26
Amakungula ameekeereri
1 Awo oMusa ni yeeyongera ati, “Owemwalimala okutuuka omu kyalo oMusengwa iye oKibbumba waanywe ekyabawa okubba omuwuluko era ni mukyetwalira ni mukityamamu,
2 mwalikwatanga ku buli kirime ekyekeereri, kwebyo ebimwalikungulanga okwitakali lyʼekyalo ekyo oMusengwa iye oKibbumba waanywe ekyabawa, ni mubiteeka omu kiibo. Awo ni mwaba omu kifo oMusengwa iye oKibbumba waanywe ekiyalironda okumusinzirangamu.
3 Era eeyo ni mukoba okabona eyalibba aweererya omu kiseera ekyo muti, ‘Olwatyanu njatula eeri oMusengwa iye oKibbumbawo nti, ndi omu kyalo oMusengwa ekiyalayiriire abazeiza baiswe okutuwa.’
4 Kale okabona yatoolanga ekiibo ekyo omu ngalogyo, nʼakiteeka ansi omumaiso gʼekyoto kya Musengwa iye oKibbumba waanywe.
5 Olwo iwe waabbanga nʼokukakasa ebibono binu omumaiso ga Musengwa iye oKibbumbawo oti, ‘Ozeiza wange yabbaire Mwalamu asenguka-senguka. Era yaserengetere nʼayaba omu kyalo kyʼe Misiri nʼabba eeyo nga musenze nʼabʼomu kisitokye batono bati. Babbaire eeyo, ni basuuka igwanga erinene eryʼamaani era ni babba babitiriri ino.
6 ABamisiri ni batubitya bundi, ni batugadya, ni batukolesya emirimo emikalanguki.
7 Ni twekungirira oMusengwa iye oKibbumba wʼabazeiza baiswe, oMusengwa nʼatuwulira, nʼabona okugada kwaiswe nʼokufambikana kwaiswe, nʼengeri egibabbaire batumigirirya.
8 OMusengwa nʼatutoola omu kyalo kyʼe Misiri ngʼakolesya obwezye obubitiriri nʼamaani amangi, nʼebyentiisya enene nʼobumanyiciryo obwʼebyewunyo nʼebyewunyisya.
9 Nʼatuleeta kunu, nʼatuwa ekyalo kinu, ekyalo ekiizwire amata nʼomujenene.
10 Oo Musengwa, era atyanu ngonu ndeetere ebyekeereri ebyʼokwitakali eriwampaire.’ Awo wateekanga ekiibo ekyo omumaiso ga Musengwa iye oKibbumbawo, era nʼomusinza.
11 Era iwe nʼaBaleevi era nʼabanamawanga ababba mwinywe mwasangaalanga olwʼebisa byonabyona oMusengwa iye oKibbumbawo ebyakuwaire, nʼabʼomu kisitokyo.”
12 “Owemwabbanga mumalire okwabulaku ekimo kyʼeikumi ekya buli kirime ekimwabbanga mukungwire omu mwanka ogwokusatu, igwo omwanka ogwʼekimo kyʼeikumi, mwakiwanga aBaleevi, nʼabanamawanga, nʼabafuubbi, nʼabanamwandu, kaisi olwo ni baliiranga omu bibuga byanywe ni baikuta.
13 Awo watumulanga omumaiso ga Musengwa oti, ‘Ekimo kyʼeikumi ekyʼamakungula gʼomu kisito kyange nkitoire era ni nkiwa aBaleevi, nʼabanamawanga, nʼabafuubbi, nʼabanamwandu, ngʼebiragirobyo byonabyona obwebiri. Tinjeemeireku ekiragirokyo kyonakyona waire okwerabiraku kadi ekimo kwibyo.
14 Ekimo kyʼeikumi ekyo nandi ni nkiryaku omu biseera byʼokukunga omuntu, waire okukitoolaku nga tindi mulongoole, waire okukitoolaku okubbiragira abafu. Nkugondeire Musengwa iwe Kibbumba wange; nkolere nabuli kimo ekiwandagiire.
15 Olole ansi ngʼosinziirira omwigulu omu kifookyo ekitukulye era owe enkabi abantubo aBaisirairi, era owe enkabi nʼekyalo ekiizwire amata nʼomujenene ekyotuwaire, ekiwalayiire okuwa abazeiza baiswe.’ ”
Abantu ba Kibbumba ababe okububwe
16 Awo oMusa ni yeeyongera ati, “Olwatyanu oMusengwa iye oKibbumba waanywe abalagira okutuukiriryanga amateeka ganu nʼebiragiro. Kale mwegenderezenge okubituukirirya nʼemyoyo gyanywe gyonagyona, nʼobwomi bwanywe bwonabwona.
17 Mukakasire olwatyanu muti oMusengwa, niiye oKibbumba waanywe, era muti mwatambuliranga omu manzirage, era muti mwatuukiriryanga ebiragirobye, nʼebyokulungamyabye era nʼamateekage era muti mwamugonderanga.
18 Era oMusengwa akakasire olwatyanu ati muli babe abaakira okutaka, ngʼoweyasuubizire era ati mwabbanga nʼokukuuma ebiragirobye byonabyona.
19 Era akakasire ati yalibatutumuca, ni mumanyikana era nʼabagulumalya okukiraku amawanga gonagona ageyakolere, era ati mwalibba igwanga eritukulye eeri oMusengwa iye oKibbumba waanywe ngʼoweyasuubizire.”