4
Ch'anky'aa Shroodiinyąą Łyaa Oots'it Kwaa, Gąą Ch'anky'aa Tr'aanduu Łyaa Oots'it Gaandaii
1 Shalak nąįį, Vit'eegwijyąhchy'aa eenjit ginkhii adaa'įį nąįį dzaa nankak gwanlii. Dinjii lęįį nąįį tsinteediihąąhkaii. Juu Ch'anky'aa Shroodiinyąą shats'an nilii, nyąą ji', ąįį nąįį k'injuhkhit shrǫ', gąą Vit'eegwijyąhchy'aa vats'an Ch'anky'aa Shroodiinyąą di'įį ji', eenjit tr'ookit vak'ahoonjii.
2 Jyąhts'ą' t'ee Vit'eegwijyąhchy'aa Vach'anky'aa Shroodiinyąą haa haakhwandaii. Dinjii Jesus Christ dinjii k'it dzaa nankak noozhii, nyąą ji', ąįįt'ee Vit'eegwijyąhchy'aa Vach'anky'aa Shroodiinyąą di'įį.
3 Gąą juu, “Jesus dinjii k'it dzaa nankak noozhii kwaa,” nyąą ji', ąįįt'ee Vit'eegwijyąhchy'aa Vach'anky'aa Shroodiinyąą di'įį kwaa. Jidii di'įį ąįįt'ee Christ ts'ą' gwił'ąįį ts'an t'inchy'aa. “Christ ts'ą' gwił'ąįį it'ee diitee neeheedyaa,” gwinyąą, izhik t'ee goohtth'ak. Gąą ch'adąį' hee diitee neezhįį t'inchy'aa.
4 Gąą shitr'iinin nąįį, Vit'eegwijyąhchy'aa vats'an ǫhłįį. Ch'anky'aa Shroodiinyąą nakhwats'an nilii, ąįįt'ee ch'anky'aa tr'aanduu dzaa nankak gwats'an nilii nąįį zhit gwitr'it t'agwah'in, ąįį gąą andaa veegoo'aii. Ch'anky'aa Shroodiinyąą nakhwats'an nilii geh'an t'ee, “Vit'eegwijyąhchy'aa eenjit ginkhii ihłįį,” nyąą nąįį neenakhwagiin'ak kwaa.
5 Jii nąįį t'ee dzaa nankak gwats'an ginlįį. Dzaa nankak deegwii'in gwizhrįį geegiginkhii ts'ą' nankak gwats'an nilii nąįį łyaa zhyąą gavoołk'įį.
6 Gąą diikhwan Vit'eegwijyąhchy'aa vats'an tr'inlii. Juu Vit'eegwijyąhchy'aa haandaii nąįį t'ee łyaa diigoołk'įį. Juu Vit'eegwijyąhchy'aa vats'an nilii kwaa nąįį diigoołk'įį kwaa. Ch'anky'aa Shroodiinyąą łyaa oots'it kwaa, gąą ch'anky'aa tr'aanduu łyaa oots'it gaandaii. Diigoołk'įį ji' t'ee Ch'anky'aa Shroodiinyąą vats'an nilii, vaagweheendaii. Ąįįts'ą' chan diigoołk'įį kwaa ji' t'ee, ch'anky'aa tr'aanduu vats'an nilii, vaagweheendaii.
Vit'eegwijyąhchy'aa Gweedhaa Tthak Dinjii Nąįį Eet'iindhan
7 Shalak nąįį, ch'eet'igwiniindhan t'ee Vit'eegwijyąhchy'aa ts'an t'inchy'aa. Ąįį geh'an t'ee khik ts'ą' gwintł'oo nihłeet'irihęęnghyaa. Juu łyaa zhyąą ch'eet'igwiniindhan di'įį, ąįįt'ee Vit'eegwijyąhchy'aa vigii, ąįįts'ą' chan Vit'eegwijyąhchy'aa łyaa haandaii.
8 Vit'eegwijyąhchy'aa gweedhaa tthak khik dinjii nąįį eet'iindhan, ąįį geh'an juu ch'eet'igwiniindhan di'įį kwaa, ąįįt'ee tth'aii googaa Vit'eegwijyąhchy'aa haandaii kwaa.
9 Vit'eegwijyąhchy'aa Didinji', it'ee shri' vigii, dzaa nankak gwats'ą' hił'e', vik'iighai' łyaa zhyąą t'oohju' t'ee gwireheendaii geenjit. Jyąhts'ą' t'ee deegwiłtł'oo diineet'iindhan geediinoołtin.
