeisu ana liliu
(Madiu 1:1-17)
23 Yeisu ana tala moe 30 bogina, e ina paisewa iivatowo. Tomota sidigodigo bego Tauyana Iyosepa natuna.
Iyosepayana tamana moe Eli.
24 Eli tamana moe Matate.
Matate tamana moe Livai.
Livai tamana moe Melaki.
Melaki tamana moe Yanai.
Yanai tamana moe Iyosepa.
25 Iyosepa tamana moe Matatiyasi.
Matatiyasi tamana moe Emosi.
Emosi tamana moe Naum.
Naum tamana moe Esili.
Esili tamana moe Nagai.
26 Nagai tamana moe Makata.
Makata tamana moe Matatiyasi.
Matatiyasi tamana moe Semeini.
Semeini tamana moe Yoseka.
Yoseka tamana moe Yoda.
27 Yoda tamana moe Yoanane.
Yoanane tamana moe Reisa.
Reisa tamana moe Serubabela.
Serubabela tamana moe Salatiyeli.
Salatiyeli tamana moe Neri.
28 Neri tamana moe Melaki.
Melaki tamana moe Adi.
Adi tamana moe Kosam.
Kosam tamana moe Elamadam.
Elamadam tamana moe Era.
29 Era tamana moe Iyosuwa.
Iyosuwa tamana moe Eliyesa.
Eliyesa tamana moe Yorim.
Yorim tamana moe Matate.
Matate tamana moe Livai.
30 Livai tamana moe Simion.
Simion tamana moe Yuda.
Yuda tamana moe Iyosepa.
Iyosepa tamana moe Iyonam.
Iyonam tamana moe Eliyakim.
31 Eliyakim tamana moe Meleya.
Meleya tamana moe Mena.
Mena tamana moe Matata.
Matata tamana moe Natani.
Natani tamana moe Devida.
32 Devida tamana moe Diyesi.
Diyesi tamana moe Obedi.
Obedi tamana moe Boasa.
Boasa tamana moe Sale.
Sale tamana moe Nakasoni.
33 Nakasoni tamana moe Aminadabi.
Aminadabi tamana moe Adamini.
Adamini tamana moe Areni.
Areni tamana moe Esironi.
Esironi tamana moe Peresi.
Peresi tamana moe Yuda.
34 Yuda tamana moe Yakobo.
Yakobo tamana moe Aisake.
Aisake tamana moe Eberamo.
Eberamo tamana moe Tera.
Tera tamana moe Nakori.
35 Nakori tamana moe Seruga.
Seruga tamana moe Reu.
Reu tamana moe Pelega.
Pelega tamana moe Iberi.
Iberi tamana moe Sale.
36 Sale tamana moe Kenani.
Kenani tamana moe Arepakadi.
Arepakadi tamana moe Semi.
Semi tamana moe Nowa.
Nowa tamana moe Lemeki.
37 Lemeki tamana moe Metúsela.
Metúsela tamana moe Enoki.
Enoki tamana moe Yaredi.
Yaredi tamana moe Malaleli.
Malaleli tamana moe Kenani.
38 Kenani tamana moe Enosi.
Enosi tamana moe Seti.
Seti tamana moe Adama.
Adama tamana moe Yaubada.