10 Ch'eet'igwiniindhan t'ee jyąhts'ą' t'agwarahnyąą. Vit'eegwijyąhchy'aa łyaa diineet'iindhan. Ąįį geh'an Didinji' dzaa nankak gwats'ą' hił'e', diitr'agwaanduu diineenjit oo'an gweheelyaa geenjit. Vit'eegwijyąhchy'aa adan tr'ookit diineenjit ch'eet'igwiniindhan di'įį, Ąįįtł'ęę vats'an ch'eet'igwiniindhan tr'ii'įį.
11 Shalak nąįį, Vit'eegwijyąhchy'aa jyaa dagwahtł'oo diineet'iindhan, akwat diikhwan t'ee łyaa zhyąą nihłeet'irihęęnghyaa gwizhrįį.
12 Dinjii ch'ihłak gąą tth'aii Vit'eegwijyąhchy'aa nah'in kwaa, gąą nihłeet'iriindhan ji', gweedhaa tthak diinaa nilii, ąįįts'ą' chan vich'eet'igwiniidhan tr'ii'įį, łyaa zhyąą gwit'igwehee'aa kwaa.
13 Ch'anky'aa Shroodiinyąą diits'an iłtsąįį, ąįį k'iighai' t'ee Vit'eegwijyąhchy'aa khik diinaa nilii ts'ą' diikhwan t'ee khik vaarinlįį, łyaa gaagwiindaii.
14 Ąįįts'ą' chan Diiti' Didinji' dzaa nankak gwats'ą' hił'e', nankak dinjii nąįį datthak neehahshii heelyaa geenjit. Ąįįts'ą' chan tr'ąąh'ya', ts'ą' tr'ąąh'ya' khik ts'ą' geegirinkhii.
15 Juu, “Zhik dinjii, Jesus oaazhii, Vit'eegwijyąhchy'aa Vidinji' t'inchy'aa,” nyąą ji', ąįįt'ee Vit'eegwijyąhchy'aa khik yaa nilii ąįįts'ą' adan t'ee Vit'eegwijyąhchy'aa khik haa nilii.
16 Vit'eegwijyąhchy'aa thok ch'eet'igwiniindhan diineenjit di'įį, ąįį t'ee veenjit gaagwiindaii, ąįįts'ą' chan ąįį vich'eet'igwiniidhan t'injirąąhchy'aa.
Vit'eegwijyąhchy'aa gweedhaa tthak khik dinjii nąįį eet'iindhan, Juu khik dalak nąįį eet'iindhan ts'ą' khik gwik'it t'inchy'aa ji', ąįįt'ee Vit'eegwijyąhchy'aa khik haa nilii ts'ą' chan Vit'eegwijyąhchy'aa khik yaa nilii.
17 Vich'eet'igwiniidhan tr'ii'įį, łyaa zhyąą gwit'igwin'ee kwaa, ąįį geh'an nijin drin dinjii nąįį datthak tr'oohahkat ji', tr'ahąąnjat kwaa. Dzaa nankak gwizhit Christ vik'it t'irinchy'aa, ąįį geh'an gwizhrįį tr'ahąąnjat kwaa.
18 Diineet'igwiindhan gaagwiindaii ji', it'ee tr'ahąąnjat kwaa. Juu veet'igwiindhan gwit'igwin'ee kwaa, ąįįt'ee duuyeh naajat. Nijin dinjii naajat dąį' t'ee, ch'adąį' hee vigwiilzhii k'it t'inchy'aa. Nijin dinjii naajat dąį', Vit'eegwijyąhchy'aa ts'an ch'eet'igwiniindhan di'įį, tth'aii hee gwit'igwehee'aa.
19 Vit'eegwijyąhchy'aa adan tr'ookit diineet'iindhan, ąįį geh'an ch'eet'igwiniindhan tr'ii'įį.
20 Juu, “Vit'eegwijyąhchy'aa eet'iihthan,” nyąą gwiizhik Christ k'injiighit nąįį itr'ii'ee, vaagwiindaii ji', ąįįt'ee oots'it nilii. Dzaa nankak juu Christ k'injiighit nąįį nah'in gwiizhik giveenjit ch'eet'igwiniindhan di'įį kwaa ji', Vit'eegwijyąhchy'aa tth'aii googaa nah'in kwaa, ąįį nats'ahts'ą' eet'ihęęnghyaa?
21 Juu Vit'eegwijyąhchy'aa eet'iindhan, ąįįt'ee Christ k'injiighit nąįį chan eet'ihęęnghyaa gwizhrįį. Jyąhts'ą' t'ee Vit'eegwijyąhchy'aa diits'ą' k'eedeegwiildhat.